Ovanhu vatatu va fila momeva mOmusati

0
337

OUTAPI –Oiponga yomafyo momeva pomikunda da yooloka, osha etifa opo opolifi yoshitukulwa shaMusatin ilipyakidile nomafyo  avatatu va fya omeva peenhele da yooloka moshitukulwa shaMusati.

Ouyelele ou owa yandjwa komunambelewa wopolifi moshitukulwa shaMusati Shisande Anna Kunga.

Shisande Kunga  okwa ti, okamatyona komido heyali Hendrik Mwakemeni Munepapa ,okanaudu koshinona oka shikula vakwao vali tava limi mepya Etine oshivike sha shadjako ovo ve ka shunifa meumbo omo inaa kaka fikamo. Otaku fekelwa kutya pamwe okwa li e udite enota nokwa ka nwa metale li li mekove lavo. Inaku shiivika nghee sha  enda, noke ke li tuwa ke li kombada yomeva konima yefimbo. Oshiponga sha ningilwa pOmbulumbulu moshikandjohoololo shaRuacana  nepako ola ningwa pOmbulumbulu mEtivali loshivike eshi.

Nande odula inai talameka naanaa omeva mahapu moikwatelwa yomeva, Shisande Kunga okwa shiivifa vali efyo lomunamido 71, Anastasia Shiwoepa wokEhungaelo moshikandjohoololo shaAnamulenge oo a li yoo omunaudu woshinona, na ye a wila momeva. Nakufya okwa li aka teka omeva ketale, no kamona eshi ka mona a kala ko oke mu landula. Oka hanga a kaama kombada yomeva. Oshiningwanima eshi osha ningilwe mEtitano ladjako nomudimba waye ou li kopolifi yaKahao.

Shisande Kunga ta shiivifa vali efyo lokaana kodula imwe kokakadona Lugambo Josaphat oko kOtshalindi moshikandjohoololo shaTamanzi  moshitukulwa shaMusati. Pahokololo lomupolifi Kunga, okaana kodula imwe ina okwe ka fiya ka kofa eshi e ke likosha kokaikoshelo, mokupenduka ke udite enota oka ka konga omeva kepata, taka hetekele okunwa  mevela  lomeva nokuwila mo. Ina ou a li oye aeke okwa hanga ka xulifa nomudimba wako ou li kopilifi yaKahao.

Omunambelewa wopolifi Shisante Kunga ta kunghilile oshiwana shi kotokele oiponga hai dulu oku henukwa ngaashi okufila oshisho ovanaudu voshinona momaumbo etu, oshoyo okuva kotokela va ha tauluke omeva moyana odula ngee ya ka loka.

 

LEAVE A REPLY

Please enter your comment!
Please enter your name here