Peter ondume yomomufitu: Esiku etihamano miikaha yomutondi [6 Mai 1986]

0
542
Peter Jungle Fighter

Esiku ndika Du Plessis naatiligane yakwawo yaali oye ya konima yotundi ontiheyali, opo ye ya pula pule ndje ishewe. Du Plessis okwa tala ndje a tongolola ndje no inaa makuka nando oshitya shimwe. Sho nde mu mono onda li ndu uvite nda fa tandi si. Ka ndali nookuli nda hala oku uva ewi lye edhigu nando olumwe. Aatiligane mboka yaali oya yi mombelewa ya Du Plessis omanga inaa ya zamo noombapila dhomapulo ga topatopwa oshowo nomambo gokushanga omayamukulo. Oya pula omukwiita omutiligane ngoka a li a langela ndje opo a fale ndje motenda ya vule oku ka pula ndje omapulo.

Mbaka yaali oya popitha ndje mOshimbulu tango noku pula ndje ngele ohandi uvuko elaka ndyoka nawa nenge pamwe ohandi uvu ashike Oshiingilisa. Onde ya lombwele kutya onda hala okupopya mOshiingilisa oshoka Oshimbulu shandje hasho naanaa. Konima oya tameke okupula ndje omapulo ngoka nda pulilwe esiku lya ziko. Ihe yo oya kambadhala okupula ishewe gamwe muule.Konima yomapulo gumwe gwaambaka okwa ti ngame Omukomonissi ngoka ena okusa. Okwa tsikile noku londodha ndje kutya nandi popye oshili oshoka ngele onda tsikile okufundja, yo otaya ka umbila ndje momeya ndina omwenyo. Omutiligane mukwawo ngoka a fa oye omukuluntu kuye okwe mu kwata melaka emu lombwele opo a ethe oohapu ndhoka opo yo ya ye.

Konima sho mbaka yaali ya zipo Du Plessis okwe ya motenda. Okwa pula ndje kutya onda hokololele aatiligane mbeyaka yaali shike oshipe shoka tandi vulu oku mu hokololela woo, nenge pamwe onde ya hokololele ashike ondoya yoshito ndjoka ndemu hokololele nale kuyele. Okwa lombwele ndje ndi mu landule mongulu moka hamu hepekelwa oonkwatwa opo tu ka kundathane. Pethimbo ndika omukwiita omuluudhe ngoka a li a langela ndje oye awike a li eende pamwe na Du Plessis. Esiku ndyoka kandali nda mangwa komeho onkene onda li tandi vulu okumona uunene nomutamo gwehala lyoonkwatwa. Pethimbo nda yi mehala lyokuhepekelwa onda kwatwa kuumbanda naashika osha tameke tashi kanithitha ndje einekelo mwene. Ihe esiku ndyoka Du Plessis ina dhenga ndje, oshoka okwa li iiningi omunawino gomadhiladhilo. Ngiika pamwe okwa ndhindhilike kutya okudhenga inaku eta iizemo mbyoka a li a tegelela. Okwa tameke ta lombwele ndje kutya ngele onde mu hokololele ashihe shoka a hala okuuva ota ka futa ndje nohugunina ota ka kwatha ndje opo ndi ninge oshilyo shaakwiita yomutondi oku kondjitha aaKuba, SWAPO oshowo aa Russia mboka ya hala okuyugako shaashoka kaatiligane mwa kwatelwa naakulukadhi yawo.

Onda li nde mu pulakena nawa nonando kandali nde mu tala momeho ge. Sho a uvithile ndje ongo omukriste a valululwa onda li nda geya meni lyandje. Tandi ipula kutya ethipambinzi ndika otashi vulika ngiini li kale li na omutima gwontumba nuupu ngaaka? Okwa li ta dhiladhila kutya ngiika otandi ka dhimbwa omadhengo gonyanya ngoka a ehameke ndje nago uule womasiku gapiti andola nuupu ashike ngaaka. Ngiika okwa dhiladhila kutya shaashi ngame onkwatwa, ota vulu ashike okuhokololela ndje shaashoka a dhiladhila. Ngaka oga li omapulo agehe ngoka ga ende momutse gwandje pethimbo Du Plessis ta popitha ndje. Okwa li ishewe a dhimbulutha ndje kutya ondili miikaha ye na ngame kandina shoka tandi vulu okuninga opo ndi ihupithe andola. Okwa lombwele ndje ishewe kutya ngame ondi na iikaha yuudha ombinzi yaantu yaanandjo, mboka anuwa nda dhipaga pwaana omatompelo gasha. Ngame inandi mu pula kutya aantu mboka ta popi oyo oolye, molwashoka onda li miikaha yawo ngaashi ye a popi.

Pethimbo ndyoka onda mono omukumo montseyo kutya ekondjo lyetu olyo e yuuki naayehe mboka ya kutha ombinga mulyo oye na oku itula moshiponga ethimbo limwe.Onda li ishewe ndishishi kutya nando ondi popye shike ku Du Plessis omadhengo itaga ka hulapo sigo uuna ndoka nda hulupo, onkene oshiwanawa opo ashike ndi se niiholekwa yandje.

Onda li ashike noshinima shimwe momadhiladhilo gandje kutya kandina okuhokololela omutondi gwandje kutya iilonga yandje oya li ya shike. Onda gana woo kutya kandina esiku tandi hokololele omutondi gwandje kutya onda li kOmbaye, koVenduka, Oshaanda, Oliindili oshowo kiilando yilwe, noshowo inandi dhiladhila nando okuhololela omutondi mpoka nda li nda holeka iilwitho yandje kashina mbudhi kutya oshike sha ningwapo. Onda li nda holeke ombistoli yandje oshowo omakuvu gane guudha iikuti yondjembo yoAK-47 pEnolyexaya. Onda li wo nda holekapo ondjembo yandje yoAK-47 niikuti omathele mwa kwatelwa niikondjitho yilwe oshowo omizalo dhopakwiita pOihole kombanda yoongamba moAngola. Iinima ayihe mbika andola ngele onda sile andola kapena we ngoka a ka tseya mpoka ngame nda li nde yi holeka.

Du Plessis okwa li a shashwa esiku ndyoka oshoka ina dhenga ndje nando nenge ando a undule ndje. Omanga inaa zapo oku ka fudhapo kashona, molwasho ngiika okwa li a vulwa okupulakena iindoondoo, okwa li ta holoka a vulwa nokeena etegameno lya sha. Okutegelela kwe okwafa kwa kala taku dhimeya. Okwa thigi ndje mehala lyomahepekelo ndyoka lwopotundi ontine uuvite nayi. Konima ashike sho Du Plessis a yi ye Sheehama okwe ya po, ta hokololola kutya naye okwa li omuniilonga gomonanguwi goSWAPO ngoka a li a kwatelwa wo meni lya Namibia omanga a li miilonga. Okwa kambadhala oku itaalitha ndje ndi longele kumwe na Du Plessis opo ndi yande oku ehamekwa okundji. Sheehama okwa lombwele ndje ishewe kutya naye okwa li a hepekwa naanaa ngaashi ngame tandi shi ningilwa, ihe konima sho a tameke okulongela kumwe noombulu, okudhengwa nomahepeko galwe oga mwenekwa.

Sho a tsikile noonkambadhala dhokunengeneka ndje, ngame onda li nda pulakena omutono gwepopyo lye, nonda  dhiladhila kutya nguka okwa li ashike gumwe gwaatondi yandje. Kongulohi Smith okwa etele ndje iikulya yontumba. Tango okwa fala ndje popaala, ndele ina mangela ndje kuyo ngaashi heshi ningi shito. Ihe esiku ndyoka okwa pendje oshipundi ndi kuutumbeko omanga inaa tula iikulya pevi popepi nangame. Molwashoka onda li nda vulwa onda kothele moshipundi shandje naasho Smith aadha nda kotha okwa thanga ndje a dhiginina kutya ngaaka onda guko kusho. Uusiku auhe wesiku ndyoka onde wu ende nda kuutumba pehala lyoku thikama hoka nda kala nda igilila. Naashika osha li oshikando shotango nda ende muusiku auhe nda kuutumba okuza tuu nkene nda kwatelwe komutondi. Esiku lya landula onda falwa ndi kiiyoge, ko okwiiyoga huka oko kwali kotango momasiku gahamano, omanga inaandi ka edhililwa mondholongo yondoloma moka nda kala okuza momasiku 7 Mai sigo 1o Juli 1986.

LEAVE A REPLY

Please enter your comment!
Please enter your name here