Young Chiefs ota tsu nondhikwa

0
295

 

UUKWANGULA-Konima sho yali ya tameke nokulonga nuudhiginini muudhano woMTC Namibia Premier League osipana yo Young Chiefs otayi nana nondatu pethimbo ndika no ya pumbwa oku ninga po sha ngele oya hala oku dhana moliha ndjika omumvo gwokatanga tagu landula.

Osipana ndjoka oyo ayike yakalela po oshitopolwa shokoNooli moliha yopombanda moshilongo oya tula mo ongela yokonima sho ta yi kanitha omaudhano pondje nomegumbo.

Ehuuliloshiwike lyaziko osipana ndjika oyali ashike ye shi pondola okulikola oshitsa shimwe pehala lyiitsa ihamano, konima sho yali ya dhana shi thike pamwe nosipana yaUNAM yimwe muyimwe pokapale pUukwangula.

Young Chiefs okwa li a tulwa menongelo kosipana yoTura Magic muudhano woSoondaha yazako moka yali ya dhengwa 2-1 nokuundulila Young Chiefs pevi lyomusholondondo gwoliha.

Tura Magic okwali a tulamo okoola muule woominute omulongo dhe dhingoloko lyotango na oyali yi ishunamo ishewe oominute ooshona okuya pokafudhepo, noku eta eyalulo petimbo lyokafudhepo 2-0

Nando Young Chiefs okwali a zi pokafudhepo apupyala Tura Magic okwali iilongekidha na okwali evule Young Chiefs oonkondo na olwindji okwali afa oye eli megumbo.

Omukwati gwo Young Chiefs okwali iipyakidhila mokoola oshoka Tura Magic okwali ta pulwa mokoola, nando  Amatheki okwali a tulamo okoola methimbo oku uka kominute 80 shika ka kwali sha gwana.

Aayambidhidhi yoYoung Chiefs oyali yi ikwata pomutima sho Tura Magic ali apewa opelendi mominute dha hugunina ashike oomwenyo dhawo odhali dha talalelwa sho omukwati gwawo ali anuka shokambishi noku kwatamo opelendi, noku eta eyalulo lya hugunina 2-1 muuwanawa wo Tura magic.

Aayambidhidhi yoYoung Chiefs oha ya holoka kokapale momwaalu omushona  naashika otashi dhenge osipana ndjika pomutima oshoka oya pumbwa eyambidhidho lyaatali uuna taya dhana megumbo.

Oosipana dhili ndatu dhoka tadhi ke ya dhili kondambo yomusholondondo gwolila otadhi ka lalekwamo moliha, onkene Young Chiefs okuwa pumbwa a longe nuudhiginini opo iitopolwa yokoNooli yi kale ya kalelwapo moliha ndjika.

LEAVE A REPLY

Please enter your comment!
Please enter your name here