Oongundu dhompilameno dha longo nuuhethi

0
266

Iizemo yomahogololo oshiwike shayi oya ulike kutya oongundu dhompilameno odha hethipala.Moshilongo shuudemokoli woongundu odhindji oompilameno odhina oshinakugwanithwa shoku konakona iilonga yelelo lyaantu. Kokutya odho dha fa oongoloneya yiithikamena tadhi tala nawa nkene aantu taya lelwa nokuwilikwa. Oshowo okusoshimpwiyu kutya omawi gaawilikwa itaga pwipwikilwapo kopolitika yiinima yaana shilonga.

Okugandja uusama kepangelo oshowo kongundu tayi pangele ha yo iilonga yoompilameno. Oompilameno kadhililepo ashike oku kudhila shampa ashike tadhi kudhile.

Oshinakugwanithwa shadho osho oku kala aagameni,mboka ha ya kundathana nongundu ta yi pangele  okutya:”otu uviteko monkalo moka mu li kombinga yoshinima shika,ndele nee omwa dhiladhila tuu okushi longa nomukalo nguka,ngoka tse tu wete tagu ka longa muuwanawa waantu.Nenge oku dhimbulutha ongundu ndjoka kutya otayi longitha oonkondo dha yo dhoku wilika papuko.

Ahawe shika hasho hashi ningwa muka,moka oongundu dhompilameno dha fa hadhi tungwapo kaantu mboka yaa na ombili,ye yi yonenwa kongundu ompangeli nenge ye na elalakano oku fala komeho omalalakano gopaumwene nenge gomuhoko gwawo.

Oshilanduli shaashika ngaashi twe shi mono momahogololo gopaitopolwa niilando ngoka galiko oshiwike shayi osho okulonga nuunkundi kwoongundu dhompilameno. Ongundu ta yi pangele, Swapo na yi tumbalekwe sho ya koneke uunkundi woongundu dhompilameno. Oya mono uunkundi mbuka yo nokulonga nuudhiginini naashika oshe yi etele esindano enene, ya fa ashike omuntu a kombo pehala lyontumbu sho ya sindana miikandjohogololo 121. Ngashingeyi Swapo okuna omawi ogendji niipundi oyindji megumbo etiyali lyoparliamende. Ngaashi shili pethimbo ndika  oongundu dhompilameno otadhi vulu ashike oku ya megumbo ndyoka kohenda nokomwenyo omwaanawa gwa Swapo ngele ye okwa hogolola oku shininga.

Swapo ina thiminikwa oku shininga ngele ina hala.Eeno otashi vulika oku etamo iilyo yoompilameno  megumbo etiyali lyopashigwana omolwuudemokoli oshowo ewiliko lyayela newaanawa. Ndele nee oku kwatelamo iilyo yoompilameno  moNational Council, nonando mbaka ina ye shi ilongela , shika osho ekondjitho lyehalo lyaahogololi. Oshoka ngele iikandjohogololo oya li ya hala iilyo yoompilameno yi ye koNational Council nena ando mbaka oya hogolola ookandidate dhompilameno. Ndele nee pethimbo ndika mbaka ina ye shi ninga. Oya hogolola ookandidate dhoSwapo.Onkene omolwashike iilyo yompilameno yi na okutumwa koNational Council molwuudemokoli nonando mbaka ina ya hogololwa kaantu oku ya tuma kegumbo ndyoka. Oshi li ngaa oshipu ngaaka?

Iizemo otayi ulike wo kutya omakankameno goompilameno kagena omidhi dhomuule. Kokutya shoka oompilameno dha thikamenapo otashi vulika shaali kokule naashoka ongundu tayi pangele ya thikamenapo.Epulo oondika kutya oompilameno elaka lini epe dhina ndyoka lya yooloka ngiika kwaandyoka lyongundu tayi pangele?.

Onkene osho ethimbo ngashingeyi opo oompilameno dhi ye poshitaafula noku tendulula noku shangulula omakankameno goku kalapo kwadho. Ongundu yoDTA oya longa hwepo , ngaashi ashike ya ningile momahogololo gomumvo gwayi.Ndjika oya kuthapo iipundi yongundu yompilameno  yoRDP, ndjoka okushi talela miizemo yomahogololo ngaka sha fa tashi ulike kutya ndjika oyi li muudhigu.Oyili muudhigu oshoka okandidate yayo yimwe ndjoka yali yi na oku hogololwa oya li ya thigipo ongundu ndjoka noku joina Swapo kuna ashike oowili dhimwe dhimwe opo aakwashigwana ya ye momahogololo. Edhina lye olya li natango kokambapila komahogololo nonande nguka kali we oshilyo sho ngundu ndjoka.

Opwa li ishewe uunye mokati kaahogololi oku ka hogolola kutya omiitopolwa nenge miilando.Shika nasho etumwalaka lya tuminwa oongundu dhopolitika , unene tuu nkene ndhika dha ningi iikonga yomahogololo miikandjohogololo ya yooloka.Oongundu odha longa nuuhethi, oshoka aahogololi kaya li hwama oku ya ya ka hogolole.Oshayela kutya pomahala mpoka aahogololi ya li ya hwama oya yi  ya ka hogolole momiyalu ominene ongundu ndjoka yo ya hala. Moshitopolwa shOmaheke okandidate yi ithikamena oya sindana nomawi ogendji.Ngaashi ashike shaningwa koSwapo moshikandjohogololo sha Windhoek East , shoka sha li miikaha yoRDP.

 

LEAVE A REPLY

Please enter your comment!
Please enter your name here