Ya dhimbulukwa esiku lyaanuulema muuyuni

0
352

ONIIPA – Aakalimo yomoshitopolwa shaShikoto nonuumvo oyali ya dhimbulukwa esiku lyaanuulema muuyuni. Esiku ndika ohali dhimbulukiwa aluhe momasiku ga3 ga Desemba omumvo kehe.

Aashikoto esiku ndika oya li yeli dhimbulukilwa moshikandjohogololo shaNiipa mEtitano lyaziko.

Konyala aanuulema oyendji oyali ya gongala yo ya tyapule noku dhimbulukwa esiku lyawo. Esiku olyali lya longekidhwa kUuministeli wUundjolowele pamwe nombelewa yezulonkalo pOniipa.

Omukuluntu gwombelewa yezulonkalo mUuminsteli wUundjolowele mOshikoto, Ndakola Imene okwa li iindile aanuulema ya kalwe nayo nawa, yo  ya pewe uuthemba mboka ya pumbwa. “Aanuulema aantu ashike ngaashi aantu ooyakwawo, oya pumbwa ya silwe oshimpwiyu, olundji momagumbo aanuulema ohaya kala taya holekwa na naamagumbo oyendji inaya hala momagumbo gawo kutya omuna uulema ashike shino kashina sho tashi etapo wo uulema ka wuna mwene otawu vulu wu adhe omuntu kehe,” Imene ta ti ngaaka.

Okwa gwedhapo kutya aanuulema aantu ya pumbwa oku kwatwa nawa yo ya kale taya yambidhidhwa aluhe. Ta indile aanamukunda oshowo aakwanezimo kaa ya ningile omahepeko mboka taya lumbu nomaulema ga yoolokathana . Ta ti oya pumbwa okusimanekwa noku kaliwa nayo nawa.

Tuhafeni Shigwedha ngoka ena uulema womeho okwali a gandja oshipopiwa shetsomukumo mono ali ta popitha aanuulema ooyakwawo. Shigwedha okwa kumike aanuulema kaaya kale yena uumbanda, yo kaaya kale yi isa uunye oshoka ka lyali ehalo lyawo opo ya ninge iilema.

“Tse aanuulema otundji otuna omashongo ogendji olundji nopendji ohatu kala ta tu yolwa, tse ta tu ulwa omalaka omawinayi. Aakwanezimo yetu oyendji oyetu ekelahi no inaya hala oku tu tekula, nonande oyendji haya kwata iimaliwa yawo yopenzela omolwa uulema iimaliwa mbyoka ihayi kwatwa nawa ohayi longithwa owala pambambo noshaali pahalo lyetu, ashike nonande tuna omashongo, ngaka itage tu imbi tu ye komeho noonkalamwenyo dhetu otatu kondjitha tse tu tale mpoka tatu hulile,” Shigwedha ta popi nomukumo.

Okwa indile woo opo ando aanuulema mbaka ya kale haya gongala pamwe yo ya kale nokwi itsa omukumo noku topolelathana omadhiladhilo nomauyelele ngoka ya pumbwa unene moonkalamwenyo dhawo . Ta indile aanuulema mboka taya monithwa iihuna kaakwanezimo lyawo opo ya popye omaudhigu gawo kaayinekelwa. Yo ya ninge onkambadhala ya lopote komazulonkalo hoka yo ya kwathelwe.

Disability-Day1

 

LEAVE A REPLY

Please enter your comment!
Please enter your name here