Aanamukunda mOhaimbanda ota ya si enota

0
342

WINHOEK – Aakalimo mboka ya gamena momukunda Ohaimbanda oya geya, ta ya nyenyeta enota sho omboola yawo ya ningi omwedhi nasha ya teka. Ngashingeyi oha ya ende iinano iile noonkondo mokukonga omeya gayela. Omeya ngoka ge li popepi omunoko gowala, ina ga yela nando.

Sho shi uvitithe nayi aakalimo yaOhaimbanda osho shoka kutya oya li ya lopota kaanambelewa yomeya pOnankali, ashike sigo ongashingeyi ka puna omunambelewa a thikama aka tale wo kutya oshike tashi vulu okuningwapo.

Aanamagumbo yomOhaimbada oya ti wo kutya aanona yosikola yamwe ina ya shanga omakonaakono nuumvo omolwa ashike ompumbwe yomeya. Yamwe yomaanona oya li ya alukwa omolwa omeya ngaka gomunoko.

“Otwa li twa lopota oshinima shika shenota kombelewa yetu yomeya kOnankali mesiku etiyali lyalandula sho omboola ya teka ndele sigo onena ndjika ina tu mona ekwatho nando olya sha nokapuna shoka shaningwa po,” Patrick Hainghono, gumwe gwomomukunda osho a lombwele Kundana.

Kundana sho ali a dhengele kombelelwa yomOnankali ta pula ngoka eli oKontrol Administrative Officer, Basson Keeja, okwa li a lombwelwa kutya okuli mokafudho, no ka pwali ngoka ena uuyelele kutya omboola ndjika ota yi pangelwa uunake nonando oya ti olopota ndjoka kutya omboola yoHaimbanda kaayina omeya oyeyi mona.

Omukunda Ohaimbada moka aantu ta ya mono iihuna kokunwa omeya galuudha oyi li moshikandjohogololo Onkankolo moshitopolwa Oshikoto.

Shika oshali shalandula sho omboola yawo ndjoka yali ha ya teke omeya gayela ya teka omwedhi gwaziko, ano muKotoba. Ompumbwe ndjika yomeya oyali ya geyitha aakwashigwana momukunda moka mboka yeli natango kaayena ombili no ya ti ombelelwa yawo yomeya ndyoka yili mOnankali itayi longo pamukalo, no ta yi hepeke aakwashigwana.

Hainghono okwa popi nomuthindo ta ti uunona wosikola owo ngaa unene wa tulwa pomutenya konkalamwenyo ndjika.

“Onda ninga nonkambadhala opo ndi zeko nomeya ngoka aantu ha ya nu paife sho omboola yateka, ndi ulikile aanambelelwa pOnankali ndele sigo onena ndjika kapuna nando ekwatho lya sha,” Hainghono ta ti ngaaka, ye tagwedha po ishewe kutya opo yamone omeya gayela oyena oku enda ookilometa dhaadha po 10, shoka natango tashi lolodha aakwashigwana.

LEAVE A REPLY

Please enter your comment!
Please enter your name here