Vahapu va kwatwa moulunga woukongo

0
410

 

WINDHOEK – Opolifi yaNamibia oya kwata ovafekelwa 75 neudo moshilongo ashishe mekwatafano noukongo woulunga woifitukuti moikunino yoinamwenyo yomoshilongo ashishe. Okudja  Januali  fiyo Apiilili  2015, ovalunga voifitukuti ova dipaa eemhanda 77 neendjaba 37  moikunino yoinamwenyo mEtosha nomudingonoko, oshoyo koshikunino shaBwabwata sha andjakana moitukulwa Okavango kombinga yokoushilo fiyo omoshitukulwa shaZambezi.

Ouyelele owa yandjwa koministeli yoshikondo shefiloshisho loushitwe nepashukilo lomidingonoko Pohamba Shifeta, tai ti ovafekelwa vahapu  moukongo woifitukuti  ova kwatelwa momikunda domoshitukulwa shaMusati Onamatanga, Uutsathima, Iitapa, Otyenoa, omanga koshitukulwa shaKunene kwa kwatwa ovafekelwa vatano moukongo weemhanda. Pohamba ta weda po kutya, eemhanda 64 oda dipaelwa moshikunino shEtosha mwoovene, omanga koshitukulwa shaKunene okwa dipawa eemhanda hetatu. pOmatendeka, nopOrupembe.

Eshi osha etifa opo ovafekelwa 42 mongudu yavakwao va holoke momangu   shinasha noukongo weemhanda, nonande ovafekelwa  vaheyali  ova efiwa omolwa oumbangi inau lixwa po, umwe womongudu yovaefiwa omukwashiwana waAngola. Oshikonga shokukwata ovafekewla osha pondoka melongelokumwe lopolifi novapashukili veenhele domidingonoko mEtosha,  ova tameka ku konga ouyelele noku katuka eenghatu da kola, sha kwatifa ovo va kufa ombinga moukongo  woifitukuti uhe li paveta.

Pefimbo lo shikonga shokuhada mo ovakongo veefitukuti, opolifi oya  kwata ko eendjebo 59 neeholo, eendjebo 32 otaku tengenekwa da longikidilwa oukongo uhe li paveta moshikunino Etosha, omo eendjebo 23 da tumwa opo di ka konaakonwe. Epangelo oli na ku longa noudiinini okukandeka oulunga woifitukuti moshilongo, noshikondo sheameno loushitwe oshimwe shomoikondo hai eta shihapu mondjato yepangelo omudo keshe.

 

LEAVE A REPLY

Please enter your comment!
Please enter your name here