A dipawa kolusheno manga ali ta te eshina

0
355

ONGWEDIVA –Omukalimo womolukanda laOlympia moWindhoek, oshivike sha djako okwa tjokwa kolusheno nokufya manga a li ta dana eshina.

Oshiningwanima eshi sha lopotelwa opolifi yaWanaheda osha ningilwa mondingosho yedina Blue Bar, ili kolukanda la Goreangab mo Windhoek.

Kouyelele oo wa yandjwa ku Inspector Slogan Matheus wokoshikondo shOpolifi yaNamibia shi lile po okuyandja ouyelele, omulumenhu wedina Festus Iyambo weedula 30, okwali ta kufa oimaliwa ikukutu meshina olo a li ta te, eshi a kwatwa kolusheno nokufya.

Otaku fekelwa kutya Iyambo okwa yaamena koshitenda osho shi kwetele po oshina, nokoshitenda oko okwa enda ongodi yolusheno. Kakushiwike naanaa ngeenge olusheno olo lemukwata ola dja meshina ile ola diilila moshitenda.

Ashike ota ku hokololwa kutya omulumenhu ou okwa li te lishendje yee mwene eshi a tula oshimaliwa shefo shoN$20 meshina nelalakano ngeno a monemo oimaliwa ikukutu ye a twikile okudana navakwao.

Mupya munene, eshi ngeno a ka kufa mo oimailwa ikukutu okwa tjokwa nokufila opo.

Matheus ta ti olusheno olo la ya mobar omo mwa fila Iyambo ola la li la tulwa mo shi heli paveta shaashi eengodi odo da twala olusheno mombaa omo oda felwa omukangha, wa tauluka opate, nokufufilwa.

Matheus okwati opolifi oya patulula oshibofa shokukonaakona efyo la etifwa kolusheno. Ta ti omakonaakono ngeenge a pu, oshidjemo ota shika tuminwa komhangu ika tokole ngeenge opali pena ouhasha wonhumba oo wa etifa efyo laIyambo.

Ngee opa monika ouhasha otapa ka patululwa oshibofa shedipao liheshi loshiningilawina.

LEAVE A REPLY

Please enter your comment!
Please enter your name here