Ya pandula komakwatho ye ga pewa

0
344

 

ONYAANYA – Aakalimo yatano (5) yaza koosenda dha yoolokathana mOnyaanya oya pandula molwomakwatho ngoka ya pewa kaasahenda.   Gumwe gomwaamboka ya pewa iikulya Annatoria Mateus a zile komukunda Onaaholongo okwa popi olupandu lwe Etitano oshiwike shayi pombelewa ya kansela pOnyaanya pethimbo ta taambako iikulya mbyoka a pewa.

Mateus okwe shi yelitha kutya yo pamwe nooyakwawo mboka taya lumbu nombuto yoHIV/AIDS oha ya hupu nuudhigu oshoka yamwe oha ya ende oondjila oonde yu uka kiipangelo yo ethimbo limwe ohaya nwine omiti dhawo kondjala.

“Tse mboka ta tu lumbu nombuto ndjika katuna uuholameno, no katuna shoka twa tila otwa manguluka okuhokolola omahokololo getu nokugandja uumbangi kutya ota tu lumbu nomukithi nguka,otwa pandula unene komakwatho giikulya ngaka twa pewa omolwaasho hatu gongala moosupport group mono hatu itungu noku paathana omayele nooyakwetu,’ Mateus ta ti ngaaka.

Okwa indile aantu yi ilonge okupandula mpoka ya longelwa uuwanawa yo ya kale haya taambako omakwatho ngoka ya pewa kutya oga kale omashona ge thike peni otaga ningi eyooloko moonkalamwenyo dhawo. Ta tsu omukumo aavu ooyakwawo ya dhiginine epango nomiti dhawo yo ya kale yena oonkalamwenyo dhili nawa , ta ti HIV/AIDS omukithi owala ngaashi omikithi omikwawo nagu taambiweko owala ngaashi guli.

Aakwashigwana mbaka oyali ya pewa iikulya ngaashi okashako kuusila , omweelelo gwoohi,omagadhi gokulya, oosopa oshowo oothewa. Omukwatelikomeho gwo CACOC moshikandjohogololo Abia Nambahu okwa ti oyali ya longekidha ontanda kuyele mu Novomba mono yali ya gongele oshimaliwa opo ya kwathe mboka ta ya lumbu nombuto yo HIV, no kayena omakwatho.

“Moshimaliwa mono twa gongele otwali twa tokola konima sho twa kuutumba pamwe newilikongundu, tse tu tothemo mboka ya pumbwa okukwathelwa, otwa li twa kuthapo oshimaliwa shono twa landa uusila na ayihe mbyoka twa gandja kaantu yetu mboka yeli momagumbo ha ya nu omiti yo  yaana oonzo dhokwiimonena oshimaliwa,” Nambahu ta ti ngaaka.

Nambahu ta ti shino oshikando oshitiyali sho taya kwathele mboka taya lumbu noHIV, konima sho yali ya kwathele mo2011 mboka ha ya yi komakonakono sho ye ya pele iimaliwa yolefa yo ya kale ta ya ka tala omiti dhawo. Ta gwedhapo kutya otaya kala ta ya yambidhidha aantu mboka ya pumbwa esiloshimpwiyu nokashona hoka yenapo.

Food1

LEAVE A REPLY

Please enter your comment!
Please enter your name here