Omathaneko gandje okuyakula aantu yandje

0
352

 

Windhoek-Otashi kala shotango mondjokonona  yomaudhano moNamibia sho omudhani mospana yopashigwana yetanga lyokoompadhi a yi mopolitika.

Omudhani gwomokati moBrave Warriors, Congo Hindjou ngashingeyi oku na ompito okuninga Meya gwondoolopa yaKahandja. Shika osha landula omahogololo giitopolwa niilando ngoka ga liko oshiwike shayi moka ongundu yoSwapo ya mono iipundi itano yomiipundi iheyali melelo lyOkahandja.

Omudhanitanga nguka eshiwike nawa kaaholi yuudhano wetanga lyokoompadhi okwa za puuhupi ihe shika inashi mu imba opo iitungile uukwatya wesimano ongomunangeshefa konima yoku dhana nawa etanga lyokoompadhi pethimbo lyomimvo dhe dhokudhana etanga ndyoka moshilongo.

Sho Kundana a popi na ye konima sho kwa tseyithwa kutya ongundu yoSwapo ndjoka a kalelapo oya mono iipundi itano yomwiiheyali melelo lyOkahandja, Hindjou ngoka eli  konyala kombanda yomusholondondo gwaahogololwa okwa li a nyanyukwa, nokwa pe aalanduli ye omayele kutya: “Itaala mungoye mwene, longa nuudhiginini noto ke shi pondola monkalamwenyo”

Hindjou ngoka ena ontseyo ya nkene aadhanitanga haya mono iihuna moshilongo, okwa kumagidha aadhanitanga yopethimbo ndika opo ya kale aa ishonopeki noku lalakana ya adhe omalalakano gawo monkalamwenyo.

“Oshidhigu komudhanitanga omuNamibia  oku ya mopolitika, ihe ngame onda kala nda tala nawa koondjodhi dhandje nomathaneko gandje , goku yakula noku kwatha aantu yandje okupitila momahala ga yooloka. Onkene onda hala okupandula Aakahandja mboka yu ulike einekelo mu ngame sho ya pendje ompito ndjika opo ndiya yakule,” Hindjou a ti.

“Onda hala oku etamo elunduluko moshigwana shandje oshowo okuhwepopeka onkalamwenyo yaantu yandje.Ngame onda valelwa mOkahandja nongashingeyi onda pewa ompito opo ndi yakule aantu yandje.Otandi uvaneke kutya otandi ka longa ngaashika tandi vulu opo ndi hwepopeke onkalamwenyo yaantu yomomukunda aguhe nguka gwaKahandja

“Kombinga yuudhano otandi ka konga oompito opo ndi opalekithe omahala gokudhanena opo ngaka goopalekululwe, tse tu vule okukala tuna omahala omawanawa taga vulu okudhanenwa omaudhano ngaashi ekopi lyo the Namibian Newspaper Cup, nenge omaudhano goliha. Okahandja ondoolopa yili pokati ndele iinima ayihe mbika ohayi pitililepo ashike ondoolopa ndjika. Onkene omathaneko ogo okuhwepopeka onkalo ndjika,”osho a ti

LEAVE A REPLY

Please enter your comment!
Please enter your name here