Aalumbi nombuto yoHIV nayo oya simana moshigwana

0
436

 

ONIIPA  –  Olundji moshigwana aantu mboka taya lumbu nombuto yoHIV oya talikako ya fa yaashi aantu, no ha ya kala ya tongolwa yo kaa ye niwe nayo.

Metiyali oshiwike shika aakalimo yomOshikoto oya li ya dhimbulukwa esiku lyoAIDS muuyuni, mono oyendji yali ya holoka poshipangelo pOnandjokwe yo ya topolelathane uuyelele mboka wa pumbiwa koshigwana.

Omukuluntu gwoshipangelo shaNandjokwe Igor Petrov okwa li a popi kutya esiku lyoAIDS muuyuni ohali dhimbulukwa aluhe mesiku lyotango lyaDesemba omumvo kehe, mono aakuuyuni ha ya gongala yo ta ya paathana uuyelele noku dhimbulukwa mboka ya kanitha oomwenyo dhawo omolwa OHIV/AIDS, nomikalo woo ndhoka tadhi vulu Oku etwapo opo ku shunithwe pevi etaandelo lyomukithi ogo tuu nguka.

Petrov ta ti omishangwa ndhoka dha etwa poshitaafula kehangano lyo UNAIDS otagu ulike kutya oshipangelo shaNandjokwe osho shimwe shina omwaalu gwaakulukadhi mboka taya lumbu nombuto yoHIV/AIDS guli pombanda, nokwa holola kutya maakulukadhi mboka yena omapunda yeli yane gumwe gomuyo okwa kwatwa kombuto oyo tuu ndjika.

Ta gwedhapo kutya aavu mboka taya lumbu nombuto ndjoka naya iyuthe komalombwelo ngoka ta ya pewa koondohotola , yo ta ya dhiginine omiti dhawo ye dhinwe ngaashi shu uthwa.  Okwa ti woo kutya aantu mboka ta ya lumbu nombuto yoHIV oya simana moshigwana, na ya kwathelwe shi thike pamwe naamboka kaa ye na ombuto, na yo oyena omalalakano monkalamwenyo, noondjodhi dhawo. Ta indile aavu mboka kaaya ningilwe omahepeko ashike ya kalwe nayo nawa yo ta ya uvithwa ohole.

Veikko Nembia gumwe gomwaamboka taya lumbu nombuto yoHIV/AIDS no kena nande uumbanda washa. Nembia okuna oomvula o 40 nokwa yambukile kOshaandjela kOshitayi. Okwa hokolola kutya ota lumbu nombuto ndjika uule womimvo 13 ngashingeyi, nokuwete kutya  omiti dhe odhe mu kwatha opo a kale ena uukolele ngaashi aantu ooyakwawo.

Nembia ta ti nonande ta lumbu nombuto ndjoka inashi mu imba okulonga iilonga ye, okweshi taambako owala ngaashika , nokwa kala ta tsuwa omukumo kaapopepi na ye. “Okulumba nombuto ka shishi ehulilo lyuuyuni , ngele to ihumbata nawa ombuto ndjoka yili mungoye nayo otayi ihumbata nawa, oshilwitho dhingi mokukondjitha omukithi nguka okwiiyutha komalombwelo gaapangi, nokunwa oopela dhoye ngaashi wedhi shangelwa ngoye to ikaleke kokule niihulo sha pitilila,” Nembia ta gwedhapo ngaaka.

 

LEAVE A REPLY

Please enter your comment!
Please enter your name here