Va pandula elelo lodoopa ya Lüderitz

0
291

 

Lüderitz – Omunamido 72 Justina Nangula Shimana omukalimo womo doolopa ya Lüderitz, okwa pandula unene kelelolo lo doolopa yavo   mekwatelo komesho laMeya Suzan Ndjaleka, eshi ve va longekidila oshivilo shokuyele sha Krismesa.

Oshivilo eshi osha li sha tyapulwa moshivike shotete shohani ei mo saala ya Benguela mo Lüderitz.

Meenghundafana odo va ninga na Kundana meekulu Shimana, okwa tumbula kutya elelo lodoolopa keshe odula oha li va ningile oshivilo shi shambula sho Krismesa , osho a tumbula kutya okwa pandula unene kelongekido eli, eshi la yuka komesho noku shambula ovakulupe novanhu ovo vena oulema.

Meekulu Shimana okwa pandula yoo unene kei ngido olo la yandjwa komunambelewa wo OK Grocer ,Hannelie De Langer oo a shiivifila ovakulupe moshivilo shavo shokuyele sha Krismesa  kutya, ovakulupe novanhu ovo vena oulema hava mono oshikuvila shepangelo ova pewa efiku lowina lokulanda mongeshefa ya OK Grocer. De Langer okwa tumbula kutya efiku etivali keshe loshivike ngee tava ka landa mongeshefa ya OK mo Lüderitz nava twaalele oukalata vavo vokutambulifa oshikuvila shepangelo, opo va dule okukufilwa kwaasho tava lande.

Shimana okwa pandula unene ta ti: “Ouwa aushe oo hatu ningilwa ngee okelelo lodoolopa yetu olo hali tu shambula odula keshe okuya pehulilo lodula , ile oshali oyo twa pewa kongeshefa ya Ok Grocer, oo atokola okukufilako ovakulupe keendado etivali keshe loshivike, ngeno nau ningilwe yoo tuu ova kulupe vakwetu moshilongo ashishe, opo ova kulupe atushe hatukala twahafa lela.”

Tatekulu Jonas Kakoro oo ena eedula dili 85,  naye yoo okwa mona omhito oku yandja olupandu laye , okwa tumbula kutya okwa pandula unene koshivilo osho hava ningilwa odula keshe.  Okuna eindilo eli yu kifa kova Namibia aveshe ovo moikandjo yavo nomeedoolopa davo ta mu kakala omahoololo, ta ti ovanhu nava ye komahoololo opo va ka hoolole ovaleli ovo ta ve ke valela moikandjo oshoyo meedoolopa davo.

Tatekulu Kakoro okuna yoo etumwalaka la yuka kovaleli ovo tava kaya koshipundi konima yomahoololo ta ti: “Ovo tava kaya koshi pundi nava diinine oilonga yavo, osheshi ovanhu eshi veva hoolola osheshi ve ve lineekela, nava diinine oku tala ovanhu , okuva tala komaudjuu oo vena, opo oshilongo tashi xumu komesho.

Kakoro okwa halela omupresidente woshilongo Omundokotola Hage Geingob oshoyo eeMinisteli adishe moshilongo, novakwateli komesho vongeleka, oKrismesa ya punikwa nodula yo2016 ina elao.

Ovakulupe novanhu ovo vena oulema va konda po 400 ova vali va shiivwa kelelo lo doolopa opo va tyapule pamwe oshivilo shokuyele sha Krismesa, sho sha kosha N$80 000 oku landa oikulya nokunwa, oshoyo oku futa oumbapila vongungushu N$120. 00 ovo va pewa omushivwa keshe opo ekelilandele osho a pumbwa mongeshefa ya OK Grocer mo Lüderitz.

 

LEAVE A REPLY

Please enter your comment!
Please enter your name here