Aagundjuka mOnayena otaya ka kundathana ehumokomeho

0
272

 

Windhoek –Aagundjuka mOnayena otaya gongala ehuliloshiwike ndika okukundathana omathaneko geyokomeho moshikandjohogololo shawo.

Ndele nee mbaka oya ti oshigongi shika itashi kalwa ashike kaaNayena oyo ayeke. Oshoka yo oyi ilongekidha okutaamba aagundjuka yalwe yaza kiikandjohogololo yilwe moshilongo “mboka ta ye ya oku tu ulukila iitalendi yawo, oshowo okufala komeho ehumokomeho lyoshikandjohogololo shika oshowo oku inyanyudha nokwiikutha uuza,’ osho omunashipundi gwolutu lwaagundjuka yaNayena Martin Antindi ati.

Oshigongi shika tashi kalako omasiku 18 sigo 20 Desemba otashi ningilwa moSeko yopombanda ya Nehale. Kakele koonkundathana dhomuule ndhoka tadhi ka ningwa poshigongi shoka, mpaka otapa ka kala wo omauliko giilongomwa yaanangeshefa, omauliko guunkulungu womusiki, otonamende yetanga lyokoompadhi oshowo omathigathano gomukadhona Kakunawe moNayena.

Oshikandjohogololo shaNayena osha tengenekwa shina aagundjuka ye thike lwopaagundjuka omayovi gatatu, ihe oshigongi shika osha tegelela aagundjuka yomwaalu ogundji okuza kiikandjohogololo yilwe okukala poshigongi shika shotango okuningwa mOnayena.

Antindi okwa ti aagundjuka mOnayena oya kala yaa uvite ombili nomalongekidho ga kala haga ningwa kewiliko lyaagundjuka lyOshikoto, onkene shika osho sheya thiminike opo ya longekidhe oshiithanene shawo moshikandjohogololo. Ihe nando oshi li ngawo ewilikopitithi lyoshitopolwa olya gandja oodola omayovi gaali molwomalongekidho goshigongi shika. Naashika Antindi okwa ti okwe shi pandula unene.

“Edhiladhilo olye yapo omolwa emweno nokathilu kenyenye hoka aagundjuka yaNayena ya kala noku idhidhimikila, sho pwa li ihaapa ningwa iinyangadhalwa yawo , ye yi longekidha yoyene , okuyi longekidhila  aagundjuka, nelalakano oku ya galula monkalo nomo maihumbato omawinayi ngaashi ngoka gokunwa oshowo galwe inaa ga hokiwa koshigwana.Olundji otwa kala ashike twi ikwatelela komauliko ngoka haga longekidhwa pashitopolwa, ihe otwa kala tu uvite kutya shoka tse twa kala twa hala shi ningwe ihashi ningwa,onkene otwa tokola opo tu longekidhe oshiningwanima shetu yene moshikandjohogololo shetu,”  Antindi a ti.

Shaangoka a sindanapo epapa lyomukadhona Kakunawe gwaNayena , nguka ota kala omukalelipo gwaagundjuka aaNayena.Ota kala a tegelelwa oku ka talelapo omanongelo okugandja iipopiwa tayi kumike aanasikola moshikandjohogololo oshowo oku kwatha moonkambadhala dhoku kwatha aantu mboka ya kala yeethiwa noya dhimbiwa monakuziwa moshilongo.

“Etumwalaka lyandje kaagundjuka ayehe moNamibia oondika kutya yo oyena okukala uupathi nenge taya tala nawa iinima moshilongo, oshowo oye na oku kambadhala ya totepo oompito dhawo yene okukwathela epangelo miita yokukondjitha oluhepo nokwaaniilonga  molwashoka shika oshinakugwanithwa shuukumwe,”Antindi a ti.

Antindi okwa ti uudhano wetanga lyokoompadhi  owo auke tau ka dhanwa manga uule womasiku ngoka gatatu.Omaishangitho goospana dhomomikunda otaga ningwa nale. Ospana ndjoka tayi sindana otayi ka pewa ooN$1,500 omanga ontiyali otayi pewa oodola N$1,000 ontintatu ooN$700, omiyalu ndhika omishona okudhi yeleka nomwaalu gweishangitho gwooN$200.

LEAVE A REPLY

Please enter your comment!
Please enter your name here