Omufekelwa momadhipago gaali ota ka talwa momadhiladhilo

0
482

Ompangu ya Mangestrata pOndangwa oya tumine omufekelwa medhipago lya yina nokamwanakadhona kekonakono lyomadhiladhilo.

Omufekelwa nguka okwa fekelwa a dhipaga yina oshowo okamwanakadhona pomukunda guli muumbugantu wOndangwa Etine lyoshiwike sha yi.

Omunamimvo 24 Joel Metumo Michael okwa kwatelwepo wo mEtine tuu moka sho ta lundilwa kutya oye a dhipaga yina gwomimvo 58 oshowo okamwanakadhona okashuushuka . Aakwawo oshowo aashiinda otaya dhiladhila kutya otashi vulika keeli nawa momadhiladhilo.

Oshiningwanima shika oshaningilwa mOnambango,  moshikandjohogolo Uukwiyuushona.

Oontamanana dha Michael odha undulilwa komasiku 11 ga Januali omumvo tu uka kuMangestrata Petrus Nangula. Michael ota kala mondholongo omanga omakonakono gopolisis taga tsikile mwa kwatelwa naandyoka lyoku ka talwa kaanawino yomadhiladhilo.Okwa li a lombwelwa uuthemba we woku kalelwapo komutseyimpango. Omweeti gwoshipotha okwa li August Abisai.

Michael ota lundilwa a dhipaga yina Suama Kanime na mbushe Suama Michael, konima sho nguka a galuka koshipangelo shaNandjokwe hoka a li a falwa kaakwanezimo. Ezimo lye olya ti otali fekele Michael ta ehama momadhiladhilo sha landula omaihumbato taga limbilike. Koshipangelo okwa li ashike a pewako omiti noku shunithwa kegumbo esiku olyo tuu ndyoka..

Omaihumbato ge oga nayipala sho a tameke okudhenga omukadhona gwe oshowo omukiintu gwomushiinda.

Omukadhona gwe okwa tseyithile ezimo lya Michael kombinga yomaihumbato ngoka, oshowo okwa fala omwana ku yinakulu omanga ye pamwe namushiinda she inaa ya fadhukapo.

Sho a dhimbulula kutya ita adhamo mondapo yomukadhona gwe pamwe nomushiinda shawo okwa shuna kegumbo, anuwa noku tilitha kutya ota ka dhipaga kehe omuntu eli megumbo.

Ayehe mboka ya li megumbo sho yuuvu ndhoka oya fadhukapo, eta ya thigimo ashike Kanime nomutekulu.

Kanime ngoka a li kwiinina Suama okwa kambadhala okuloteka Michael ndele pehala lyokupulakena nguka okwa dhenge yina nomungwala gwokufulitha.

“Sho Kanime a gwile pevi , ye okwa tsikile nokumundanda, pamwe nokanona. Sho eya dhipaga ayehe okwa yi kondunda yandje yokulala moka mwali aanona yamwe ya kotha nokutatula ekende.

“Okwa yi meni ihe elago enene oondika kutya ina mona aanona mboka ya li ya lala pevi popepi nombete. Okwa thigipo ondunda yandje nokwa yi eta hanagulapo ondunda yomumwamemekadhona oshowo oondunda mbali dhomwiidhi. Okwa li eshi pamwe omo twa holama moka,” osho  Saima Mikael, omumwayinakadhona gwa Joel Michael a endulula shoka shaningwa.

Omumwayinakadhona gumwe okwa mono nkene mumwayinamati tadhipaga yina manga a li a holama konima yoshipeleki megumbo.

Aanegumbo yamwe oye shi pondola oku ithana aashiinda mboka ye mu kwata noku ithana opolisi.

Kakele kaantu yaali mboka a dhipaga, Michael okwa dhipaga wo ombwa nondjuhwa megumbo moka.

Pahapu dha Saima Mikael mOsoondaha, Michael okwa ningilile omumwayinagona oshituthi sheshasho. Shoka shaningwa omanga inaa ithana omukadhona gwe eete okamwanakadhona. Okamwanakadhona na yina oyo aakalimo yomOkalongo moshitopolwa Omusati konyala ookilometa 130 kuumbangalantu ninginino.

Ongulohi yEtiyali oshiwike sha yi okwa tameke tau like afa keeli nawa momutse. Shika osha dhimbululwa sho a tameke ta lundile omukadhona gwe kutya ote mu logo.Okwa ponokele nokudhenga omukadhona gwe nokwa tameke te mu fadhukapo a ti ngoka anuwa okwa shitukile mengungule eluudhe.Aakwanezimo oye shi pondola oku mu fala koshipangelo sha Nandjokwe mEtitatu oshiwike shayi.

Mother,-child-murder1

LEAVE A REPLY

Please enter your comment!
Please enter your name here