Aagundjuka mOshikoto oya hala omandiki guungomba

0
324

 

OMUTHIYA – Omunashipundi mewiliko lyaagundjuka moshitopolwa shaShikoto Mathews Hangula okwali a holola gamwe gomomakemo gawo ngono ali a tseyithile Omupresidente Hage Geingob pethimbo ali a talelepo noku tsakanena naakalimo yomOshikoto oshiwike sha yi mondoolopa yaMuthiya.

Hangula okwa holola kutya oya pumbwa endiki lyomadheulo gaagundjuka moshitopolwa yo ya vule ya kale taya mono uunongo mboka oyendi ya pumbwa. “ Moshitopolwa shetu ka muna nenge endiki ndyoka hali dheula aagundjuka na kehe ngoka a pumbwa uunongo. Otwa pumbwa endiki ndika go omadheulo goludhi kehe ga ye miilonga, otwa pumbwa woo oshiputudhilo shopombanda, opo aagundjuka yomoshitopolwa naamboka yopuushiinda ya kale taya longwa popepi ihe haku enda oondjila oonde,” Hangula ta ti ngaaka.

Omupresidente Geingob kepulo ndika okwa yelitha kutya oye na edhiladhilo opo ku kale kwa tungwa mbala ando iiputudhilo yopombanda oshowo omandiki gokudheula aagundjuka na kehe ngoka a pumbwa omadheulo gopaungomba, naashino otashi ka kala sha ningwa moshitopolwa kehe ko ku yandwe onkalo yokwaana iiputudhilo ya gwana moshilongo.

Geingob ta ti aagundjuka oyo esipa lyombunda lyoshilongo noya pumbwa oku pewa omayakulo ga gwana naangoka taya pumbwa. Okwa indile woo aagundjuka ya yande elongitho nayi lyiikolitha noku ikalelaka kokule niingangamithi, ta ti mbino oyo yimwe tayi etitha omadhipago nomahepekathano moshigwana.

Gamwe gomomadhiladhilo nomakemo gali ga hololelwa omupresidente ogali ga zi kelelo lyopamuthigululwakalo lyaNdonga, ngono gali ga etwapo kelenga enene moshikandjo Amuteya ,Vilho Kamanya.  Elelo olyali lya indile opo omapendulopo agehe taga ningwa ga kale ga tseyithilwa elelo lyaNdonga  ko ku yandwe okwaaha uvathana konima.

Elelo tali indile opo epangelo li tunge oondama odhindji ngaashi tashi vulika opo dhi kale tadhi pungula omeya ga gwana, unene ngaashi kuna ompumbwe yomeya  niimuna otayi hupu nuudhigu. Kamanya ta indile opo eshina lyokulutenda ndyoka lya konekiwa lina owala oshikoto shimwe shokweenda aantu opo ando iikoto yi kale iyali , lyo li kale tali faalele aantu oyendji komahala nomahala.

Ngano ogo gali gamwe gomomathaneko nomadhiladhilo aakwashigwana yali ye etapo pethimbo lyoshigongi  sho yali ya tseyithile omupresidente ngono ali a talelepo oshitopolwa shaShikoto. Geingob okwali a yamukula gamwe gomomapulo nokwa uvaneke galwe ngoka gali ga tumwa ku pitila mombelewa ya ngoloneya gwaShikoto taga kala ga yamukulwa mbala. Oshigongi oshali sha kalwa kengathithi enene. Geingob okwali woo a talelepo oshipangelo oshinene shaMuthiya esiku ndyoka omanga oshigongi inaashi tameka.

LEAVE A REPLY

Please enter your comment!
Please enter your name here