Peter ondume yomomufitu: Esiku etine netitano lya Mai 1986

0
420
Peter Jungle Fighter

Esiku ndyoka Du Plessis okwe ya kuyele eende pamwe naakwiita yahamano. Okwe ya lombwele opo ya thikame momukweyo pondje omanga inaa ithana ndje opo ndi ya tsakaneke. Okwa pula ihe aakwiita mbaka ngele oya tsakaneka ndje nando olumwe moAngola nenge palwe moNamibia. Kapwali nando ogumwe gwawo a li eshi ndje, ngame wo kandina nando esiku limwe nda tsakanene na gumwe gwaambaka.Du Plessis konima okwa lombwele ndje ndi shune koshipundi shandje omanga ye ta pitithamo aakwiita mbaka mehala lyoonkwatwa. Onda kala nda kuutumba moshipundi shandje sigo Du Plessis  ota galuka  pamwe naahepeki yaali aatiligane. Opo mpoka okwa tala ndje no inaa popya sha omanga inaa thanga ndje moshiya, ati “Nena oto tala nawa. Otandi ku dhipaga nena.” Osho a igidha omanga ta kutha okambo ke ko ku shanga.Du Plessis konima okwa londodha ndje  kutya okwa kala noku kambadhala kaa dhipage ndje, ihe ngashingeyi ke shi wo wee ngele otandi hupu esiku ndyoka, oshoka ye ita vulu we oku idhidhimikila oshikulo tashi mu hokololele iifundja.Pethimbo a popi muule ngame onda li ndi uvite  nda dhinika no ndali ndiidhina ngame mwene wo oshowo ndi uvite pwaana ekwatho lyasha.Omwenyo gwandje onde gu gandja momake ga Kalunga , nonando kandali nde mu galikana  nando olumwe okuza tuu esiku nda gwilile miikaha yaatondi yandje. Onda kala ndishishi kutya aahepeki yandje ita ya ka mwena okudhenga ndje  kutya nee onde ya hokololele shike kutya onde ya lombwele ehokololo epe, shika onda li ndi uvite kutya  otashi ka etela ndje omahepeko ogendji.

“Ondjembo yoye oyili peni?” Du Plessis osho iigidha omanga inaa mwenapo kashona uule wominute  dhontumba.Onde mu lombwele kutya iikondjtho yandje ayihe onde yi thigile miikaha yaamboka ya li ya thindikile ndje  moNamibia,oshoka kandali nda uthwa oku humbata iikondjitho .  “ Ndjoka ondoya to popi” osho iigidha  omanga ta nukile ndje pothingo noku ponda ndje a dhiginina. Okwa lombwele aahepeki yandje opo ya fike ndje nolusheno kominwe dhandje nokomakutsi  nolusheno luna oonkondo, opo mpoka ngame nonda kambuka.

Konima sho nda ka papudhuka, ondi iyadha  ndalala polupanda nda siikilwa nekumbatha edhigu nda kalelwa komukwiita gumwe omutiligane. Onda kala nda mwena nda fa natango nda kambuka. Onda kala nda lala monkalo ndjoka uule wowili yimwe ayihe omanga Du Plessis  inee ya a tale ngele onda sa nenge ondina omwenyo. Konima okwa lombwele aatiligane ya kwathele ndje oku kuutumba moshipundi omanga natango omagulu gandje ga mangelwa koshipundi shoka.Du Plessis okwa hiyile ndje omayeye moshipala oshowo okwa fike ndje nuusekeleta omanga tiishapa kutya etanga lya South Africa olya kola ngaaka kutya otali ka hanagulapo SWAPO naaKommunisi. Konima yominute dhimwe okwa lombwele aahepeki yandje opo ya tile ndje omeya omatalala omanga inaa tameka okudhenga ndje sigo ngiika andola otandi si nenge tandi ya hokololele oshili, oshoka ye okwa li a vulwa okupulakena kehokololo lyandje ekulu lyiifundja.

“Ngele oya ndopa oku kudhipaga, otandi ku dhipaga ngame mwene niikaha yandje mbi’ osho Du Plessis a popi nenganga iilumata.Sho a ndhindhilike kutya otashi vulika shili ndi se omolwa omadhengo ngaka  ngaashi a li a ti, Du Plessis okwa lomwbele aahepeki yandje opo ya ethe okudhengagula ndje. Konima okwa nenapo okathimbo , ngiika a ka pepelwepo ombepo nenge pamwe opo a ka hile kekaya . Kandali ndishishi kutya omolwashike a yile pondje.Konima yokathimbo okwa galuka ishewe a hwama nokwa tameke ta pulagula ndje ngaashi kutya “Edhina lyoye lyomiita lyolela olini? Komanda goye olye? Openi wa holeka iikondjitho yoye?Owa tumwa naanaa okulonga shike muka moNamibia? Tumbula aakwashigwana mboka ya kala noku ku kwatha oku ku palutha oshowo oku ku edhilila.Openi iikulo ha yi holama moNamibia?Aantu ye thike peni wa dhipaga okuza tuu sho wa thiki moNamibia? Uunake wa thikile moNamibia, na owa pitile peni sho we ya moshilongo?Uunake wa li wu na okushuna koAngola noolye ya li ye na oku kutsakaneka hwiyaka?Aakwiita ye ni yoPLAN ya  li ta ya longele meni lya Namibia?

Okwa galikana ndje opo ndi yamukule omapulo ngaka melandulathano oshowo ngaashi shoka tandi vulu, molwashoka ye okwa li ashike a pumbwa okuuva oshili okuza kungame.Pethimbo tandi yamukula epulo kehe, Du Plessis okwa li iipyakidhila noku nyola shoka tandi popi. Konima yoku yamukula omapulo gamwe , Du Plessis okwa thikama po ti igidha ta ti otandi mu hokololele ondoya ndjoka nde mu hokololela nale.Okonima okwa lombwele iilongithwa ye yi longe ndje oshilongwa ishewe molwashoka onde mu hokololele ehokololo lyafa ndyoka nde mu hokololele ohela.

Ishewe aahepeki yandje oya thikama nokudhenga ndje noopeipa ngaashi ya lombwelwa komuhona gwayo. Shoka sha ka landulako osho ondjokonona oshoka itandi dhimbulukwa  kutya oshike sha ningwapo konima.Onde ki iyadha ashike ndili mokandunda okashona moshipangelo nda langelwa ku gumwe gwaahepeki  yandje . Pethimbo nda penduka omukiintu omuluudhe omupangi  ngiika okwa li a kwata omaako gandje a fa andola ta tala kutya ombinzi yandje otayi inyenge ngiini molutu. Pethimbo ndyoka omaako gandje ka gali miiketanga ihe omagulu gandje oga li ga mangelwa  kombete. Onda li tandi fudha nuudhigu , go omagulu gandje oga zinda oshowo omutse gwandje.Omupangi nguka okwa tula ndje kohapi opo a kwathe ndje ndi vule okufudha.

Konima onda kotha sigo okongulohi, sho nda mangwa komeho noku falwa ishewe kokamba hoka nda kala nde edhililwa. Sho twa thiki mokamba, Smith okwa fala ndje popaala mpoka handi mangelwa esiku  kehe kongulohi sigo ongula yesiku lya landula sho a galuka ishewe a mangulule ndje ko eta fala ndje  motenda. Esiku ndyoka inandi lyasha  sigo otaku shi. Nando olutu lwandje olwa li lwa zinda okufudha kwandje okwa li okuhwepo.Esiku ndika onda li nda kalelwa komukwiita omuluudhe ngoka ihaa popi Oshiwambo, ndele okwa kala tapopi nangame mOshimbulu shina omutono gomweenda na ndjila.

Nguka okwa kala ta lombwele ndje kutya inandi pumbwa oku mu tila oshoka na ye omuntu omuluudhe ngaashi ngame. Konima okwa pe Oombulu uusama ndhoka dhi tonde aaluudhe. Molwashoka omukwiita nguka okwa li ta popi nangame nolukeno, onda dhiladhila kutya ye ogumwe gwaamboka ya gana okutu kondjitha, onkene nguka kali a yooloka  ku yakwawo oshoka ngiika okwa li ashike a tumwa oku uvitha ndje hwepo omanga inaandi ka dhengagulwa ishewe.

Omanga inaa thiga ndje po okwa pendje uuleke wotoffee, uubisikiti oshowo oondooha dhomahini , a ti onda pumbwa oku kala noonkondo opo ndi pite muuwehame.Konima sho etango lya piti omukiintu omutiligane ngoka a pangele ndje esiku limwe okwe etele ndje iihape, omboloto nokoothiwa. Okwa tala wo ethindakano lyombinzi yandje. Okwa lombwele ndje wo kutya nandi longele kumwe naahepeki yandje , oshoka shika osho owala ondjila yoku mweneka omahepeko.

Lwopotundi ontimulongo opwe ya omulumentu omutiligane a zala nawa, ngoka a pula ndje kutya ondi uvite ngiini. Okwa lombwele ndje ndi mu landule motenda opo a ka pule ndje omapulo. Petameko okwa ti oku uvite na yi kwaashoka nda ningilwa. Okwa tsikile a ti kandali ndina okudhengwa ngaaka molwashoka ngame onkwatwa yomiita. Okwa ti ye okwe ya a pulapulendje uupulo uushona wo wala. Okwa indile ndje ihe opo ndi kambadhale oku yamukula mbuka nawa, oshowo kutya onda pumbwa okulongela kumwe na ye oshoka ye ine ya opo a ehameke ndje.Omapulo ngoka a pula ndje oga li ga faathana naangoka ga kala noku pulwa ku Du Plessis eyooloko oondyoka ashike kutya nguka ina kala ta dhenge ndje . Onda yamukula ngoka a pula ndje ngaashi ashike nda kala noku yamukula. Ondiwete kutya omulumentu nguka okwa dheulwa oku lesha omadhiladhilo gaantu, oshoka nonando kali a nyanyukilwa omayamukulo gandje okwa tsikile noku ithiminika opo iiyolithe. Ihe nando ongeyi ngame onde mu talako nawa nonuukeka oshoka onda kala ndi shishi kutya kehe eyamukulo nde mu pe otali ka holokola momapulo galwe monakuyiwa onkene inandi mu pa omayamukulo omape. Konima sho omutiligane a shuna ye Smith ote ya okufala ndje pondje  pooha nombelewa ya Du Plessis. Esiku ndyoka Du Plessis ina holoka kiilonga  manga nda kala nda kuutumba itaandi piyaganekwa nando okulye.Nando ongaaka onda kala te dhiladhila opo ndaa dhimbwe shoka nda popi. Elalakano, opo ndaa holole nando oshimwe shomiiholekwa yandje yomiita nongeyi oku ya ekondjelomanguluko moshipala.

LEAVE A REPLY

Please enter your comment!
Please enter your name here