Nkene elunduluko mombepo tali ku gumu

0
285

Omuloka gwa tokelwa moNamibia oshowo onkalo yoluteni nuukukutu mboka tau dhenge evi lyOmapenda pethimbo ndika  owa li shimwe shomiikundathanwa poshigongi kombinga yonkalo yombepo,sha hulile omasiku ngaka moParis sha Fransa.

Minista gwoShikondo shOmidhiingoloko, Pohamba Shifeta okwa li a dhimbulutha aakwashigongi kutya oshapumbiwa opo pu longwe neitulemo okushonopeka omalwithi galuudha ngoka haga tuminwa mombepo kiilongo ayihe muuyuni.

Shifeta okwa ti ishewe kakele koku shonopeka omalwithi ngoka, iilongo mbyoka yaa na oonzo dha gwana opo yi shonopeke uuwindji womalwithi ngaka oya pumbwa oku kwathwa pashimaliwa opo yi vule okushonopeka omalwithi ngoka, ogo taga eta elunduluko monkalo yombepo.

Pethimbo ndika Namibia okwa lola nale uululu welunduluko monkalo yombepo, nonande enenevi Africa iha li nyateke unene ewangandjo nolwithi lwa luudha okuyeleka niilongo yilwe muuyuni. Utya Africa  oha tumu ashike olwithi lwooperesenda ndatu lolwithi muuyuni mewangandjo. Omanga Namibia pauyemwene olwithi ndoka lwaluudha ha tumu mombepo olushuushuka, ihe elunduluko lyonkalo yombepo ndyoka, lyeetwa komalwithi taga zi kiilongo yilwe nokomanenevi galwe ogi iwetikile molupe lwoshikukuta ihaa shi fudhapo we ethimbo, oshowo omvula ha yi loko inaa yi gwana nenge ta yi loko ta yi nuka nuka.

Onkalo ndjika oya tegelelwa yi ka geye unene monakuyiwa unene tuu okushitalela monkalo yEvi lYomapenda ndyoka lya nika uukukutu nale pashito. Onkalo otayi ka nayipala sho onkalo yuupyu nuutalala tayi ka londa nenge tayi ka gwa pevi. Shifeta okwa ti onkalo ndjika ota yi ka guma egameno lyokukala niikulya oshowo nomeya ga gwanena aantu niinamwenyo,oshikondo shiikulya oshililepo ooperesenda omilongo 70  dhiilongomwa ayihe yuunamapya moshilongo” Shifeta osho a lombwele oshigongi shoko Paris.

Elunduluko monkalo yombepo oshowo epupyalo lyuuyuni omatumbulo omadhigu okuuvikako . Ihe okuga fatulula momupopyo gwesiku kehe shika otashi ti.Aantu miilongo muuyuni otaya tumine omalwithi noomuku oombwinayi mewangandjo , ngaashi omalwithi goofabulika, omalwithi goohaiweleka nenge omashina gokudhiga olusheno, omalwithi giiyenditho, omalwithi gomashina gokolutenda, omalwithi goonelomba , omalwithi gooskepa sho tadhi fike omahooli, omalwithi gomahooli ngoka haga kala taga fikwa ethimbo alihe uuna aalongi yomahooli taya pombo omahooli muukweyo womahooli miilongo iiteki yomahooli. Agehe ngaka ogo nee ga gongala mewangandjo muule mo noku yonagula eyalelo nongushu yombepo mombanda.[Oshilanduli sheyonuko ndika ongaashi ashike wuli mondunda ya hwama omulilo to kambadhala okufudha.] Onkalo yuuyuni kombinga yomathimbo gomumvo ndjoka twa igilila otayi lunduluka. Shito otwi igilila omathimbo gomumvo, haga landulathana naanaa ngaashi ashike etango hali piti kuuzilo etali ningine kuuninginino esiku kehe.Ihe ngashingeyi omathimbo gomumvo oga piyaganekwa kiikwalwithi mbika kutya ngaaka omvula oha yi loko  kwa toka nenge ethimbo limwe oyo ngaa ihaa yi ya we ngaashi edhina lyayo. Iitopolwa yimwe muuyuni mbyoka ya li ya talala otayi pupyala.Yilwe mbyoka ya kala kohi yiikangwa yomeya omimvo otayi pupyala yo iikangwa mbika tayi hengumuka.Oshilanduli shehengumuko ndika osho eitumbo lyomeya gefuta ndyoka tali uka pombanda, naashika otashi fala mekanepo neningino kohi yomeya yoontuntu momafuta oshowo iilando kominkulofuta komanenevi agehe.

Oontuntu omayovi ndhoka kwa tilika dhika ninwepo kefuta uuna lya yeluka molwelunduluko lyonkalo yombepo ongaashi ndhoka dhili pOndjila onene yetango ndjoka ha yi ithanwa Equator.Ndhika otadhi adhika mefuta Lyamwena[Pacific Ocean] oshowo efuta lyamwena lyopokati popepi nondjila yetango ya Equator , dho ndhika odho ngaashi Micronesia, Melanesia, Nauru noshowo dhilwe odhindji , moka mwakala aakuuyuni omimvo dhomathele haya hupu paushitwe moku kwata oohi oshowo oku ipalutha niikulya yomomidhingoloko dhawo.

Opo Namibia a longe noshinima shelunduluko monkalo yombepo okwa pumbwa oshimaliwa shooN$30 oobilliona oshowo eilongekidho lyomukwashigwana kehe oku etapo elunduluko munkene tse ha tu mwenya esiku kehe.Iimaliwa mbika oya pumbiwa  okupalamena omashongo niiyimbi  moonkambadhala okukondeka eyonuko monkalo yombepo. Oya pumbiwa okudhikapo omalutu ngoka taga ungaunga nelunduluko lyonkalo yombepo oshowo okulongitha uuteknologi uupe mboka wu na ombili nomudhingoloko oshowo nombepo mewangandjo lya Namibia nolyuuyuni.

Onkene oshinima shoku lundulula nkene tatu mwenya mekwatathano nelunduluko lyombepo kashishi ashike oshinakugwanithwa shaNamibia ndele oshinakugwanithwa shandje noshoye.Ngele iihauto yetu otayi luudhike ombepo nolwithi okuza ko “ekzoza”, natu endeni koombasikela ngele ta tu yi kiilonga pamukalo nguka iiyeti yolwithi otwe yi ngambeka kashona. Shika shimwe  ashike shomiiholelwa, mokati koyindji yindji mbyoka tayi ngambeke eindjipalo lyomalwithi mewangandjo lyetu. Shika osha pumbwa oku endelelwapo omanga kuyele.

LEAVE A REPLY

Please enter your comment!
Please enter your name here