Omalenga ga nyengwa okupotokonona ondjokana yamwene gwomukunda

0
394

 

OTJIHAU -Elelo lyopamuthigululwakalo mUukolonkadhi olya nyengwa oku vulikitha mwene gwomukunda gwaTjihau moshitopolwa shUukolonkadhi ngoka anuwa ta monitha omukadhi iihuna note mu tidha megumbo.

Etiyali lyoshiwike shika aahokanathani mbaka oyali ya holoka komeho gaaleli yopamithigululwakalo nelalakano oku adha ekandulepo lyomukundu mondjokana yawo.

Shika anuwa osha landula sho omusaane ngoka edhina lye li shiwike kuKundana a thingonona noku ehameka omuholike gwe, nelalakano oku mu tidha mo megumbo. Omusaane ngoka eli omukwiita koRuacana anuwa okwa kala ta kambadhala oku lekela mo omukadhi megumbo lyawo lyomiti ethimbo nuule ashike sho a nyengwa okwa kambadhale nee oku mu ehameka.

Oshiwike sha zi ko, omalenga anuwa oga ithana oshigongi nelalakano okuuva sho tashi inyenge mondjokana moka, konima sho omukadhi a lopota onkalo yaandjawo kelelo lyopamuthigululwakalo. Oshigongi anuwa ina shi ka hula we nawa oshoka omusaane okwa nipuka mo momutumba a fulakata, ye ta tukagula omukadhi kumwe nomalenga.

Oshigongi shika anuwa osha li shi ithana ko omusamane kokamba yaakwiita koRuacana nelalakano okuuva oshita kwaaheye, inashi tompola sha.

Ota ku hokololwa kutya mbaka, omusaane, omunamivo 46 nomukadhi gwoomvula 36, oya kala owala mondjokana uule woomvula mbali netata.

Sho a yi moonkundathana na Kundana omuhokanwa nguka okwa ti omusamane gwe nguka aluhe osho hii humbata ngaaka, iha vulu oku kundatha nwa naye.  Otaku ti, omusaane iha sile egumbo lye oshimpwiyu, nokwa ningi ethimbo nokumuhepeka kolutu nokomwenyo, ta thiminike noku mu tidha mo megumbo lyawo ndyoka ya dhika po sho ya hokana. Anuwa oha ti, omukulukadhi na ze mo megumbo ndyoka lyi li meyana lyomukwao. Omukadhi ngoka ena okanona kokamati komvula yimwe anuwa ota thiminikwa a shune kaandjawo kUukwambi opo omusaane a ete omukiintu gulwe megumbo. Omukiintu ngoka naye anuwa oha zi pomukunda mpoka.

Omusaane pauye mwene okwa lombwele Kundana kutya omukadhi kena omikalo, ohemu kodhilile noonkondo, kena oshili, iha vulu iilonga ye ishewe oku hole oluhoko.

“Ngame noho haye nda li nda hala okuhokana, otwa ka hokana owala sho iinkumbi yetu yayi mo moshinina nokukumagidha ndje opo ondjokana iye komeho.

“Otwa kambadhala oku konga ekwatho kaahungimwenyo mboka ya kumagidha ndje kutya ina ndi kutha omuntu omwenyo, oshihwepo opo ondjokana yi teke. Ashike omukiintu ngoka ina hala okuza mo megumbo lyandje. Ota ti shila omudhimba ashike ta gu ka tutumbwa mo megumbo. Ngaye shi ndili ngeyi onda tameka nale nomalongekidho goku mu henga paveta,” omusaane ta ti ngaaka.

“Elelo nande lya kambadhala, okuvulikitha omukwiita ngoka naye eli woo mwene gwomukunda olya nyengwa nolya mono kutya ke shi omuntu gwoku kumagidwa nande e li omuleli nomugameni gwoshigwana.” Ndhika odha kolekwa kuMalakia Shoombe, ngoka eli amushanga melelo lyUukolonkadhi. Nande omukulukadhi nguka a kala nokuhengana iikando oyindji yee ta galukile ngaa koondjokana, omahepeko oga kala owala taga tsikile onkene elelo olya tala nkene sha simana okugamena aakwashigwana mboka taa thindilwa pevi. Malakaia ta gwedha po kutya, olya lombwela omukukukdhi a tsikile nokukonga ekwatho palwe pwi ili oshoka lyo kali na we sho tali vulu okuninga po.

LEAVE A REPLY

Please enter your comment!
Please enter your name here