Nghilalulwa okuna omatokolo gokuhumitha komeho Omuthiya

0
524

 

 

OMUTHIYA –Omuhogololwa meya gondoolopa yaMuthiya, Toivo Nghilalulwa, okwa ti okuna omathaneko omanene mokuyambulapo oshowo oku fala eyokomeho mondoolopa ndjoka. Nghilalulwa okwa landula Hiskiel Nanyeni ngono oye a li ta lele noku wilika elelo lyondoolopa ndjoka.

Nghilalulwa okwa popi  ndhika mEtitano lya yi konima sho a taambako oshipundi shuumeya wondoolopa yaMuthiya. Meya omupe   okwa ti ota tala ombinga koshikumungu shokwaahena omalukalwa moshigwana, ta ti okwa hala opo aantu ya kale yi imonena omalukalwa gawo yoyene.

“Ondu uvite etumba moku kala ndi inekelelwa oshinakugwanithwa shika komapepe gandje opo ndi yakule oshigwana noku kandulapo wo oompumbwe dhasho, ondi inekela kutya ondjodhi yo 2030 ota tu yi adha ngele tse aaNamibia otwi imanga kumwe tunombili nena neliko lyoshilongo otali humu nawa komeho,” Nghilalulwa ta ti ngaaka.

Meya gwaMuthiya ngoka opo a ganithilwa moshilonga oye omulongi paithano nonande a kala oshilyo mewiliko lyondoolopa oomvula dha piti. Okwa uvaneke ta ka gwanithapo oshilonga she ye a longe pamwe  naangoka ali nale meya gondoolopa ndjoka.

Okwa gwedhapo kutya ota kambadhala a longe pamwe nookansela dhondoolopa moku kandulapo gamwe gomomashongo ngoka ga taalela oshigwana. Nghilalulwa okwa ti gamwe gomomashongo ongaashi onkalo yokwaana omagumbo noshowo omahala gokuhiila ga ninga ondilo oshowo galwe ngoka ta ge ya tsakaneke.

“Otandi ka kala tandi ningi iigongi naakwashigwana olundji oshoka onda hogololwa ndi kalelepo oshigwana, iigongi otayi ka kala tayi ningwa komahala ga yoolokathana meni oshowo kondje yondoolopa opo tu kwata kanithe oshigwana pamwe nelelo lyondoolopa, sho shi gandje ompito kaakwashigwana ya kale noku gandja omaiyuvo nomathaneko gawo ngoka ya hala ga etwe mondoolopa,” Nghilalulwa ta gwedhapo ngaaka.

Nghilalulwa ta tsikileko ati ota ya ka tula eigidho lya ngoloneya gwaShikoto miilonga opo ya kale yena endiki lyiigongi mondoolopa mono tamu kala tamu gongalelwa uuna pena iigongi oshowo iituthi. Ta ti otaka longa nawa pamwe nookansela dhe, yo ya kale aluhe yena ombili.

Katrina Uusiku okwa hogololwa a ninge omupeha meya omanga Beata Nashongo a ulikwa a kale omunashipundi melelo lyondoolopa, Heskiel Nanyeni, Joseph Kakungha, Susan Uukongo na Enos Shipahu oya hogololwa ya kale ookansela dhondoolopa .

LEAVE A REPLY

Please enter your comment!
Please enter your name here