Oshituthi shaDamara kashina ekwatathano nopolitika

0
357

 

OKOMBAHE-Oshituthi shopamithigulukwalo dhaaDamara shoka shaliko omwedhi nguka  pOkombahe  moshitopolwa shErongo inashi talikako ongo oshiningwanima shopapolitika. Ndele shika osho oshiithanene mpoka oludhi nduka lwali talu humitha komeho oohedhi dhalwo oshowo omithigulululwakalo.Oshituthi shika ohashi ningwa omumvo kehe moshiwike shotango sha Novemba.

AaNamibia oyendji oya li yu ulike kutya molwaashoka omalwaala  gongundu United Democratic Front oga faathana naangoka gewiliko lyuukwaniilwa waaDamara, shika otashi vulika kudhiladhilwe kutya oshiithanene shopamuthigululwakalo shika  oshopapolitika.

Ndele nee oshina oku konekiwa kutya elelo lyaaDamara olya kala nomwenyo uule womimvo 40 omanga oUDF ndjoka yili ongundu yopolitika oya dhikwapo omumvo 1989.

Pahapu dhomuperesidente gwo UDF, Apius !Auchab, omuwiliki kehe gwopapolitika ngoka ta mangele oshiithanene shika kongundu yopolitika  okwa pukithwa .Oshoka oshituthi shika  otashi lalakanene okukalekapo oohedhi osho omithigululwakalo dhawo nokudhi pungulila omapipi ta ge ya.

!Auchab ina popya ongo omuperesidende gwo UDF pethimbo lyoshiithanene shika.

Osho omukalondjigilile komazimo agehe goludhi lwaaDamara omilongo (33), konima yoku dhana iituthi yago yopahedhi ya yooloka oha ga ka gongala omumvo kehe pamwe po |Â ǂGomes (Okombahe) okutyapula omithigululwakalo dhawo niinyangadhalwa yopahedhi, oondya, oondjimbo, oondanisa noshowo omusiki  noku dhimbulukwa omapenda gomaludhi agehe, omalumentu nomakiintu ngoka ga ka lala nale. Pethimbo olyo tuu ndyoka oludhi nduka ohalu  hokololelathana ondjokonona , niiningwanima yopandjokonona pakana oshowo momikalo dhilwe okuga gandja kepipi egundjuka moshigwana.

!Auchab sho a popi na Kundana pethimbo lyoshituthi okwa dhenge omuthindo mpoka kutya oshituthi shoka osholudhi lwaantu mboka haya popi elaka ndyoka kutya nee mbaka oye li mongundu yini yopapolitika. Okwa indile wo aaNamibia yi iyageke oku kwatakanitha iituthi yopahedhi noongundu dhopolitika.

“Nguka ogo omuthigululwakalo gwaaDamara. Ito vulu kutya ngame oshilyo shoSWAPO onkene kandina oku kalapo.Iilyo yoSwapo na yo opo yali poshituthi. Kutya nee oya zala omalwaala gongundu yawo ina yi tidhwa po mpaka molwashoka oshituthi kashina sha nopolitika. Tse itatu ningisha nomadhiladhilo gawo,” osho a fatulula.

!Auchab okwa dhimbulutha kutya etumwalaka ndyoka hali gandjwa poshituthi shika olya yooloka kwaandyoka hali gandjwa poshigongi shopapolitka.

Okwa li wo iipula kutya oshike mbela aawiliki yamwe yaaDamara inaa ya holoka poshituthi shika. Oye shi ningi molwashoka yo iilyo yongundu yopolitika yontumba nenge yongandi?

“Inashi pumbwa okukala ngaaka. Omithigululwakalo noohedhi odhina okukala kombanda yuukwashilyo mongundu yopolitika molwashoka ndhika odho hadhi utha uukwatya womuntu omanga nguka inaa hogolola kutya ota ningi oshilyo shongundu yopolitika yinipo.”

Ongomuwiliki ouna okukalapo opo wu taandeleke etumwalaka. Ngoye ekwatathano pokati kepangelo naantu yoye , kashina nee mbudhi kutya ongundu yo ye yopolitika oyinipo.

Kapena oludhi talu ningi oshituthi  nenge talu gongala pwaana aawiliki.. Onkene ouna oku zako kopolitika. Ngame nangame omuwiliki gwopapolitika ndele tango ngame oshilyo sholudhi lwaa Damara ndi itaala momithigululwakalo komeho gopolitika,” osho a  fatulula.

Oshituthi kashina elalakano lyuukumwe , ndele oku ningitha aa Damara ya tseye kutya oshinakugwanithwa shawo oshini pamwe nepangelo.

“Ongoludhi lumwe moNamibia otuna oshinakugwanithwa okukwathela oonkambadhala dhepangelo    no tu na okushininga mewiliko lyaaleli yetu. Omuwiliki ngoka keepo ita vulu okupopya kutya ye okwa longa oshinakugwanithwa she. Omuperesidende Hage Geingob okwe tu shongo nomulandu gwe gwegumbo eNamibia oshowo olugodhi okukondjitha oluhepo nondjala.Ondjodhi ndjika yOmuperesidende oyo ombwaanawa onkene kehe gumwe gwetu okuna okukonga omukalo nkene ye ta kwathele moshinima shika,” osho a ti.

Okwa ti okunetegameno kutya Omuperesidende ota ka ithanwa a kale poshituthi shika monakuyiwa.

“Omuperesidende ota vulu oku hiywa , ota vulu oku ithanwa opo ee a longithe oshituthi shika okupopitha oshigwana.Ndele okushi talela konkalo yongashingeyi  oyendji yomutse itatu ka uvako.

Ota ya ka tya okwa li poshituthi shoka omolwashoka ogoludhi ndoka. Okuyele natango okumu  ithana ngashingeyi ongomuperesidende, ndele pethimbo ali Omuprima Minista okwi ile  koshituthi shika monakuziwa, ndele otwa tegamena kutya ote keya huka pethimbo wo eli omuperesidende gwoshilongo.Shika otashi vulika ngele okwa pewa omayele omawanawa kaaleli yopahedhi.

LEAVE A REPLY

Please enter your comment!
Please enter your name here