Okapale kEmanguluko itaka dhanenwa manga

0
393

 

WINDHOEK –Okapale kEmanguluko moVenduka ita ka dhanenwa we manga omudhano goliha yopombanda ya Namibia  oshowo uudhano wokumatuka osigo omomasiku 4 gApilili nuumvo.

Okapale haka oko okanene kuupale auhe womaudhano moshilongo oka patwa opo ongwena yako yi pewe ethimbo lyokumenununa nawa, omolwashoka omo tamu ya okudhanenwa ethigathano lyuudhano wetanga lyokoompadhi wo nuumvo woCouncil of Southern Africa Football Associations (Cosafa) mboka tau kalako muMai. Namibia oye enyakwa lyethigathano ndika okuza sho a li a sindanapo ekopi ndika muudhano mboka wa liko omvogu moSouth Africa.

Omaudhano goliha yopombanda ya Namibia otaga kala taga dhanenwa mokapale ketanga lyokoompadhi ka Sam Nujoma .Okapale kEmanguluko otaka pitikwa ashike okudhanenwa kospana yopashigwana uuna ta yi ilongekidhile omathigathano gopaigwana  oshowo omathigathano gamwepo gopatletika.

Omuwiliki gUudhano mOshikondo Shuudhano, Aagundjuka , niilonga yopashigwana Shivute Katamba okwa ti pethimbo okapale ka edhilwa omaudhano ngaashi okuumba egonga  oshowo ondjundo otaga kala taga kondololwa  “nuukeka”.

“Onkene pethimbo ndyoka omaidheulo momaudhano gomongwena itaga pitikwa” osho a koleke momushangwa gwa nyolelwa ehangano ewiliki lyuudhano wetanga lyokoompadhi NFA, oKommissi yOmaudhano ya Namibia, Oliha yetanga lyokoompadhi , Ehangano lyomaudhano goosikola dha Namibia oshowo oohandimwe mboka haya longitha okapale haka.

Okapale ota ka ka longithwa ashike molwuudhano wekopi lyoCosafa  okuza momasiku 4 Apilili sigo omasiku 6 Juni nuumvo.

Sho a pulwa kombinga yaashika omuleli mombelewa ya NPL, Tovey Hoebeb okwa ti oshinima shika osha guma oospana dhomoVenduka ndhoka dha thiminikwa  oku shonopeka  uudhano woliha okuza komaudhano 16 okuya koamudhano 8 moshiwike.

“Ngashingeyi otwa thiminikwa okudhana omaudhano getu ogendji pethimbo lyomutenya, noshikwawo otatu ga topola moongundu mbali” osho a fatulula. Omaudhano gokongulohi ngoka ga kala haga dhanwa mEtitatu nEtitano otaga kala haga dhanwa mehulilo lyoshiwike pokati kotundi 13h00 notundi 18h00 pokapale ka Sam Nujoma oshowo hoka kopoUnivesiti ya Namibia.

Hoebeb okwa ti omalunduluko ngaka itaga gumu elandulathano lyoliha yomumvo 2015/2016 omanga uudhano woCosafa inaawu tameka. Omutonateli gwokapale kEmanguluko  moshikondo shuudhano ,Abraham So-Oabeb okwa ti okapale okena oku kala monkalo ombwaanawa uuna tamu ya mu dhanenwe ethigathano  ndyoka enene muumbugantu wAfrica.

“Okangwena  oka pumbwa okumenununa nawa onkene ngele omwa kala tamu dhanenwa omaudhano ogendji nena omwiidhi itagu ka vula okumena nawa omanga Cosafa inaa tamekwa okudhanwa.Oshikwawo okufu kwetu ohaku tameke muApilili ko huka kaku shi okwaanawa nokangwena”osho a ti.

So-Oabeb okwa ti otashi kala oshaanawa noshina ombiliha okukaleka okapale monkalo yili nawa osigo uudhano wa Cosafa wa thiki pehala lyoku ka ethela oospana dholiha dhi dhanenemo oshiwike kehe.

Okwa ti okangwena okatamekele okushungapala kokutya okali taka kukuta nokusa  pomahala gamwe omvogu, molwashoka ngoka a li a pewa iilonga yoku opaleka  okwa li okondalaka ye ya thiki pehulilo.

LEAVE A REPLY

Please enter your comment!
Please enter your name here