Shivute ina nyanyukilwa oongeleka dhiiveva

0
531

 

OMUTHIYA – Omukuutumbithi gwelelo lyoshitopolwa shaShikoto Samuel Shivute okwa ti okwa yemba oongeleka dhimwe dhiiveva ndhono tadhi teyagula po oshigwana noku eta omatopoko mokati kaantu.

Shivute ndhino okwali edhi popi kuyele oshiwike shika sho kwali kwa monika ongeleka yimwe yili mondoolopa yaMuthiya taku fofodholwa tayi indike noku lombwela aantu mboka hayanu omiti no taya lumbu nombuto yoHIV/AIDS , ya hulithepo okunwa oshoka anuwa ita ya ehama oya pumbwa owala omagalikano anuwa.

Ongeleka ndjino tayi ithanwa Deeper Christian Life Ministry oyili mewiliko lyomusita ngoka ena oomvula 25, anuwa oye ta lombwele aantu ya hulithepo okunwa omiti dhawo , teya galikanene ye ta galikanene anuwa omiti ndho tadhi yi ku Kalunga shampa ye dhi kuthwa.

Gumwe gomaavu mboka a lombwelwa kaanwe omiti dhe okwali anuwa a kuthwamo megumbo lyaandjawo nonande kena nana uukolele anuwa ye a kale puupeleki wuli pooha dhongeleka ye a kale ta galikanenwa, okwali woo a falwa kontanda anuwa koTsumeb hono a ka galikanenwa.

Omuvu ngono itaa vulu okutumbulwa iha ende omolwa uuwehame okwali a kalako kongeleka uule wiiwike iyali nonande aavali mboka taye mu sile oshimpwiyu inaya panda onkalo ndjoka yoku kutha omwana megumbo ta ye mu fala koongeleka anuwa a ka galikanenwe.

Onzo yimwe oya holola kutya ongeleka ndjika yo Deeper Life oyali ya konekiwa ta yi uvithile aantu momukunda Ondombe yOmuthiya omvula ya ziko no yali ya tidhwamo oshoka oyali ta yi teyapo ombili momagumbo gaantu yo ota ya uvitha yaana epitikilo okuza kelelo lyopamuthigululwakalo, po opo yazi yi ye pehala mpoka yili ngaashingeyi.

Omunashipundi Shivute okwa holola okwaa uvitile kwe ombili oshinima shika , ta indile oongeleka ndhoka oompe dhi kale dhina omishangwa tadhi ulike kutya odha pitikilwa okuninga omauvitho pehala lyontumba. Ta ti elelo lyOshikoto otali ka katukila onkatu mbala oongeleka ndhoka tadhi teyagulapo oshigwana.

“Aantu mbono yasa otwali tweya pumbwa natango, ashike oongeleka ndhino otadhi fupipike oonkalamwenyo dhaantu no kuya lombwela yaanwe oopela dhawo, oshinima shino osha puka noonkondo no itatu ka pitika oongeleka ndho moshitopolwa shetu,” Shivute ta londodha.

Ta tsikileko ta indile aakwashigwana kondandalunde, ooyene yomikunda opo ya longele kumwe yo ya lopote oongeleka dhimwe  ndhoka tadhi vundakanitha aantu anuwa.. Ta ti ongeleka ndjoka ota yi longiwa nayo ,yo yi yelithe nawa kutya omolwashike ta yi lombwele aantu iinima haayo.

Churches1 Churches

 

LEAVE A REPLY

Please enter your comment!
Please enter your name here