Natu tale nawa nkene iimaliwa yeyokomeho tayi longithwa mOshikoto

0
395

 

Oshitopolwa Oshikoto osha lukilwa etale lyopaushitwe Otjikoto ndyoka lya simana omolwa oonzo dhiikwamina mbyoka tayi adhika mulyo. Oshitopolwa shika osha pewa ooN$604,1 dhoomilliona opo shi humithekomeho onkalamwenyo yaantu yamo.Etale lya Guinas, otali adhika konyala ookilometa omilongo ntano muuninginino mbugantu waandyoka lyOtjikoto, konyala okuya nokugalukila kondjila onene yopokati kOshivelo nOshomeya.Olundji oyendji ihaya itulamo oku ka talelapo ehala ndika no haya hogolola okupita pwaandyoka lyOtjikoto nonando Guinas olili muule lyo ishewe olina omutalelo omwaanawa li vule Otjikoto.

Konyala ooN$136, 6 oomilliona dhiimaliwa yeyokomeho odha nuninwa okutunga olutenda kuuministeli Wiilonga nIiyenditho.Oshikondo osho tuu shika otashi longitha ooN$20 okutula oteya kondjila yookilometa 23 pokati kOnayena nOkankolo. Oshikondo otashi longitha wo oo N$16,4 oomilliona mokutunga ondjila yongalama pokati kUukwiyuushona nOmuntele, oshowo oo N$3 oomilliona okutunga ondjila yoomanya pokati kOnanke nOmuthiya.

Oondjila dhilwe tadhi ka tungwa moshitopolwa shika ongaashi ndjoka yookilometa 24, 4 pokati kOnayena nOnankali, yookilometa 32 yoomanya pokati kOshapapa nEpumbu oshowo okuopalekulula ondjila yoshinano shookilometa 110 okuza mOmuthiya sigo omOngwediva.

Okulanda evi oko wo oshinima sha simana koshikondo shOmavi moshitopolwa shika, sho shika sha tulapo konyala ooN$101 oomilliona omolwokulanda evi.

Oshikondo shUunamapya osha tulapo ooN$22 oomilliona okutungapo omunino omushona gwomeya gwiitopolwa yokomikunda moshitopolwa shika. Oshikondo shika otashi longitha wo iimaliwa okuwilika nawa egameno lyomakuti, okutula miilonga omawiliko gomakuti miikaha yoshigwana, okutunga uupangelo wiinamwenyo, okuhwepopeka uundjolowele wiimuna, okutunga oodama oshowo omithima moka tamu kala hamu nuwa kiinamwenyo.

Oshikondo sheyokomeho lyokomikunda Niilando osha tulapo ooN$54, 4 oomilliona okuopaleka evi pOniipa, Oshivelo, nOnayena oshowo okutulapo omayakulo geyogopeko moshitopolwa.

Oshikondo shomidhingoloko otashi tungu ombelewa dhasho dhopashitopolwa nomagumbo gaanambelewa yasho, omahala gokunwina iiyamakuti oshowo okutula omalugumbo komahala ga gamenwa gopaushitwe moshitopolwa. Omolwiilonga ayihe mbika oshikondo otashi longitha ooN$17, 4 oomilliona.

Oshikondo shUuyuki otashi longo opo shi opaleke oohofa dhopevi moshitopolwa okulongitha oo N$5, 85 oomilliona. Omanga shoka shOonkondo niikwankondo tashi ka longitha ooN$6, 4 oomilliona okutema omalusheno miitopolwa yaShikoto mbyoka hayi tema nuulehita natango. Oshikondo shUukwiita osha tulapo ooN$9, 85 oomilliona, okutunga osikola yuukwiita pOshivelo.

Oshikondo shUundjolowele otashi longitha oo N$35, 3 oomilliona momayakulo guukalinawa oyindji yaambika tayi ka longithwa yooN$20 oomilliona monaasalesa yOnandjokwe omanga mbyoka ya hupako tayi ka longithwa  momandiki guukalinawa wopetameko oshowo muuklinika.

Oshikondo shElongo otashi longitha ooN$44 oomilliona okutunga oseko pOmuntele, oprimasikola pEhangano nopoGuinas, nokuopaleka oseko ya Nehale.

Omutengenekothaneko gwOshikondo shEgameno nepopilo lyoshilongo gwoo N$53 oomilliona otagu, longithwa unene sho ooN$42, 3 oomilliona tadhi tungithwa oombelewa oonene dhoshikondo shika moshitopolwa shika. Omanga mbyoka ya hupako otayi longithwa oku opaleka oosasiona dhopolisi oshowo okutungila aapolisi  omahala gokulala moshitopolwa.

Oshikoto-Lake

 

LEAVE A REPLY

Please enter your comment!
Please enter your name here