Aaniilonga yomefuta oya geyela Okommissi yawo

0
334

 

WALVISBAY-Aakwati yoohi 1500 mboka ya kala menkanka okuza omasiku 26 ga Septemba oya li ishewe ya hili aantu mOmbaye sho ya gandja omukandayenyeto gawo kUuministeli Waniilonga poshilando shokomunkulofuta. Mbaka oya hala opo ombapila ndjika yi thikithwe kOominista yoshikondo shoka, Erkki Nghimtina oshowo kOmuprima Minista Saara Kuugongelwa Amadhila.

Momukanda nguka, mbaka oya indile opo euvathano ndyoka lyakolekelwe iiwike iyali ya piti li hulithwepo. Euvathano ndika olyali lya kolekwa komahangano ngaka, Confederation of Namibian Fishing Associations, Namibia Seamen and Allied Workers Union, Namibia Food and Allied Workers Union ,Namibia Fishing Industries oshowo Fishermen Union. Shika osha li shaningwa sha landula ekanka lyaali paveta ndyoka lya li poLindili nopOmbaye.

Omupopiliko gwaaniilonga yomomeya, Immanuel Petrus okwa ti yo ka yena we einekelo mUuministeli mbuka, oshoka euvathano ndyoka kalili muuwanawa waaniilonga yomefuta nando.

“Euvathano ndika kalishi lyetu. Olya nayipike onkalo okuyeIeka naasho ya li tango. Tse itatu pula kutya euvathano nali tuulwepo noku ekelwahi ndele tse ota tu lombwele kutya ndika nali ekelwehi nokutuulwapo. Aaniilonga yomomeya oya hala wo okommissi ndjoka haya futwa yaa lundululwe,” osho Petrus iindile.

Omanga inaa ya shaina euvathano ndika aaniilonga yomefuta oya li inaa ya nyanyukilwa oonkalo miilonga yawo mefuta oshowo oondjambi dhawo.Omanyenyeto gawo oga guma  oowili dhiilonga inaa dhi uthwa kutya odhili ngapi mesiku, ofuto yolutaima, oSoondaha noshowo omasiku gomafudho gopashigwana nondjambi molwokulonga uusiku.

Shimwe shiinenenima osho ongushu yokommissi ndjoka aaniilonga haya futwa oku yi yeleka naashoka shuuthwa paveta yaaniilonga mwakwatelwa olutayima, Osoondaha, omafudho gopashigwana nofuto yokulonga uusiku.

Okwa li sha monika kutya omautho giilonga ngaashi ga shangwa moveta yAaniilonga ina ga landulwa  onkene ofuto ndjoka yuuthwa paveta oya futwa aaniilonga mbaka ongo okommissi okuyeleka , ndjika yi futwe pauvathano lyiilonga, oshoka oveta osho tayi utha.

Pauvathano ndyoka lya shainwa otali utha kutya okommissi ndjika otayi futwa pauhandimwe ongo ofuto yokukumika aaniilonga ya longe neitulemo, naandjika otayi talululwa pokati komahangano gaaniilonga naagandji yiilonga.Shika otashi ti otashi vulika aaniilonga yamwe ya kale inaa ya mona okommissi ndjika nenge mboka ye yi mono taya pewa ndjika yomwaalu omushona okuyeleka naandjoka ya li haya taamba nale.

“Oshinima shoka Oshikondo shAaniilonga shina okutseya ooshika kutya tse inatu hala okulongitha oonkondo.Naashika itashi tu thiminike opo tu longithe oonkondo.Ndele tse ota tu ki iyutha koompango nomalandulathano goshilongo shika sigo opethimbo lyontumba. Kapena nando omuntu a konakona kutya  omolwashike twa yi mekanka.Ndele oyendji oyena ashike omaipulo nokutya oshipotha shika kasha li paveta, pehala lyokutala iinima mbyoka yeeta opo tu ninge oshipotha shika,” Petrus a ti.

Okwa ti oshikondo shAaniilonga ina shi geyela omahangano goohi konima sho ngaka gali ga konakonwa  noku monika kutya gamwe ihagi iyutha komautho goveta yaaNiilonga. “Ihe tse sho twayi mekanka oya tokola okutu vulikitha. Tse otwa ningi oshipotha  molwashoka mbaka ina ya longa iilonga yawo.Moshimpungu shoohi kamuna onkalo ombwaanawa yiilonga ngaashi tashi popiwa koshikondo shika sha hala aantu yeshi itaale,” Petrus a ti.

Ngashingeyi okwa indile ombelewa yOmupresident Hage Geingob opo yi katukile Oshikondo shika onkatu molwashoka ndjika anuwa ina yi longa iilonga yayo nawa.

Ngoka eli komutse gwelelo lyOshikondo shika mOmbaye, Getrude Usiku, oye a taamba ombapila yomanyenyeto  nokwa galikana aaniilonga yomomeya opo ya shune kiilonga omanga  omanyenyeto gawo taga kundathanwa naakalelipo yawo oku adha epotokonono lyoshikumungu shika.Aaniilonga oya tindi ya ti yo ota ya ka shuna ashike kiilonga ngele omanyenyeto gawo  ngoka oga yamukulwa mondjila.

Pethimbo ndyoka  oshigwana shaanangeshefa moKuisebmund osha gongele oodola omayovi omulongo naambika oya pewa aakwati yoohi mbaka omagano. Aanangeshefa oya ti aakwati yoohi oyo ha ye ya landa onkene shoka she ya guma otashi gumu woo ongeshefa dhawo.

seamen

LEAVE A REPLY

Please enter your comment!
Please enter your name here