Omahoololo naa ende nawa

0
293

Ovanamibia ovanhu ve hole ombili. Omolwa ombili oyo ili moshilongo tai pangele, omahoololo alushe ohaa kala ena ombili na ohaa ende nawa.

Omolwaashi natango kwe lineekeliwa nokwa teelelwa opo omahoololo ookansela vopaikandjo novomalelo oilando oo taa tameke mongula nao aka ende nawa noku ka kala pambili ngaashi naana sha kala.

Kakele kombili, oyo hai kalekwa po koshiwana nokovanambelewa velile po eameno otwe li neekela notwa tala kutya pomahoololo aa oECN hano oKommissi yomahoololo yaNambia oya tula oikwa noipangifo peenhele, oku kwashilipaleka kutya omahoololo otaa ka enda naanaa ngaashi oshiwana sha teelela.

Eteelelo ololo kutya omahoololo otaa ka ningwa moule wefimbo omo a ufilwa, hano oule wefiku limwe. Shikwao, ovakwashiwana itava ka kala momikweyo dile dile ile ta di ende kashona. She likolelela komafimbo a djako, luhapu omikweyo ohadi ende kashona molwa omashina a nyonauka ile molwa eenhele dokuhoololela ina di patuluka pefimbo, ngaashi naanaa sha ningwa odula ya djako.

Keesenda dilili nakulili ovanhu ova kala momukweyo fiyo omokati lela koufiku shaashi vati efimbo nefimbo omashina ohaa tameke oku enda kashona ile nokuli haa mwena po tashi etifwa komaupyakadi opautekenika. Keenhele dimwe vati ovanambelewa vomahoololo ohava patulula kwasha neenghono. Oshihopaenenwa osenda yokOndangwa Town Council odula ya djako oyo ya ka patuluka konima yo 09h00 nonande ovakwashiwana va meneka nokuuya ponhele opo tuu opo po04h00 yokeengula. Ovanhu vamwe odula ya djako ova kala nokuli in ava hoolola, veli teeka po peesenda davo omolwa onghalo yokweenda kashona.

Omukuluwonale okwa tile “hashiti sheku nyekele ohala oho ende po to fifila”. Omolwaasho twe lineekela kutya neudo eesenda ota di ka patuluka pefimbo ngaashi naanaa sha ufwa novanhu itava ka kala momikweyo dile dile ita di ende molwa omashongo taa etwa koutekenika.

Otu wete kutya efimbo ola li po la wana, na ECN okwa li ena omhito ya wana oku deula ovanambwelewa vaye, eva deulila outekenika nokuva pa eshivo la wana nghene vena okulonga noushina vo Electronic Voting Machine (EVM), ovo opo ashike va tamekele okulongifwa.

Paku tala oushina ava ova wa na ohava endelele shidulife okuhoolola neembapila.

Eshi ota shi talelwa komahoololo oo a li kOshikadjohoololo shaHangwena oko oushina ava va tameka tetetete. Omahoololo oo okwa endele nawa nomavalulo inaa kwata efimbo. Ashike eshi she keuya pomahoololo oshilongo ashishe voo ota va ende kashona.

Kufye nee ovakwashiwana, natu li longe oku lididimika ina tu kala hatu undulafana peenhele domahoololo, noku tukaela ovanambelewa vomahoololo. Ovanambelewa navo ovanhu. Ovanambelewa voECN noshoyo ovanambelewa velile po oveta nelandulafano, yakule ni oshiwana nombili.

Kundana ota halele ashike ova hoololwa omholo. Ou a findana oshiwana oshe ku panda notwa teelela u wanife po omaudeneko ngaashi naanaa we a ninga. Naau nee toka kana, kashina mbudi, nomongula okuna etango.

LEAVE A REPLY

Please enter your comment!
Please enter your name here