Peter ondume yomomufitu: Esiku etitatu 3 Mai1986

0
362
Peter Jungle Fighter

 

Mesiku etitatu Du Plessis okwe ya lwopotundi 11 eende pamwe nomutiligane  ngoka a li hwepo noku na omikalo omihwepo. Omulumentu nguka okwe ya ku ngame nokwa popitha ndje mOshiingilisa omanga inaa konakona olutu lwandje ndoka lwali lwa zinda,lwo oluna iilalo .Okwa pula ndje nkene ndi uvite omanga inaa indila ndje ndi longele kumwe nepangelo nenge naahepeki yandje.Omanga a li pu ngame okwa ithana Du Plessis opo a fale ndje mu yimwe yomootenda opo a ka tsikile okupulapula ndje. Onda uvu nkene omutiligane nguka ta nyenyeta mOshimbulu kutya omolwashike nda dhengelwa ngaaka. Ihe manga Du Plessis inaa thigapo otenda okwa londodha ndje opo ndi gandje elongelokumwe lyandje,nokwa ti nandi popye oshili, oshoka ye kali a panda shoka ndali nde mu hokololele omasiku gapiti.

Du Plessis okwa thigi ndjepo ongame awike pwaana nando omuntu ngoka a kalela ndje. Ihe  nando ongawo ngame onda li natango nda mangwa nomalyenge osho wo onda li miiketanga.

Omutiligane ngoka eetwa ku Du Plessis okwa ka galuka ashike konima yowili yimwe. Okwa li a zala omutsuhu omuluudhe noongaku oontokele. Okweende pamwe naDice oku mu tolokela ngele pamwe okwa li itaandi vulu okulandula nawa .Omanga inaa patulula okampunda ke okwa pula ndje ngele onda pumbwa okupangwa, molwashoka onda li tandi ulike nda nkundipala. Ngame onda komona ashike komutse no inaandi ya ewi. Omulumentu nguka okwa ka lombwela ndje kutya ngame onkwatwa yomiita nonda pumbwa okuyamukula omapulo agehe ta ka pula, tandi shi ningi mondjila.

Okwa kutha omusholondondo gwomapulo ngoka konyala ga faathana ashike naangoka nda pulilwe ku Du Plessis nooyakwawo. Okwa pula ndje uukwatya wandje, mpoka nda valelwa, uuna nda ninga oshilyo shoSWAPO,elongo lyandje, ontseyo  yandje yomiita, aantu yangapi nda dhipaga okuza nkene nda ningile oshilyo shoSwapo, kutya mbaka oyo oolye, ishewe ookomanda dhandje odho dhini, omahala geni moka nda kondjela oshowo kutya onda li tandi longo shike pethimbo nda kwatwa.

Okwa pula ndje omadhina gaantu mboka ya kwatha oku edhilila ndje, okupalutha ndje omahala ngoka nda talelapo nkene ndi ile moshilongo, na onda li handi inyenge ngiini  okuza ke hala limwe okuya ke hala ekwawo. Okwa li wo a hala okuuva kutya iilwitho yandje onde yi holeka peni. Okwa li a hala okuuva mpoka aakwiita yoPLAN ha ya holama, oshowo mboka ha ye ya pe iikulya. Ishewe okwa li hala okuuva ngele ngame ogumwe gwaamboka ya mbomopo oopaala dholusheno. Kutya openi nda holeke iitopitha noomboma. Oshowo kutya onda li handi ende ngiini okushuna koAngola. Oshowo okwa pula ndje ishewe omapulo galwe omashona. Ngaka omapulo gafaathana ashike naangoka ngame ndali nda pulwa ku Du Plessis nooyakwawo yalwe.

Konima yoku mu yamukula ngaashi ashike nda kala noku yamukula, ngaashi nda yamukulile nale, okwa tala ndje momeho uuvite nayi. Ohaluka okwa thikama po ta ti, ‘ondi shiwete kutya omolwashike wa dhengagulwa ngaaka’.  Molwashoka ye kali itaala okudhenga oonkwatwa dhiita, okwa tameke okulwa iita yomomadhiladhilo, a tili tha ndje neso oshowo nomahepeko gaashi okutumbulwa, ngele onda tsikile oku yamukula omapulo ngoka nomayamukulo goshito.

Konima okwa ka tameka okufika ndje nuusekeleta oshowo a thingonona okwaako kwandje nomakutsi gandje nondjahi. Ohaluka uuwanawa we nombepo ombwanawa ye oya kanapo. Omanga inaa thiga ndje po okwa tuula po uumbapila mboka a li shanga a ti ye ita vulu okuhumbata iifundja. Okwa uvanekele ndje kutya ota ka galuka opo ee a longithe ndje, ndele nkene a yile ina ka galuka we. Ndyoka olyo lya li etalelo po lye lya hugunina.

Smith okwa etele ndje iikulya yapya pamwe niihape, uupambu uyali womboloto onduudhe, okakopi komahini, okwa londodha kutya otaya ka kutha mo oshili mungame konima.

Du Plessis nooshisande yaali aatiligane oye keya potundi 16h00. Oya adha ndje nda kuutumba motenda, pwaana ngoka ta takamitha ndje. Oshinima shika kasha li sha pandika ku Du Plessis. Okwa ithana Smith noku mu londodha kutya oshinima shoka inashi endululwa we nando esiku limwe shoku thiga ndje inaandi tonatelwa molwashoka ngame oshikulo shanika oshiponga.

Okwa lombwele ndje ndi mu landule mehala lyokuhepekelwa. Opo ihe okwa lombwele ooyakwawo mboka yaali ya mangele ndje koshipundi yo  ishewe eta ya tile ndje omeya omatalala, omanga inaa tameka okutilitha ndje neso ngele onda tsikile okumu hokololela ondoya ndjoka nda li  nde mu hokololele nale.

“Owu li ngashingeyi miikaha yaatondi noku na mpoka to ka hupila. Ngoye owu na ashike okulonga ngaashi tandi ku lombwele, ngele hasho ngoye ito ka kuutumba koshipundi osho tuu shoka ishewe, oshoka ngame otandi ke ku dhipaga, ngoye oshikulo showalawala. Ngoye kuna we nando esiku to ka shuna koSWAPO hoka wa kala nokudhipaga aantu yaana ondjo,” osho Du Plessis a ti.

Omanga ta popi ayihe mbika okwa li ta thitokonona omakutsi gandje ye ta hili omafufu gandje inaa ga opalekwa. Ohaluka Du Plessis okwa etha ndje opo a ka yamukule ongodhi mombelewa ye. Pokathimbo hoka Atjimbanga ngoka iile a kwathe Du Plessis mokutoloka Oshiwambo okwa tameke ta lombwele ndje kutya ye na ye okwa li omukwiita goPLAN a kwatelelwe molugodhi ethimbo lyapiti. Okwa lombwele ndje kutya okwa kala ta longo naakwiita yaSouth Africa okukondjitha SWAPO ngoka a hala okweeta Uukommunisi, unene tuu aaRussia naaCuba mboka ya li ya hala okuyugako oshilongo.

Ihe Atjimbanga okwa ndopa okulesha omadhiladhilo gandje molwashoka sho a tsikile nonkambadhala okulundulula ndje ina mona kutya ina ndi mu tala moshipala. Utya ngame onda kala ndatala pevi nomaako gandje ge li pokati komagulu gandje. Kandali ndi itula mo mwaashoka a li ta  hokolola, molwashoka onda li nde mu tala omutondi gwandje ngaashi ashike Du Plessis naahepeki ooyakwawo.

Omadhengo, omafiko nolusheno oshowo omahepeko galwe gopamadhiladhilo ina ga vula okulundulula etokolo lyandje kutya ngele otandi si ondina okusa noshili oshowo niiholekwa yandje, opo ndaa tule iilonga yekondjelomanguluko moshiponga. Pethimbo ndyoka kandali ndi ilongekidha oku opalela omutondi gwandje. Onkalo yandje oya li yomukondjelimanguluko ngoka a li iilongekidhila eso omolwa ekondjo lina uuyuki. Onda li ndina euveko lya mbwalangandja mokutala uuyuni nomolwashika ngame onda li ndina elalakano enene ndyoka te kondjele no ndali ndi ilongekidha oku li gandjela omwenyo gwandje ngele osha li sha pumbiwa.

Du Plessis sho a galuka okwa pula ndje ndi mu hokololele shoka ngame nda hala oku mu lombwela. Okwa ti ishewe ye okwa vulwa okupula ndje omapulo ngoka inaandi yamukula nawa. Onda kala nda tala mevi tandi ipula kutya otandi tameke peni noku mu yamukula. Onda li ndi shishi kutya onde mu lombwele shike ye ita ka hupitha ndje momahepeko, onkene onda mwena ashike.

Konima Du Plessis okwa thikama “Oto dhiladhila kutya ngame ondili mpaka okuhepeka ethimbo lyandje noshikulo ngoye.” Osho iigidha newi lyomuule. Ihe sho nde mu lombwele kutya kandishi shoka ndina oku mu hokololela, okwa lombwele ooshisande ye yaali opo ya longe ndje oshilongwa. Oya dhenge ndje ya fa itaaya dhenge omunamwenyo. Oya tsikile omadhengo sigo onda tameke tandi kungu. Sho Du Plessis a mono tandi kungu onkungo yili mumwe niikulya nombinzi okwa mweneke iilongithwa ye yi ethe okudhenga ndje. Onda li tandi zi ombinzi olutu aluhe, naashika osha thiminike Du Plessis iithane ondohotola opo yi konakone ndje.

Oambulance yaakwiita oya fala ndje koshipangelo shaShakati moka nda thanekwa oshowo nda pangwa. Kongulohi yesiku ndyoka ondohotola oya galulile ndje kokamba nopwaana ohapu yasha. Pethimbo ndyoka ka ya li ya manga ndje komeho, onkene onda li nda vulu okumona omudhingoloko  gwoshipangelo oshowo aapangi, yamwe yomwaamboka ya li ya opaleke iilalo yandje.

Omupangi gumwe okonyala a lile sho a mono nkene nda ehamekwa, nokwa gandja uusama komakakunya ngoka haga hepeke aantu yaana ondjo. Ina pula ndje ngele ngame omukwiita goSWAPO, ihe okwa li ena olukeno nangame. Onda li nda hala andola onda li ndi mu shi. Sho nda galulilwa mokamba Smith okwa tula ndje pooha dhotenda mpoka eke etela ndje oshithima, uubiskiti nokoothiwa. Konima yokulya nguka okwa fala ndje popaala mpoka handi lala uusiku, a mangele omagulu gandje, omaako nothingo yandje mopaala nokutila ndje omeya omatalala, ngaashi sha kala omukalondjigilile.

Esiku ndyoka Smith okwe ya okutila ndje omeya mokati kuusiku nokwa thanga ndje momagulu noongaku. Osha fa a li ha nyanyudhwa mokuthanga oshikulo showalawala, unene tuu sho kaapwali nando ogumwe te mu pe uusama moku ninga ngaaka. Lwopotundi ontintano koongula, Smith okwe ya oku mangulula ndje. Esiku ndyoka okwa kuutumbike ndje koshipundi shoplastika lwopoombelewa dhaDu Plessis, omanga inaa ka etela ndje okoothiwa yaana osuuka nuumbiskiti.

LEAVE A REPLY

Please enter your comment!
Please enter your name here