Ookansela dhu uka moshipundi shevululuko dha tumbalekwa

0
382

 

OMUTHIYA – Elelo lyoshitopolwa shaShikoto Omaandaha oshiwike shikaa olya lya gandja omapandulo oshowo lya tumbaleke dhimwe dhomookansela ndhoka tadhi ethapo iilonga yuuwiliki wiikandjohogololo konima yomahogololo ngoka taga ka kalako Etitano lyoshiwike tu uka.

Konyala aaniilonga yiikondo ya yoolokathana melelo lyaShikoto oyali ya gongala ya gandje esimaneko kookansela ndhoka yo ya lalekathane noku tyapula oshituthi shawo shokomumvo.

Ngoloneya gwaShikoto Henock Kankoshi pethimbo ta popitha oshiithanene okwa li a pandula ookansela ndhoka a kala ta longo nadho, tedhi halele omukumo noonkondo miilonga yadho mbyoka tadhi ka tsikila nayo.

“Aluhe ohashi kala oshidhigu okutopoka nomuntu ngoka wa kala to longo pamwe na ye ethimbo, ondu uvite ombili nokombinga yimwe ondina oluhodhi mokulalekathana naaleli yandje mboka twa longo pamwe  no ya kwathela mehumokomeho moshitopolwa ashihe shaShikoto, oshowo ya andjaneka omayakulo kiikandjohogololo yawo,” Kankoshi ta ti ngaa.

Ookansela dhiikandjohogololo ihamano (6) mOshikoto ndhono iikako yawo tayi hulu omwedhi nguka  dha tumbalekwa ongaashi kansela gwaNayena Max Nekongo,Isack Gomachab Quinas,John Shiindi Oniipa, Darius Shikongo Olukonda, Joseph Imbili Okankolo oshowo Armas Amukoto Omuthiya.

Kankoshi okwa indile ookansela ndhika dhika longe iilonga yadho nombili, dho dhi gandje omakwatho kookansela oompe ndhoka ta dhi ka ganithilwa moshilonga konima yomahogololo.  Ta gwedhapo kutya ookansela ndhoka odha kwathela elelo lyaShikoto momahumokomeho ngaashi eyandjaneko lyolusheno momikunda,oopate nomakwatathano, uundjolowele,elongo, nuunafaalama oshowo okutula oshitopolwa pamuthika guli nawa nena.

Ngono eli omukuutumbithi gwelelo lyaShikoto Max Nekongo okwa li a popi  pehala lyookansela mboka ta ya yi moshipundi shevululuko. Nekongo okwa pandula ewiliko ewanawa lyaShikoto , ta indile ookansela ndhoka tadhi ka ganithilwa miilonga dhi tsikile mpoka ya hulile , yo ya tsikile noku eta omahumokomeho miikandjohogololo nomoshitopolwa ashihe.
Oshiithanene oshali woo sha kalwa ku dhimwe dhomookansela ndhoka dha lela oshitopolwa shaShikoto ngaashi Nico Kaiyamo, Paulus Angula, Hosea Namupala, Vilho Kamanya. Noyendji mboka ya lela melelo lyOshikoto.

LEAVE A REPLY

Please enter your comment!
Please enter your name here