Peter ondume yomomufitu: Omahepeko ga tsikila

0
419
Peter Jungle Fighter

 

Omuhepeki gwandje Du Plessis okwa tsikile natango noku hepekitha ndje kiilongithwa ye. Du Plessis okwa li ne holokepo lyafa lyevukule ndyoka lyaana esimaneko lyongushu yomwenyo gwomuntu. Okwa li ena oshipala shepapi, keena naanaa omatako, nomulumentu gwoshipapa sholutu ena oompadhi oonde noombenzi dhopombanda  dha yeluka.Okwa li omuhepeki ngoka a li iilongekidha okugamena omulandu gwaashi ku popilwa gwokatongotongo moshikolonyekwa longo Namibia. Mokutala kwandje Du Plessis okwali  omudhipagi keena eipangelo mwene osho omubalabali ngoka etonde omadhiladhilo nelongo lyomulandu guukommunisi.

Molwashoka olutu lwandje olwa niilalo shaampoka  okwa tokola opo a fike ndje nolusheno nelalakano okuthiminika ndje ndi popye.Sho a vulwa okutala ombinzi okwa lombwele aawilikwa ye kutya na ya tile ndje omeya omatalala oshowo naya  tile ndje omeya opo ndi ze oombinzi, oshoka olutu lwandje olwali talu ziya ombinzi shaampoka.

Konima okwa ka lombwela aantu ye opo ya mangele  ndje koshipundi. Nokonima okwa tula omalusheno kominwe dhandje, nokiikesho yandje, kiilyo yuulumentu oko owala kwa li inaaku tulwa olusheno, esiku ndyoka.

Du Plessis okwa tameke okuhepeka ndje ngaashi shito omanga inaa pula ndje ndi zimine kutya ongame nda teyapo oopaala dholusheno na ishewe kutya oondjembo dhandje onde dhi holeka peni. Na osha fa a li a lundulula omukalo gwe gwokupula a pula ndje ishewe opo ndi koleke kutya ngame oshikulo.

Otashi vululika a li uuvite nawa kutya ngame oshikulo, onkene epulo ndyoka lyoku tya nandi zimine kutya ngaye oshikulo  shili ka lyali we lya pumbiwa. Konima okwa tsikile noku fika ndje nolusheno ndoka lwe etele ndje uuwehame nda kala ashike  ndinolutu  lwafa talu tuulwa koshinima .Onda li ndi uvite okana kwandje kwa kukukuta . Nondali wo ndi uvite ndafa nda hala okusitama ndele inamu za nando olyo eta. Nonando olusheno kalwa li luna oonkondo okuyeleka niikando yotango shono ndali nda fikwa nolusheno.

Nelalakano oku monena omapulo ge omayamukulo Du Plessis ngoka a li a hala oku uva oshili,pethimbo ndika okwa li a thithikile .Opo ohaluka okwa nukako koshipundi a fa okalimba ka haluthwa  a ti ita vulu we okupulakena omahokolol gaashi goshili goshikulo shoSwapo. Okwa lombwele ishewe aayakuli ye yaali opo ya dhenge ndje sigo otandi nyanyuka ngele andola shika otashi vulika okuningwa. Mbaka oya dhengagula ndje sigo onda kanitha oonkondo.

Nando onda kugu muule  kapwali ngoka ta vulu okukwatha ndje oshoka Du Plessis ngoka ha tilika oye a li omuwiliki  gwehala lyokuhepekela oonkwatwa . Ye oye ishewe a li ena uuthemba woku soshimpwiyu kutya onkwatwa otayi dhengwa sigo ya si nenge otayi kalekwa nomwenyo.Omadhengo ngaka oga longo ndje oshilonga kutya omuntu ino dhimbwa shoka wa hokolele omutondi goye oshoka ngele owe mu pe uuyelele uupe nena  shika otashi ke ku etela omadhengo ogendji. Nonando onda hepekwa ngaaka inandi zimina kutya ngame oshikulo nenge kutya ondina iikondjitho.Ashihe shika onde shi thigi miikaha yaahepeki yandje opo ya holole uuyelele mboka.

Konima aatiligane yaali mboka yali pokudhenga ndje oya zipo po otapu ya iilongithwa yegameno yili iyali. Mbaka oya fa ya li yaa na ko nasha nokudhenga , nando Du Plessis eya thiminike opo ya dhenge ndje. Mbaka oya li ya dhenge ndje uuna ya lombwelwa ku Du Plessis. Ihe konima oya ka tameka okudhenga ndje  nonando Du Plessis ine ya lombwela. Oya tameke okupula ndje mpoka pena oondjembo dhandje, oshowo kutya aantu ye thike peni nda dhipaga nkene nda thikile moNamibia. Aahepeki yandje oya li ya kambadhala ondunge kehe yeshi opo andola ya thinemo oshili mungame, oya li wo ya tilitha ndje ndele ina ye shi pondola oku mona mo nando oyo oshili okuza mungame.Ngame kandali monkalo yoku hokololela aatondi yandje iiholekwa. Oshoka ngame onda adhika nale nda tokola okusa niiholekwa yandje.

Du Plessis okwa lombwele aahepeki yandje mboka yaali kutya  naya fike ndje nolusheno noshowo naya tilithe ndje pehala lyokudhenga ndje oshoka ngame onda li tandi zi oombinzi shaampoka ishewe onda li nda zinda olutu aluhe omolwokudhengwa kaatondi yandje.

Nonando oya kala nokudhenga ndje ngaaka kapwali nando ogumwe a pula ndje ndi fatulule kutya kOmbaye, oVenduka, Olindili, Oshaanda nOndangwa oshowo omahala ngoka ndali nda talelepo onda li tandi kongo mo shike. Oshikwawo kapena nando ogumwe a pula ndje nkene ndi imonene okamutse kaNamibia.Osha fa uuyelele mbuka aahepeki yandje ya li inaaye wu pewa, ooshoka aaniilonga yawo yomonanguwi oya ndopa okutseya kutya onda longa iilonga mbyoka omanga inaa ya kwata ndje . Onkene ngame onda tokola kutya itandi popisha  nonda gana kutya shika itandi shipopi otandi si nasho ngele oshapumbiwa.

Onda li handi longo ongame andike  nelongo lyandje miilonga mbika koMoscow olya longekidha ndje oku tseya omikalo ndhoka hadhi longitthwa komutondi oku thina uuyelele monkwatwa yiita.

Onda li nda lesha omambo ogendji kombinga yomikalo ndhoka hadhi longithwa komutondi oku thina oonkwatwa dhawo mondholongo.

Kongulohi aahepeki yandje oya  fala ndje pondje eta ya mangele ndje koopaala dhili mbali . Du Plessis ta lombwele mboka opo ya mange ndje ngaaka kutya otandi thikama nomagulu gandje nomaako ga mangelwa ku yimwe yomoopala ndhoka. Oya mangele othingo yandje nongodhi inaa yi ponda mopaala yimwe opo ndaavule oku kuutumba ngele onda vulwa othika. Muusiku gumwe gwaahepeki yandje okwe ya nokutila ndje omeya omatalala. Shisande nguka okwa tsikile nokutila ndje omeya ga talala noonkondo sigo omokati kuusiku sho a kanapo.

Esiku lyotango lya Mai olya li lya talala noonkondo nomutondi okwa langeke ndje pondje uusiku auhe inaandi zala sha kakele kokambulukweyaa kokohi. Omukwamuhoko omuthipambinzi gwedhina Corporal Smith okwe ya po pehala lyooshisande yaali mboka ya li ya langela ndje ongulohi ndjoka. Omubalabali nguka keena ndunge yasha okwa tsikile okutila ndje omeya omatalala  konyala konima yootundi ndatu kehe. Smith okwa li ena okwi ishi kwomubalabali ngoka iihumbata kuuyuni kwafa kwana esiku lyangula.

Omutalelo gwe guuyuni ogwa li omuhupi nomushona gwa fa ashike oshipala she. Okwa li a fa a shashwa oku itaala kutya omulandu gwokatongotongo kaguna esiku nagu tekapo. Smith okwa li omukwiita ngoka iithanenwa muukwiita nonando kali ena ontseyo yasha kombinga  yoompango dhomiita.

LEAVE A REPLY

Please enter your comment!
Please enter your name here