Peter ondume yomomufitu: Esiku 2 lya Mai 1986

0
395
Peter Jungle Fighter

Ongula onene yesiku ndyoka Smith okwe ya ishewe neyemele lyuudha omeya omatalala unene, nokwe ga tile ndje, omanga inaa mangulula ndje ko kopaala hoka a li a mangela ndje. Okwa lombwelendje ndi kale omutumba pevi. Onda li natango nda mangwa niiketanga oshowo nelyenge komagulu. Sho a ti nandi kuutumbe okwa tameke ta thanga ndje nokudhenga ndje komutse noongonyo ye ta thangagula ndje olutu aluhe nomabutsa. Sho a hepeke ndje noku dhenga ndje ngaaka okwa li ta ti okwa hala nda sa oshoka otandi mana po owala ethimbo lye.

Olutu lwandje pethimbo ndyoka olwa li lwa kukuta nolwa talala onge manya, nopethimbo limwe kandali tandi vulu oku yelutha omagulu gandje oshoka olutu lwandje aluhe olwa li lwa zinda noonkondo. Naashika osha pendje omukumo opo ndi kale metokolo lyandje kutya nando ondi dhipagwe itandi popi nando oshimwe shomiiholekwa yandje.

Olutu lwandje aluhe olwa li talu tapata ongo talu pipo. Kungame onkalamwenyo yandje kaya li yi na ongushu yasha okuyeleka nelyenge lyaakwathi yandje miilonga yandje yomonanguwi okuza tuu nkene ndi ile moNamibia. Lwopotundi ontiheyali Smith okwa fala ndje kongulu yomahepekelo opo ndi ka pulapulwe ishewe ku Du Plessis. Nguka okwa gandja elombwelo  ku Smith opo a mangele ndje koshipundi shoshitenda. Opo ihe ye okwa kala ta pula ndje  omapulo ogo tuu ngoka. Nokwa li a londodha ndje kutya ota ka dhipaga ndje ngele onde mu yamukula ngaashi shito. Konima mbaka yaali oya thigipo ondunda ndjoka ya thigi ndje ongame awike nda mangelwa moshipundi.

Du Plessi sho a galuka okwa etelele ooshisande yaali mboka ya tisikile omahepeko. No inaa ya tya sha mbaka oya hedha popepi nangame noku tegelela ishewe elombwelo okuza ku Du Plessis. Pethimbo ndyoka kandali nda mangwa komeho no nda mono nkene iipala ya wo ya lulilwa unene. Du Plessis okwa kutha ondokumende mokandjato ke okashona. Ndjika okwe yi longitha okupula omapulo ga faathana naangoka a kala ha pula ndje esiku kehe.

Sho a lesha mondokumende ndjika okuza petameko okwa tameke ti ipuku komutse ngiika

molwashoka okwa li inaa panda omapulo ngoka.Ohaluka Du Plessis okwa thikama nokuhila omakutsi gandje  omanga inaa tala ndje momeho no inaa tya nando osha.

Konima okwa ka lombwela ndje kutya ye ina ilongekidha we okupulakena ondoya ndjoka tandi mu yamukula nenge ndjoka nda tsikile noku mu yamukula omasiku gapiti okuza tuu kesiku ndyoka nda kwatelwe. Okwa tsikile ta hokolola kutya ye omukwiita ngoka a gana okudhipaga aatondi ye. Onkene ye ita ka kwatakwata nokumanapo ethimbo lye nokupululula omapulo ngoka. Konima ishewe okwa pula ndje ngele ngame Omukriste nenge Omukommunisi. Onde mu yamukula kutya ngame Omukriste. Okwa pula ishewe kutya ngele onda hala oku ya megulu nenge omoheli uuna nda si. Ngame onda zimine kutya eeno onda hala oku ya megulu. Opo Du Plessis okwa lombwele aakwiita yaali opo ya hedhe popepi ya ya dhipage ndje. Du Plessis okwa pula ndje ishewe ndi hokolole mpoka nda holeka oondjembo dha ndje, omadhina gaamboka ya kwatha ndje moku pandje iikulya, okupandje omulalo nosho tuu. Ngame onde mu yamukula nda ti onda li niimaliwa ya gwana okulanda iikulya, onkene kandali nda pumbwa iikulya okuza kaakwashigwana. Onde mu lombwele wo kutya ngame onda li handi lala melundu oshoka onda li ndina uumbanda wokulala momagumbo gaantu. Omayamukulo ngaka oga geeyeke Du Plessis noonkondo, oshoka okwa nukile ndje noku kwata ndje pothingo, onga ngoka a hala a okuyambula ndje po poshipundi mpoka ndali nda mangelwa.

Okwa lombwele iilongithwa ye yi dhenge ndje. Mbika no ya dhengagula ndje nayi, ngame onda li nda kugu moluuwehame nekudhilo ndika olya li lya uvika mewangandjo lya talala pokufu. Aakwiita mbaka oya tsikile okudhenga ndje olutu aluhe osigo onda tameke itandi kungu no kandali tandi vulu we okufudha. Shika osha thiminike Du Plessis opo a mweneke mbaka yaa ha dhenge ndje we manga. Sho aakwiita ya dhenge ndje nondu uvu uuwehame waashi ku tumbulwa, Du Plessis okwa li ta yolo a nyanyukwa noku kumika aahepeki yandje opo ya tsikile noku dhengagula ndje.  “Mudhengeni, mudhengeni” sigo onda li ndafa nda sa kaandi uvite we uuwehame womadhengo ngoka nonda mwena itaandi kugu wee.

“Oshikulo ngoye showala, onde ku lombwele  kutya ngame omudhipagi, ndele owa fa to dhiladhila kutya ngame otandi fundju”osho Du Plessis iigidha a thitapo. Opo ihe okwa pula ngele ondi shi Mbulunganga, Zulu, Dimo, na Kafindeko, ngame onda yamukula kutya ondi ya shi. Ayehe mbaka oya li aagandji malombwelo aakuluntu moPLAN.

Du Plessis okwa tsikile oku lombwela ndje kutya ngame “oshikulo’ oshowo omutondi gwe ngo ena okudhipagwa. Okwa ti “Otandi ku pe ompito ya hugunina opo wu pendje omayamukulo gomondjila komapulo gandje”. Opo ihe okwa endulula omapulo ge omakulu ngoka gali ga nyolwa mokambapila okashona. Ngame onde mu pe omayakulo ngoka nda kala noku mu yamukula okuza tuu nkene a tamekele okupula ndje.

Molwashoka ina panda okwa lombwele aantu ye kutya naya tule ndje pevi oshipala sha tala mombanda, taya siikile ndje noshilapi yo taya tile ndje omeya. Onda li ndu uvite nda fa tandi si omeya oshoka kandali tandi vulu okufudha, utya onda li tandi fudhilemo omeya sigo oosho nda kanitha eiyuvo ishewe.

Konima onde ki iyadha nda lala kepilangi lili mu yimwe yomootenda nda siikilwa nekumbatha edhigu. Omukwiita gumwe okwa li a kuutumba posheelo shotenda a tya ondjembo moshikaha she. Onda li ndaana oonkondo nando odha sha, kutya ngaka kandali tandi vulu oku inyengitha omaako gandje. Onda kala nda lala motenda ndjoka sigo etango tali ningine. Smith okwa etele ndje omahini nuupambu uyali womboloto. Okwa ti nandi lye ndele ngame onda tindi. Konima okwe ki ithana omukiintu ngwiyaka a li ta panga ndje moshipangelo. Sho nguka eya okwa tameke ta pendje omboloto ndjoka niikaha ye, a thiminike ndje ndi yi nine pamwe nomahini.

Shika oshe eta opo ndi tameke oku kunga konyala uule wominute 30. Konima yokukunga onda kodhodhokwa ndele nee onda li ndu uvite ondjala ngame ndaana oonkondo. Kongulohi Smith okwa fala ndje ishewe poopaala hoka mangela ndje ishewe, nongaashi shito okwa tameke okutila ndje omeya omatalala. Okwa dhimbulutha ndje ishewe kutya ota ka dhipaga ndje ngele itandi longele kumwe na ye. Okwa indile ndje opo ndi popye oshili oshoka yo oya li ya loloka oku uva ‘ondoya yandje.” Uusiku mboka Smith okwi ile pungame iikando iyali oku tala ngele ngame onda sa nenge ondi nomwenyo. Ye ta tsikile okutila ndje omeya omatalala. Ngaashi shito okwa galuka ishewe potundi ontine koongulasha oku mangulula ndje mo noku kuutumbika ndje pevi, anuwa opo ndi vululukwe po. Ndika olyo ethimbo nda li handi longitha okukothapo omanga aahepeki yandje yooDu Plessis inaa ye ya potundi ontiheyali okutsikila nomapulo gawo oshowo nomahepeko gawo okuthina uuyelele mungame andola.

LEAVE A REPLY

Please enter your comment!
Please enter your name here