Aagundjuka mOnamutayi ya gandja koskola pomukunda gwawo

0
329

 

ONAMUTAYI-Aagundjuka yomoNamutayi moshikandjohogololo Ongwediva oyali ya ningi kayuhwena hadhela nyoko, sho yali ya ningi oshinyangadhalwa shoku kongela oshikunino shaanona mpoka yo wo yali ya hiti petimbo ya li aanona iipundi niitaafula.

Omupopiliko gongundu yaanyasha ndjika Festus Kandjala okwa ti oyali ya mono nkene osikola ndjika yaanona yili monkayi yiipundi , oshinima shoka tashi vulu okushunitha monima elongo lyaanona mboka haya kala omutumba mongulu yenongelo ndyoka .

Okwa ti ongaanyasha oya li ya kutha ko oshinakugwanithwa opo ya kwathele elelo lyosikola ndjika mpoka wo yamwe yomaanyasha mbaka ya tamekela elongo lyawo lyopevi lyoshikunino.

Okwa ti aanyasha oyali ya tula uukuni kumwe opo ya etepo okashona hoka ka hololapo iipundi niitaafula mbyoka yali yagandja kosikola oshiwike shazako.

“Ngele aanyasha ita tu kutha onkatu oku humitha komeho omidhingoloko dhetu nena kapuna ngoka te ke shininga pomahala getu oshoka otse yene tu shi omikundu dha kundukidha omidhingoloko dhetu”, Kandjala ta ti.

Iipundi oya li ya gandjwa ku meme Lydiya Shikwaya ngoka eli omulongi poshikunino sha Neshuku Kindergarten moNamutayi.

Omupopi asimana poshiindingili shika okwali meme Lucia Shindambi omulongi omukulu momudhingoloko gwaNamutayi moka ali a gandja esimano lyelongo lyokanona petameko.

Ta ti oshikunino osho ekota lyakola melongo lyokanona oshoka omo uunona hau longwa iinima ayihe yi na sha nonakuyiwa yelongo nonkalathano yopantu.

Onkene okwa iindile aavali opo ya shangithe uunona wawo moshikunino manga inawuya kondondo yotango ta ti ngele oya ningi ngeyi nena sho uunona tawu kaya kondondo yotango nena ita wu ka mona uupyakadhi washa ngele otashiya pokushanga nokulesha.

Aanyasha oyali wo yi iyamba esiku ndyoka okuopaleka ekuma lyoshikunino shika nokutulapo omweelo omupe.

Oyali wo ya gandja ekwashilipaleko kutya otaya ka nyanga opo ya tulepo ehala lyokudhanena uunona mwa kwatelwa iidhanitho yalyo.

Ota ya pandula aakwashigwana yopomudhingoloko sho yali yeya kwathele nokashona hoka yali yagandja kopoloyeka ndjika na unene olupandu oye lu pe ongeshefa ya KKKK ndjoka ya li ya gandja okapandi ko N$ 1000.

Youth-2

LEAVE A REPLY

Please enter your comment!
Please enter your name here