Yandja ohonde manga ino ya mefudo

0
410

 

WINDHOEK  – “Yandja ohonde manga ino ya!”

Eli, eingido lehangano lowina loNamBTS melongelo kumwe nehangano loundjolowele mounyuni melongikido loshikonga shoivike ihetatu okuudifa ko oshiwana shi yandje ohonde paliyambo manga inatu fika poivilo yomatango manene molwa omhumbwe yohonde sha etifwa koiponga ihapu ya tameka

Ouyelele owa yandjwa komunambelewa wehangano lokwoongela ohonde moNamibia NamBTS Natangue Muafangejo. Muafangejo okwa  endulula edi da popiwa komukalelipo woWorld Health Organisation (WHO) ehangano loundjolowele mounyuni moNamibia Dr Quazi Monirul Islam  eshi a tonga petameko loshikonga shoivike ihetatu sha tameka moNamibia pehovelo lohani ei. Okwa holola kutya, neudo inava hala oku uda omunhu a fya shaashi pehe na ohonde. Omapekaapeko ehangano loWHO okwa yelifa kutya, ovakainhu vahapu mo ilongo yomounyuni ova fya pefimbo lokudala molwomhumbwe yohonde, vamwe va tika pefimbo leteelelo,  ilo okonima yokumona okaana.

Okwa weda po kutya oiponga oya tameka nale noipangelo ihapu hai pumbwa unene ohonde, oyo moitukulwa Zambezi, Kavango, oipangelo aishe monooli fiyo okoshitukulwa shaKunene. Ta weda po vali kutya, ohonde ihai landwa, oi na ashike oku dja momunhu okuxupifa keshe ou te i pumbwa ngee a tandwa, amona okaana. Nande omwaalu waavo hava yandje ohonde alushe moNamibia ou li koshi yovanhu omayovi atatu, oNamBITS oya hala ovaliyambi ve dule omayovi atano 5,000 va yandje ohonde paife.  Okwa fatulula kutya omuyandji wohonde keshe oha kufwa  ohonde yeemilita 450 poshikando nomunhu ou oku na okutwikila nokulya lwoikando itatu mefiku keshe opo konima yomafiku 56 a dule vali okuyandja ohonde.

Okwa shiva keshe ou e na eedula 16, e na ondjudo yeekilograma didule 50, e na oukolele a yandje ohonde peenhele da longikidwa owina manga inaku fikwa poivilo yomatango manene. Ehangano NamBTS ola faneka pa kale pa ongelwa ohonde  yeeunits 5,000. Ohonde ei otai monika ashike ngeenge oilyo ikulu oiyandji yohonde moshilongo  naava va pe ta va yandje ohonde ei ihai landwa ile i dje pamwe pe li li ndele oi na ashike okudja momunhu pamukalo weliyambo.

Ohonde oyo to yandje otai xupifa eemwenyo daavo ve i pumbwa ngee va dja moiponga yomatuwa ile imwe I li li, ovamwali konima yokumona ounona, ovanhu va dja koitandelo ve na omikifi domaludi ilo va pumbwa ku twikwa oilyo, ovo ve na omukifi wokankela.” Mokuyandja  ohonde alushe konima yomafiku 56 oto xupifa eemwenyo davahapu”. Muafangejo ta dimbulukifa noku ifana oshiwana shi yandjele ohonde koitukulwa yokonooli.

LEAVE A REPLY

Please enter your comment!
Please enter your name here