Omukalo gwoku pandula aadhani inagu opala –Shikongo ta ti

0
397

 

Windhoek-Omusindani  gwombandi yoshingoli muudhano wAll Africa Games, waanuulema,  Ananias Shikongo, ngoka wo a sindana ombandi yoshingoli puudhano womanyakwa aanuulema po Doha 2015 International Paralympic Committee (IPC) World Championship, oku uvite na yi.

Shikongo oku uvite nayi oshoka okuwete a nyokomwa molwashoka ina pewa epapa lyasimana lyomudhani Omunuulema gwokomumvo pethimbo lyegandjo lyomapapa ngoka koKommissi yOmaudhano yaNamibia.

Okwa ti okumona oombandi ndatu dhoshingoli puudhano wa AAG mpoka wo a teya orekorda muudhano oshinima sha gwana okumu pethitha esimaneko. Onkene Shikongo okwa geela aagandji yiitsa sho yo ya gandja epapa ndyoka komutondoki gwiinano iile , Ruben Gowaseb ongo omusindani gwepapa lyOmudhani dhingi gwokomumvo muudhano mbuka .

Gowaseb okwa sindana ombandi yoshingoli puudhano woSpecial Olympics wa ningililwe koUnited States of America (USA) muAuguste nuumvo. Omumatuki gwomarathon nguka oye wo a ulikwa aadha sha muudhano komumvo nuumvo opamwe nenyakwa lyoongonyo Paulus Ambunda.

Ndele  Shikongo, omutondoki goshinano sho T11, 100m, 200m no 400m kali po poshiithanene shoka oshoka okwa li  kuudhano womanyakwa muuyuni mo Doha pethimbo omapapa taga gandjwa.

“Onda li ndina okusindana epapa lyOmudhani dhingi  gwokOmumvo , ye Reuben okwa li ena oku sindana oshishani shomudhani ngoka aadha sha gwokomumvo. Ngame onda kala inaandi mona nando oosha. Okonyala nookuli ndi tokole ndaa matuke we moQatar, omolwokuuva nayi , ihe omudheuli gwandje okwa kumike ndje ndi tsikile, a ti ‘Iinima yatya ngaaka oha yi ningwa monkalamwenyo.”

Shikongo okwa ti oonkambadhala dhe otadhi pitipo inaadhi yalulwa, nosha fa omuntu to kunu oombuto  momamanya, a gwedhapo a ti shika kasha li nawa ye kaa sindane sho ye ena oku pita oku kadhana muudhano woAAG omanga Gowaseb a li ashike a hiywa no ka li ena okutondoka opo a pite oku ka dhana muudhano wo Special Olympics.

Omutondoki omunuulema nguka okwa hala okumona elunduluko megandjo lyomapapa omumvo tu uka, nokwa indile ngaka ga gandjwe pauyuki.Okwa li wo uulike olukeno nuukwawo wa nankali nomuyogi omukiintu Daniela Lindemeier, ngoka a mono oombandi ndatu dhoshikushu puudhano wo AAG ndele naye pegandjo lyomapapa okwa zipo iikaha yaanasha.

“Ye na ye ina sindana sha poshiithanene shegandjo lyomapapa nuumvo.Aagandji yomapapa oya pumbwa okutala oshinima shika oshoka ota ye tu sitha uunye,” Shikongo uulike a geya.

Omunashipundi gwaagandji yiitsa kaadhani mboka ye na okupewa omapapa Talitha Jario okwa ekelehi omalundilo ngoka a ti okommittee ye ohayi  longitha omukalo goku gandja iitsa kaadhani mboka yi ilongela okupewa iitsa mbyoka shi ikwatelela kwaashoka ya etapo shopombanda pashigwana, pashitopolwa , panenevi oshowo paigwana nenge pomuthika gwopa Olympika. Jario okwa ti nonando oya yalula nokukoneka oombandi dha Shikongo dhopuudhano wa AAG, omasindano ge pomuthika gwenenevi oga talika ko geli pevi okuyeleka nesindano lya Gowaseb ngaashi shuuthwa palandulathano lyegandjo lyomapapa. Okwa ti ishewe omasindano ga Gowaseb oga ndhindhilikwa pomuthika guuyuni naashika osho she mu pethitha esindano okuyeleka nomuthigathani omukwawo mokatopolwa haka.

“Aatondoki oye na okutseya kutya oombandi ihadhi gongelwa molwashoka ihatu tala  kuuwindji  woombandi ndhoka omudhani a gongele puudhano,” Jario a ti.

Shikongo okwa ti ye oku uvitile iilonga ye poDoha nawa shoka shuulike kutya yo ongaadhani oyi ilongekidhila uudhano wOlympika moRio omumvo tu uka. “Otwa pumbwa ashike oku idheula shagwana. Ethigathano moDoha olya li lya kindja”.

Shikongo okwa pandula okommittee yomegumbo yo Paralympic sho ye ya pandula niimaliwa. George Nambala okwa pewa ooN$8 000 molwombandi ye yoshingoli, omanga ye(Shikongo) okwa pewa ooN$6 000. Johanna Benson okwa pewa ooN$4 500 molwombandi ye yoshikushu. “Shika osha ulike  kutya mbaka oyetu pandula molwashoka twa ningile oshilongo shetu. Aanambelewa mbaka oye shishi kutya tse katuna iilonga. Shikongo okwa nyenyetele wo aanambelewa yomaudhano  sho inaa ye ya taamba nesimaneko konima sho yo ya galuka okuza koAAG hoka yeetelele oombandi dha yoolokathana.

Okwa galikana opo aadhani ayehe ya kale haya longwa na yo pomuthika guthike pamwe, unene tuu sho uuvite kutya aadhani yena uulema oya fa inaa ya yalulwa nawa.

Ananias-Shikongo-jpg

LEAVE A REPLY

Please enter your comment!
Please enter your name here