A dhipaga yinakulu nokanona kamushiinda

0
537

 

ONGWEDIVA – Omulumentu gwoomvula 24, okwa holoka mompangulilo yaMangestalata mOutapi ta tamanekelwa edhipago lyayinakulu nokanona kopuushiinda.

Lukas Pendukeni Shimbilima ngoka taku fekelwa kutya okwafa keeli nawa momutse, otaku fekelwa a kutha omwenyo omukulupe goomvula 82 nokanoka koomvula ne, sho eya dhenge noshiti komitse, iikando oyindji.

Omulumentu nguka okwa li a kwatwa po kopolisi muDesemba nokwa holoka nale mompangulilo yamangestrata mOutapi. Mboka ya ningi iihakanwa yedhipago oyo yinakulu Naemi Nkulunkulu gwomomukunda Oihamayashuundu nokanona kokakadhona, kedhina Wilhelmina Josef komomukunda gu li puushiinda, Olukekete moshikandjohogololo Outapi.

Kuuyelele mboka wa gandjwa komupoiliko gopolisi mOmusati Anna Kunga, okanona hoka okali ashike ka thigwa na kuku Nkulunkulu omanga yina aka tala iikulya yoshikukuta puukefe uli pomukunda.

Kapena naanaa uuyelele kutya oshike sha ningwa po, ihe ota ku fekelwa kutya Shimbilima okwa ponokele tango omukulupe, nopo nee okanona.

Konima sho a mana iilonga ye mbyoka iikumithi, anuwa okwa yi kehala hoka kwali taku gandjelwa oshikukuta, noku lombwela yina yokanona kutya okwa dhipaga okanona na yinakulu.

Omukiintu nguka opamwe naanamukunda yalwe oya yi kegumbo lya kuku Nkulunkulu hoka ya adha shili omukulupe nguka nokanona Wilhelemina ya lala ya sa.

Oya ithana opolisi ndjoka ya mangapo Shimbilima.

Omufekelwa nguka okwa holoka nale mompangulilo noshipotha oshuundulilwa komeho opo ku pewe opolisi ethimbo lyokukonaakona. Omulumentu nguka natango okuli mondholongo.

 

LEAVE A REPLY

Please enter your comment!
Please enter your name here