Kwateni eendjebo nawa

0
313

 

EENHANA –Opolifi yoshitukulwa shaHangwena otai kunghilile ovanhu aveshe ve na eendjebo vedi fyuulula, opo vedi twale nokudilopota keeshashiyona dopolifi meni lomafiku aheyali.

Omupopiliko wopolifi yaHangwena sisande Kaume Itumba okwa tonga edi, meenghundafana noshifo Kundana.

Itumba ta ti opolifi moshitukulwa Ohangwena, oya didilika vahapu ve na omauta a fyuululwa no inaa lundululilwa komadina avo. Oveta oya ufa opo ou e na outa wanakufya eu twale kopolifi meni lomafiku a heyali.

Sisande Itumba ta yandje oshihopaenewa shomukalimo womOndobe oo a panga oule weedula mbali nondjebo ya mumwaina a fya. Nakufyuulula ou okwa ka twala ondjebo oyo kopolifi konima yeingido

Ta ti, ovalumenhu moshitukulwa ova lopela okufyuulula omauta oonakufya hava tameke okwaa longifa inave a lopota kopolifi. Eshi, osha nyika oshiponga koveta yoshilongo ya ufa outa wa mwene a fya uha longifwe.

Natango opolifi oya pula yoo ovo ve na omauta moshilongo ve a kwate nawa, noku luufa keeveta dokukala nomauta nokuhenuka oiponga inashi teelelwa.

Sisante Itumba okwa ti omauta ehe na eembapila da yela ohaa longifwa moinima ihapu ya kelelwa koveta vamwe  hava yashe eedila momatale, vamwe tava kongo oundiba momifitu tava longifa omauta unene omapwakola nande kae na eembapila da yela. Omauta aeshe a fyuululwa ilo ehe na eembapila naa twalwe keesasiona dopolifi meendelelo.

Onghee sisande Itumba okwa kunghilile yoo ovo va yandja omauta kovanahambo mofuka manga eembapila neesafe domauta di li komaumbo ve shi xulife po meendelelo osheshi osha nyika oshiponga. Nande opolifi fiyo opapa inai lopotelwa omunahambo a yandja oshiponga keehambo domoshitukulwa shaHangwena, otai kunghilile kutya oveta inai ufa outa u kale kumwe ku lili omanga osafe ye li kalela kumwe ku lili, osha nyika oshiponga keameno lomunhu nekwatele po loveta yomauta yoshilongo.

LEAVE A REPLY

Please enter your comment!
Please enter your name here