Oyendji ya nyanyukilwa oongalo dhaMnali

0
304

 

Windhoek

Oyendji ota ku kundanekwa ya nyanyukilwa oongalo dhomuhikingalo gwo Afro pop a tseyika nawa Mnali,  ndhoka opo dha piti ngaashingeyi okuza  moalubuma ndjoka ya kala noku tegelelwa koyendji yedhina The Tales of Mnali (Omahokololo gaMnali).

Oalubuma ndjika yina ehwata lyoongalo 11, oya kala nokudhanwa mpaka naampeyaka, konyala oshilongo ashihe, unene tuu momaJukeboxes gomoshilando, konooli yoshilongo, nomoohauto dhopaumwene.

Gumwe po ngoka ena ehala lyokulanditha iikunwa moEveline street, Nadhipite Thomas, okwa holola kutya nkene ashike a landelele oka Cd hoka mengelengele lye konyala kehe esiku oha mu lilithwa oongalo dha Mnali shi vulithe oonkwawo. “Ndjika oyo yimwe po dhomooalubuma ndhoka dhali tadhi dhana onkandangala methimbo ndyoka lyomatango omanene, ngaashi poKrismesa nopomuvo omupe, no ndali ndu uvite nawa sho aayambidhidhi yandje ya nyanyukwa.

Mnali, nedhina lye pakuudha Nalimanguluke Ndengu, ngoka ali a tseyika ishewe nedhina Makhazola manga inaa ilukulula okwa li a tseyika nooalubuma ngaashi Ohandje Yimwe Ya Fika Okuti, Evugu nosho tuu. Omvula ya ziko okwali a iluku edhina epe Mnali nokwali a holoka noalubuma ndjoka yedhina The Tales of Mnali pamwe ishewe nehangano lye lyokwiimba epe lyedhina Dope Boyz Note Studios.

“Oalubuma ndjika otwe yi luku Iihokolola ya Mnali oshoka shika osha li edhilaadhilo ndyoka twa etapo oku tula oongalo dhomithigululwakalo mumwe no dho pashinanena ongehokololo okuza petameko,” Mnali ta ti ngaaka.

Okangalo ke kotango hoka ta ka kakala moalubuma ndjika kedhina Be There, ta kwathelwa ku Tequila, okapita kooradio dhomoshilongo nota ka inyenge nawa. Okangalo haka ota ka popi kombinga yohole, opo mboka yeholathane ya kale yiikalela po.

Mnali okwali ishewe a pititha okavidio hoka ko kangalo Be There, ka thaanekelwa kefuta. Moalubuma ndjika ota mu adhika ishewe ongalo yedhina Dope, moka Mnali ta kwathelwa ku Exit, noku nakusa Jacus Krige. Ongalo ndjika oya nuninwa woo Jacus Krige, ongedhimbuluko lye molwiilonga mbyoka a longa nawa pamwe na Mnali.

Ongalo onkwawo oondjoka tayi hokitha  no ya hokiwa komupulakeni yedhina Oshimaliwa, yoHouse tayi longo opo aantu ya longe nuudhigini yo ya imonene oodola dhawo.

Mnali okwa tamekele oku imba mo 2004 manga hasikola mosekundosikola Ekulo mOmuthiya, moshitopolwa Oshikoto pamwe nOmzoo. Okwali ya topoka naMnali okwa tameke oku imba oongalo dhe oye awike moka a pititha oalubuma yotango Mnali Taliwaka.

Ota tengeneke opo akale a thaanekitha uuvidio waadha puutatu. Okwa ti omvula ndjika oye yokupula komeho no ita kashuna nande oshithi monima. “Ngaashingeyi otwa hala aahikingalo mboka ya hala okulongela kumwe natse, naanyandi opo ya kale ye ya mehangano lyetu tse tu longele kumwe,” Mnali ta ti.

LEAVE A REPLY

Please enter your comment!
Please enter your name here