2016 nayi kale omvo gomalunduluko niilonga

0
317

 

OMUTHIYA – Ngoloneya gwoshitopolwa shaShikoto Henock Kankoshi okwa ti okwa hala omumvo ngukagu kale gwiilonga. Kankoshi ndhino okwe dhi popi pethimbo ta popitha lwotango aanambelewa mombelewa yelelo lyaShikoto pOmuthiya.

Metumwalaka lye lyomumvo omupe ngoloneya okwa li a indile ookansela adhihe dhi longe nuudhiginini dho dhi kwathele mokuyambulapo oshitopolwa noku eta omahumokomeho ngoka ga pumbiwa unene.

“Otandi indile opo atuhe tu taleni mpoka twa longa nawa oshowo mpoka inaatu longa nawa omumvo gwa piti, opo tu ninge omalunduluko ngoka ge li mondjila momapendulopo oshowo tu kwathele mokulundulula oonkalamwenyo dho shigwana shetu,”  Ngoloneya Kankoshi ta ti ngaaka.

Okwa pandula oshitopolwa she sho natango tashi longo nuudhiginini ngele tashiya kelongo, sho natango sheya ponomola yotango ngaashi sha kala tashi shi ulike konyala omimvo hamano (6) dha piti. Ta ti oshili enyanyu enene netumba kuyo. Ta kumike ayehe haya longo moshikondo shElongo ya tsikile nomukumo mo 2016, yo ya gwanithepo iilonga yawo ngaashi haye shi ulike aluhe miizemo.

Ngoloneya ta gwedhapo kutya okuna ehalo opo a mone okanona kehe keli moomvula dhokuya kosikola ka kale ka tameka enongelo molwaashoka elongo ngaashingeyi olya ninga lyoshali okuza pondondo yotango 1-12. Ta pula aalongi ya tsikile oku kumika aalongwa, yo ya tseye esimano woo lyelongo.

“Otuna ehalo enene opo iiponga yomoondjila yi kale ya shunithwa pevi, onkee tandi pula aahingi ayehe ya hinge nuukeka yo ya simaneke oompango dhomoondjila, shino pamishangwa ndhoka opo dha pitithwa odha ulike kutya oshitopolwa shetu osho sha lopotwa shina omwaalu gwiiponga guli pombanda, naantu oyendji otaya kanitha oomwenyo dhawo unene mondjila ndjoka onene (B1) Oshivelo-Ondangwa,” Ngoloneya ta gwedhapo.

Okwa indile uuMinisteli wopashitopolwa nomalelo goondoolopa oshowo omahangano gepangelo opo ngele oshimaliwa shomathaneko sho 2016/2017 sha piti opo shi longithwe, sho shaa ha shuneko we ngaashi hashi ningwa poompito dhilwe,ta ti iimaliwa mbyoka epangelo hali gandja nayi kwathele unene oshoka opuna oosikola dhilwe dhaana omalusheno, naakwashigwana yamwe komikunda dhawo ka yena omeya ga yogoka, ta ti noopate odha pumbwa okulongwa yo aantu taya kala taya ende yamanguluka.

Ngoloneya ta halele ayehe omumvo omupe gwa yambekwa go guna elago. Noku kumika ayehe ya longe nuudhiginini nomuukumwe opo ya adhe esindano mu shoka ta ya lalakanene.

 

LEAVE A REPLY

Please enter your comment!
Please enter your name here