Ombelewa yokukondjitha omalovu niingangamithi mOlukonda

0
344

 

OLUKONDA – Moshikandjohogololo shaLukonda oshiwike sha ziko omwali mwa patululwa ombelewa ndjoka tayi kala tayi kondjitha elongithonayi lyomalovu niingangamithi. Omadhiladhilo gombelewa ndjika ogali ge etwa poshitaafula ku meme Rauha Hainghumbi ngoka eli omukalimo gomOlukonda.

Ombelewa ndjika otayi kala mewiliko lyomuhungimwenyo Gabriel Manya. Ngoka  ta ti elalakano lyayo okuhunga oomwenyo mboka ya pikwa komalovu oshowo kiingangamithi, okupukulula,okulonga oshigwana kombinga yuuwinayi welongithonayi lyomalovu oshowo iingangamithi.

“Mombelewa yetu muno itatu longo owala nehungomwenyo ashike otatu lalakanene woo okweetapo iilonga yopaumwene,otatu uvithako woo oshigwana kutya omalovu hago ashike onzo yokwiimonena iiyemo ashike opena oonzo dhilwe  ndhono tadhi vulu okweetapo iiyemo,” Manya ta ti.

Okwa gwedhapo kutya oyena iinyangadhalwa oyindji ngaashi okwiimba oondjimbo, okutunga ootungwa, okulonga iilonga kehe yokomake,okudhana iinyandwa, ohaya longo woo omasiga ngoka haga longo koonte dhetango nayilwe woo.

Oproyeka ndjika oyili kohi yuuministeli wUukalinawa oku ziilila moshipangelo shaNandjokwe, shono shi inekela ombelewa ndjika opo ya kale taya yakula oombuvi ndhoka dha za moshikandjohogololo shaLukonda dho dhi pewe ehungomwenyo kombinga yelongithonayi lyomalovu niingangamithi.

Manya okwa ti oyali ya etapo edhiladhilo ndika mo2010 ashike molwa omashongo ngoka gali geya adha oshali sha eta opo ya patepo manga. “ngaashi shili uuyuni auhe sho shili konkumbi osho ngaa shli kewale mo2012 otwali twa adhikapo komashongo ngoka gali getu kandeke moshipala, ashike omashongo ngaka otwali twega sindi notwayi komeho niilonga yetu,’ Manya ta gwedhapo ngaaka.

Oyena woo omathaneko gokutotapo ezulonkalo (Rehabilitation center), lyaamboka ya pikwa komalovu nokiingangamithi, oku totapo oshikunino mono tamu kala ta muzi iiyimati oshowo iikulya yaamboka ya pikwa noyoshigwana . Otaya indile oshigwana oshowo aNamibia  aasahenda ye ya yambidhidhe yo ya vule okutsikila noshilonga shika shokuhunga oomwenyo ko ku shonopekwe elongithonayi lyomalovu niingangamithi.

Manya ta ti ombelewa yawo oya patuluka okugandja ehungomwenyo etiyali netitatu moshiwike kehe, Omaandaha kehe koshiwike ohaya gandja uuyelele oshowo okulonga iinyangadhalwa yilwe. Ohay ningi woo omitumba  mono haya kundathana iiyetwapo yilwe. Ta ti ombelewa otayi tegelela mboka ya pikwa ye ye ya konge ehungomwenyo manga pepi.

LEAVE A REPLY

Please enter your comment!
Please enter your name here