Ethigathano lyaatungilutu yo Ours GYM

0
281

 

 

ONDANGWA – Ehulilo shiwike lya ziko Ours GYM oyali ya longekidha ethigathano lyaatungilutu mono yali ya kutha ombinga noku tala enyankwadhingi mokutunga olutu. Ethigathano ndika olyali lya  ningilwa mEkamuti mOndangwa.

Omuunganeki gwethigathano ndino ngono naye ali omutungilutu nonande ali a hulithapo shika kuyele nuumvo molwaasho a hala a kale omudhengingonyo Hedison Nghipondoka , a tseyika nawa Bulelo okwa yelitha kutya oyali ya longekidha ethigathano ndika okuhanganitha aatungilutu moshitopolwa shaShana yo ya tale ngele oyena ngaa eitulemo mokutunga omalutu.

“Omaudhano oga simana unene maagundjuka naa shino ohashi gandja ompito ombwaanawa kuyo ya topolelathane uunongo mboka yena, yo ya hangane nayakwawo, otwa tokola tu unganeke ethigathano ndika lyaatungilutu opo tu tale omutungilutudhingi mo Ours GYM, ye a kakalelpo Ours GYM methigathano ndyoka lya tegelelwa li ka kaleko kuyele omumvo ta guya,” Bulelo ta ti ngaaka.

Aatungilutu oyali ya yi momathigathano goonkatu dha yoolokathana, heavy weight oshowo middle weight. Obed Yuyi a yambukile kOngwediva oye omutungilutudhingi  mo Ours GYM nuumvo. Yuyi  okwali a sindana ekopi lyenyakwa dhingi nokwali a zalekwa ombandi.

Leonard Nuuyoma oshowo Chama Chama oyali nayo ya sindanapo gamwe gomomasindano methigathano ndika. Bulelo okwa yelitha kutya okwa  thigipo  uutungilutu kuyele nuumvo nonande ta ti okwa hala a dheulile aagundjuka oshinima shokutunga omalutu. Ta uvaneke kutya ota ya kala ta ya unganeke ethigathano ndika lyokutunga omalutu omumvo kehe mOshana, yo aagundjuka ya kale yena omalutu gena uukolele nuundjolowele.

Ethigathano ndino olyali lya kwashilipalekwa kEkamuti, Ondangwa Town Council oshowo Freedom Pharmacy. Ta pandula ke yambidhidho ndyoka Ours GYM a pewa opo a vule a longekidhe uudhano mbuka ta ti ka shali oshipu.

Bulelo ta indile aagundjuka aamati naakadhona ye ya wayimine mokutunga omalutu, yo ya kale taya holoka komadheulo ngoka haga kalako esiku kehe pEkamuti. “ Shino otashi kwathele omalutu getu ga ka le ga ndjanga ethimbo kehe , tse tu yande omavu ngoka haga holoka ngele omuntu iho pe olutu lwoye omadhewo ga gwana, tu tungeni omalutu ga kale gena uukolele,” Bulelo ta gwedhapo ngaaka.

 

 

LEAVE A REPLY

Please enter your comment!
Please enter your name here