Omufekelwa medhipago lyaakintu yaali a holoka mompangu

0
457

 

WINDHOEK-Ohofa yaD poompangungulilo dhaMangestrata gwaVenduka oyali yu udha sigo opo ndje. Yuudha aakwanezimo lyaakiintu yaali mboka omidhimba dhawo dha li dhi itsuwa dha fikwapo Etine oshiwike shayi petoto lyiiyagaya pondje yOshilandopangelo. Kakele kaakwezimo ompangulilo oya li wo yu udha aakwashigwana mboka ya etelwa omaipulo ogendji koshiningwanima shika. Aatoolinkundana nayo oya li mompangu ya tegelela okuthaneka omufekelwa uuna te etwa mompangulilo kaapolisi.

Omutamanekwa Lukas Nicodemus okwa holokele mompangu Omaandaha oshiwike shika ta hokololithwa edhipago lwiikando iyali oshowo okuya oveta moshipala.

Omidhimba dhaakiintu mboka yaali omunamimvo 23 Clemencia de Wee oshowo omunamimvo 29 Joanny Naruses odha adhikile dha fikwapo pelambo lyiiyagaya moVenduka Etine oshiwike shayi. Ndhika odha li dha tongololwa nokutothwamo kaakwanezimo lyaakiintu mbaka, pahapu dhomupopiliko gopolisi Omukonakoni Slogan Matheus ngoka a koleke oshiningwanima shika pethimbo lyoshigongi shoonkundana naatoolinkundana komatango goSoondaha ya piti.

Nicodemus ngoka ta ka holoka ishewe mOmpangu momasiku 9 Maalitsa nuumvo ina pitikwa okwiifutilamo nokwa edhililwa mondholongo yaamboka ya tegelela epangulo po Seeis popepi nokapale koondhila kopaigwana ka Hosea Kutako muuzilo woVenduka.

Nicodemus pethimbo a holoka komeho gaMangestrata Ilge Rheent, okwa li a fatululilwa uuthemba we wopaveta, a lombwelwa kutya okuna ehogololo oku ikongela ohahende ye yopaumwene nenge ngele hasho ota vulu oku indila ohahende ndjoka tayi futwa koholomende. Shi ikwatelela kondjato ye pashimaliwa ota shi vulika wo a ka pulwe opo a fute sha molwohahende ndjoka a kongelwa noku futilwa kepangelo.Nakufekelelwa edhipago lyaantu yaali okwa pewa wo omayele kutya okuna oku kala ena ohahende oshoka ngoka “okwa nongopekwa mokukalelapo noku eta iipotha komeho gompangu  niishewe ota gamene uuthemba woye momukalo ngoka taya vulu”osho Ilge a ti. Nicodemus okwa yamukula kutya ota ka indila ekwathelo lyokukalelwapo komunaveta ta futwa koholomende.

Sho omufekelwa mepogolo ndika a pulwa kutya ota ti shike kombinga yetamaneko ndika okwa yamukula kutya “ Kandina ondjo”

Okwa tindilwa okwiifutilamo  na ota kala mokakuma eedhililwa pokandoolopafaalama Seeis popepi nokapale kOondhila kOpaigwana kaHosea Kutako kuuzilo waVenduka pethimbo ndika.Kundana okwa kundana kutya Nicodemus okwa li a tuminwa hoka omolwegameno lye. Nicodemus anuwa okuna uumbanda kombinga yomwenyo gwe na anuwa okwa li a galikana opo kaa tuminwe kuuselle woonkwatwa dha tegelela epangulo posasiona onene yopolisi ya Venduka.

Pethimbo Nicodemus a etwa mohofa aakwezimo lyoonakusa oya li ya nika oluhodhi noonkondo na yamwe kaya li taya vulu okudhigilamo omahodhi. Pethimbo ndyoka oshilyo shimwe shopolisi osha keelele oshigwana shi hedhe popepi nomufekelwa, pethimbo eyamo oshowo sho a thigipo ompangu. Oshigwana osha li wo sha hadhwa opo shi ta li ke ngele osha etelela iikondjitho omanga inaashi ethiwa okuya mohofa.

Omadhipago ngaka gaantu yaali oga holoka puuyelele konima sho omulangeli petoto lyiiyagaya lili popepi nolukanda lwa Pionierspark aadha omidhimba dhaakiintu mboka tadhi tsinagala olwithi natango konyala pethimbo lyotundi onti 06h30 ongula yEtine lyoshiwike shapiti.

Omupopiliko gwopolisi Omukonakoni Slogan Matheus okwa ti okwi itaalwa kutya haantu ye vule gumwe ya kwatelwa momadhipago ngaka.

Osheenditho sho tholoto yo Golf GTI  oshiluudhe shoka taku tiwa oshomufekelwa sha adhika shina oombinzi osha li sha kuthwako kopolisi konima sho sha adhika shaali mesiloshimpwiyu mehala inaali tumbulwa moshilandopangelo.”Okwi itaalwa kutya shika osho sha longithwa okulonga omuyonena nguka’ Matheus a ti.

Inaku hololwa natango kutya omakwatathano pokati kaakiintu mbaka nomufekelwa oga tya ngiini. Ihe otaku dhiladhilwa kutya aakiintu mbaka yaali oya li pamwe na Nicodemus omanga iilonga yiihuna mbyoka ya longelwa inaa yi ningwa.Opwa uvikwa wo kutya opolisi oya li yi itsu okakalata kongodhi yopeke pehala mpoka aakiintu mbaka ya li ya fikilwa , nokonima yomakonakono oka fala aapolisi mbaka ku Nicodemus.Omuntu gumwe ngoka a li ta fekelwa okwa li wo a pulapulwa kopolisi ihe okwe keethiwa mEtitano oshiwike shayi. Epangelo olya li lya kalelwapo ku Ivan Tjizu pethimbo lyiihokolola mbika.

LEAVE A REPLY

Please enter your comment!
Please enter your name here