Anna a nyanyukilwa oshikoloni she shomukadhona dhingi mUukwanyama

0
386

Nonando ndika olyo naana ethimbo lyokutameka omvula ompe nuudhiginini, kamwe po komuukadhona dhingi moshilongo, Anna Ndeshihafela Penavali, 22, onkene ku uvite uuntsa nuunambano sho kali ka sindana ongomukadhona dhingi mUukwanyama. Pinehas Nakaziko ota kundaneke okuza pOndobe.

ONDOBE-Anna okwa ti ndjika oyo naana omvula ompe yokulonga nuudhiginini, unene ngele tashiya poshinakugwanithwa she shoka ali a inekelelwa, sho ali asindana po ethigathano ndika, poshiindingili shoka shali sha longekidhwa nawa, onga ethigathano lyuukadhona dhingi mUukwanyama, lyali lyaningilwa pehala lyomanwino lyoMeduletu mOndobe moshitopolwa shaHangwena.

Anna okwa ti ndika  olyo lyali  ethigathano lye lyotango ta sindana onga oye omukadhona dhingi, konyala sho a kala nokusindana po owala uushani mboka uushona ngaashi omukadhona gotango nomutiyali momathigathano ogendji. “Ita ndi holola nokuli nkene ndi uvite, oshoka onda nyanyukwa noonkondo, na itandi shi itaale sigo oompaka kutya onda sindana ethigathano ndyoka lina sha nomuthigululwakalwo gwandje, oshoka ngame Omukwanyama okuudha,” Anna ta ti ngaaka.

Okwa tamekele noshitalenti she okuza mo2008 manga ashike ali eli mondondo ontihetatu, kosikola yoHashiyana, mOngwediva. Ethimbo ndika okwali a sindana ongokakadhona dhingi hoka keli pehala lyotango (first Princess), mesiku lyohole, mpoka opo aza a tatu la uunongo we miilonga.

Sigo oompaka okuna uushani mboka uushona wa adha puuhetatu, mwakwatelwa  Miss Uukwanyama ongoshishani oshinene. “Onda hala nokuli oku tameka niilonga yandje yoCharity moHangwena, moka tandi ka kala mpaka naampeyaka oku kwathela aakalimo ayehe yomoHangwena. Onda hala okugandja omukumo no ku kumagidha opo aakiintu kaaya lyatele nando iipewa yawo pevi, ashike ye yi longithe, oshoka inaku toka natango,” Anna ta kumagidha ngaaka.

Ota ti okusindana po Miss Uukwanyama osha egulula omiyelo odhindji kuye, nonando okwa kala afa iitalako keena oshilonga. “Shika osha ulukila ndje nokutya otandi vulu sha, nondina omukumo okutsikila natango manga ethimbo inaali pwa po.

Otandi tsikile natango nomathigathano giili nogiili okuza nena, shampa ashike itaashi yi eilongo lyandje moshipala,”

Omuunganeki nomulongekidhi gwoshituthi shika, David Nelulu okwa ti elalakano lya Miss Uukwanyama oku gongaleka aakalimo ayehe yomUukwanyama pamwe, noku gandja oshiholelwa moshilongo ashihe, nokuyambula po omainyanyudho ngele tashiya koNooli, opo aakadhona mboka ye li koombinga ndhoka ya kale ye shi nkene ye na okulongitha iipewa yawo.

“Shika oshali olweetho lwotango Miss Uukwanyama ta ningwa, no tashi kala oshitopolwa shomainyanyudho kehe omvula mUukwanyama. Ota tu pandula  o Castle Lager ndjoka yali ye tu kwathele okuhumitha oshiindingili shika komeho,” Nelulu ta ti ngaaka eta gwedha po ta ti oya hala Miss Uukwanyama a ningilwe momikunda adhihe ongehumokomeho lyoshitopolwa shaHangwena.
Omusindani gwedhigathano lyotango okwa a sindana ongodhi yopeke, omagadhi, iimaliwa koomuma,  nokupandwa poSalon yaMegy, mOhangwena uule woshiwike ashihe. Chella boy, 4Engine, Home Boys na Dj Weah oyo yali ta ya mwenyeke oshiindingili niipewa yawo yoku imba esiku ndyoka.

LEAVE A REPLY

Please enter your comment!
Please enter your name here