Ya thigwa pomutenya koshikungulu

0
347

 

 

OMUNTELE – Egumbo lya kuku Katrina Nahole ngoka a tseyika nawa Gwanahole momukunda Ondombe yoShaale moshikandjohogololo Omuntele olyali lya hanagulwapo kombepo yoshikungulu. Shino shali sha ningwa metitatu lyaziko.

Ngoka a gandja ehokololo Fenni Nangombe okwali a yelitha kutya ongulu yawo ndjoka yali yina omala gatano (5), oyali ya hanagulwapo nekuma lyawo lya gwapo kombepo ndjoka yoshikungulu.

“Otwa li twa dhengelwa ongodhi ongulu yetu ndjoka ya hanagulwapo kombepo, molwaashoka tse ohatu kala kuushimba otwali twa ziko opo tuye tu tale shoka sha ningwapo, ombepo ndjoka oya kuthako iipeleki etayi umbilwa momiti dhili kokule negumbo, ekuma nalyo olya gwapo thilu tali yonagulapo ongandjo yegumbo,” Nangombe ta ti ngaaka.

Mongulu moka omo ya adhika haya pungula iinima yawo oya adha owala iinima mbyoka anuwa yili puuyelele, na yilwe oya mbonyaukapo noya yonuka. Ta ti omwali muna osikopa yina uuyaha niikwatelwa yopelugo ashike iinima ayihe oya tatuka sho ya dhengwa kekuma.

Taya gwedhapo kutya omiti dhomegumbo dhilwe odha dhikulwamo kombepo na dhimwe dha gwapo sho dha dhengwa kekuma. Nonande ombepo ndjika yoshikungulu ya hanagulapo egumbo ndika otaya pandula sho inaamu monikila omuntu oshiponga taya ti elago owala lyaKalunga oshoka anuwa ombepo ndjoka yepukupuku sho ya tameke megumbo omwa adhika uunona nomukulupe.

Yamwe yomomukunda moka oya holola woo kutya omuna omagumbo ogendji ga pepwapo kombepo ndjoka. Omukulukadhi gumwe ta hokolola kutya okapeleki ke oka tumbwapo sho ka dhikulwamo akehe kombepo ndjoka nombete noondjato dhe dhiikutu dhu umbilwa kondje yegumbo.

Wind2 Wind1

LEAVE A REPLY

Please enter your comment!
Please enter your name here