Uri-Khob okwa tandwa mongolo

0
319

Windhoek – Olutu oluwiliki lwetanga lyokoompadhi [ Namibian Football Association] olwa gandja uuyelele kombinga yokwaaholoka komudhani gokomeho mospana yopashigwana, Brave Warriors. Omudhani nguka ha endelele oku tulamo ookoola oye Sadney Urikhob.

Omudhani nale gwospana yoCivics ngashingeyi ohadhana etanga moThailand . Nguka okwa li a dhanene Namibia muudhano pokati ka Namibia na Zambia sho ya li taya kondjele okukadhana  methigathano  lyiigwana yAfrica hali ithanwa African Nations Championships (CHAN). Nguka ita ka vula okudhana  uule woomwedhi ndatu molwashoka okweehama mongolo pethimbo ali ta dhanene ospana ye moliha  yedhina Thai Super League a dhanene ospana ye Saraburi FC.

Sho a hokolola nkene a ehamekwa pepandja lyo NFA okuza ko Thailand, Uri-Khob okwa holola shoka she mu kutha  muudhano wetanga lyokoompadhi.

“Osha tameke okweenda nayi konima sho nda dhanenwa nayi  komudhani gwokonima, naashika osha kutha ndje muudhano uule wiiwike itatu, ndele konima onda tipo hwepo , onda tameke ishewe  okudhana nda kala muudhano uule wominute 60 nosho wo onda tulamo okoola , ihe oshinima osha ka yonuka muudhano wa landula . Ondi iyehameke mongolo yandje yokolumoho nonda kala itaandi dhana ishewe uule wiiwike itatu.

Konima okwa ka tandwa nonkalo ye oya hwepopala nawa neendelelo , kutya ngaaka meni lyoomwedhi ndatu ndhoka omudhani ena okuhwepopala. Omudhani nguka otashi vulika a tameke oku idheula ishewe meni lyiiwike ihamano.

Aanambelewa yuunamiti oya li ya kumwa kutya omudhani nguka okwa aluka mbala  hangaashi shoka  olundji sha tegelelwa okuningwa methimbo lyoomwedhi ndatu.

“Ngame itandi ka endelela okushuna mokapale okudhana oshoka oku ehama  mongolo kakushi okwaanawa  nongolo ta yi ehama ohayi pumbwa  oku aluka nawa. Omanga Urikhob ineehama moshinima shika, omudhani gwa Namibia nguka  okwa li a tulamo ookoola ndatu momaudhano geli gatano. Onda hala andola onda li tandi vulu okuhogololwa oku ka dhanena oshilongo shandje  muudhano wawo na Guinea oshiwike shika,” Uri-Khob a ti.

Ihe nando ye kemo okwi itaala kutya ospana yopashigwana oyina aadhani ye li nawa mboka ye na enota lyokusindana. Unene tuu sho mbaka taya dhana komeho gaayambidhidhi yawo megumbo. “Neyambidhidho ndika lyaakalimo megumbo ondi inekela kutya  mbaka ota ye ke tu uvitha uunambano uuna ya sindana uudhano mbuka” osho Urikhob a popi pehulilo.

Caption: Sittos muudhano – Sadney Uri-Khob ota tyapula konima yoku tulamo okoola omanga ta dhanene ospana ye yo Saraburi FC moThailand.

LEAVE A REPLY

Please enter your comment!
Please enter your name here