Peter Ondume yomomufitu: Esiku etiheyali 7 Mai 1986

0
364
Peter Jungle Fighter

 

Konima yokuiyoga Du Plessis okwa lombwele Smith opo a thindikile ndje mehala lyokuhepekelwa  opo a ka pule ndje ishewe. Du Plessis okwa adhika nale mehala ndyoka a tegelela ndje sho nda thiki mo. Okwa tala ndje nawa konyala uule wominute ntano no inaa popya nando ewi limwe, nokwa li iipuku komutse mo kwaa itaala. Okwa lombwele Smith opo emu kwathele opo ya mangele ndje koshipundi shoshitenda omanga inaa tameka okupula ndje omapulo ga landulathana. Pethimbo ta pula ndje ngaaka okwa li ta dhiingoloka ndje. Epulo lyotango oondyoka ngele onda li ndi ilongekidha okumu lombwela oshili kombinga yiinyangadhalwa yandje meni lyaNamibia. Ngame onde mu yamukula ndati eeno ondi ilongekidha.

Konima okwa lombwele ndje ndi hokolole. Onde mu hokololele shoka nde mu lombwelele nale, okwa ti nandi mwene oshoka okwa li tandi mu hokololele “ondoya” ndjoka ye ngashingeyi a li a vulwa okupulakena. Konima yaashika Du Plessis okwa tameke ta dhenge ndje nopeipa onkunkutu sigo oosho a mwena oku shininga kuye mwene.

Ohaluka mehala moka omweya omuhepeki gumwe omutiligane, ngoka a ningitha opo ndi gandagulwe ku Du Plessis. Ngoka a lombwele omutiligane omukwawo kutya onda tindi okuyamukula omapulo ge, onkene onda pumbwa okudhengwa nawa.

Sho a lombwelwa iifundja ku Du Plessis omuhepeki nguka okwa tameke ta thindile kumwe omayulu gandje kumwe oshowo wo ta thingonona omakutsi gandje onga ngoka a li a hala okusithandje oshimpwininika, nenge okumweneka ndje ndaa kale tandi vulu okufudha. Konima yokathimbo ye okwa tile ndje omeya omatalala omanga inaa tula ndje koongodhi dholusheno komakutsi kominwe oshowo kiilyo yandje yopaumwene. Ayihe mbika oya ningilwa momeho gaDu Plessis ngoka a li ashike a kuutumba a mwena owala ye tala ndje a fa eetela ndje ohenda kombinga yaashoka kwa li tandi ka ningilwa. Ombalambala okwa lombwele omuhepeki omukwawo opo a ethe po shoka noku kutha ndjeko koondhalate dholusheno unene tuu kiilyo yandje yopaumwene. Shika okwa thiminikwa eshi ninge konima yoku ndhindhilika kutya ngame onda li tandi kugu unene noonkondo. Du Plessis okwa dhimi eshina, ihe nando ongaaka okwa londodha ndje kutya ye okuna oonkondo okulonga nangame ngaashi a hala omanga pethimbo ndyoka a li ta lyata ndje koompadhi noongaku dhe oonene.

Okwa lyata ndje nomabutsa ge konima shono a tilitha ndje kutya ota ka dhipaga ndje. Du Plessis okwa ithana omuhepeki omukwawo opo ya ye pondje, mpoka ya kala uule wominute omulongo. Okuza mpoka Du Plessis ina galuka esiku ndyoka. Ihe mukwawo ngoka okwa galuka okuya a kutheko oongodhi dholusheno kolutu lwandje omanga Smith inaa thika opo ee a shune ndje mokandholongo kandje. Nguka okwa li ta yolo unene noonkondo, a lombwele ndje a ti epangelo lya South Africa oli na oonkondo okuyeleka noSWAPO. Ye ishewe okwa mbandameke ndje neso okupitila memangeleko ngele onda tsikile okudhiladhila SWAPO. Etata lyesiku ndyoka onda kala nda edhililwa mokandholongo moka  sigo okongulohi sho Smith eya  opo a fale ndje pondje mokutokelwa nokulala kwandje mpoka ngaashi handi shi ningilwa esiku kehe okuza tuu esiku nda kwatwa kaatondi yandje. Ina pa ndje ndi lye ongulohi ndjoka osigo ongula yesiku lya landula sho eetele ndje uupambu uyali womboloto onduudhe nokoothiwa yaana osuuka. Nonando onda li nda hepekwa esiku etiheyali omahepeko nomaningo nayi ngoka itaga vulu okuyelekwa naangoka ndali nda ningilwa omasiku gahamano gotango, onkene esiku ndyoka onda li ndi uvite hwepo.

Okuza mesiku etihetatu 8 Mai 1986 sigo omasiku 10 Juli 1986 sho nda lundululilwa kondholongo ya Ndangwa onda kala nda edhililwa mokandholongo haka. Pethimbo alihe ndika ewi lyandje lyomeni olya lombwele ndje kutya ngame inandi gandja po ekondjelomanguluko onkene onda tokola okwaa hathatuka nando osha shinasha niilonga yandje. Mondholongo mOndangwa onda li ashike nda pulwa omalupita, nolundji osha ningwa ngele aatondi yandje ya hala ndi koleke shoka nde ya lombwelele nale. Nenge oya pula ndje uuna ndoka ya kwata nenge ya dhipaga omukondjelimanguluko nenge ya hala tu koleke ngele otu shi omukwiita nenge aakwiita mboka. Ihe mesiku eti 11 Mai 1986  Du Plessis naakwiita aatiligane yane oya fala ndje kehala limwe hoka ya ka tula ndje mehala eshona mwali muna omayoka. Okuza mokandholongo moka Du Plessis okwa si oshimpwiyu kutya ngame onda li nda mangwa komeho oshowo onda li momalyenge nomiiketanga. Elapi lyokomeho oye li kuthako ashike shono nda li nale mokati komayoka. Shoka shika sha ningwa, onda mono omayoka taga inyenge komagulu nomaako gandje, omanga Du Plessis ta tilitha kutya ngaka ota ga ka lumata ndje ngele onda tameke okuhokolola iifundja. Okwa tameke ihe okupula omapulo ge goshito. Molwashoka onda li nda tila omayoka onda li tandi igidha unene pehala lyoku yamukula omapulo sigo oosho eyoka limwe lya tameke okweenda mothingo yandje naashika osha thiminike ndje oku li teya inaandi shi ningila owina. Shoka sho shaningwa omukwiita gumwe mbalambala okwa egulula omweelo noku igidha kutya nangame ondina okudhipagwa ashike naanaa ngaashi ngame nda dhipaga eyoka ndyoka.

Nande onda uva nokulesha omahokololo gatya ngaaka ga ningilwa yalwe, ngame kandali ndi ilongekidha okukala pamwe niihono mbyoka, sho shika osho sha thiminike ndje ndi dhipage limwe lyomomayoka ngoka. Shono tuu nda zimo momayoka, ye Du Plessis pamwe nomukwiita gumwe oya tameke okudhenga ndje sigo oosho omukwiita gumwe eya mweneke konima sho nda gwile pevi. Oya manga ndje ishewe komeho noku fala ndje kondholongo, hoka Du Plessis a ka soshimpwiyu kutya onda futila eyoka ndyoka. Okwa fala ndje mehala lyokuhepekelwa noku lombwela aakwiita yaali aaluudhe  ya mangele ndje koshipundi shoshitenda  omanga nguka inaa tameka nokudhenga ndje  nosjamboko. Okwa dhenge ndje miilalo iikulu, mbyoka ya tutuluka nokuza ombinzi olutu aluhe.

Sho a dhenge ngaashi a hala noku uva nawa kiilonga ye okwa etha ndje nelaka kutya ota ka galuka opo eye a dhipage ndje niikaha ye mwene. Okwa yi pondje uule wokathimbo okafupi, ngiika opo a ka hile omakaya molwashoka okwa li omunwi gwomakaya shinene, sho a galuka pondje  okwe ya ashike eta kuutumba a tya thilu ta lesha ashike oshinyolwa she  nomathimbo gamwe okwa ya kele ndje omeho no inaa tya sha.

Ihe konima yokathimbo okwa pula ndje ngele onda hala okushuna koSWAPO. Ngame onda yamukula ndati aawe itandi shuna ko, shika oshe mu ningitha iiyolithe okana konyala kwapwako. Konima okwa gandja elombwelo kutya nandi falwe pondje pomutenya.O shoka okwa koneke kutya onda li tandi kakama, ngiika shimwe umbanda nenge pamwe shimwe omoluutalala. Oshoka kandali nda zala sha shoka sha li tashi gamene ndje kuutalala mboka wali wa geya noonkondo. Okuza esiku ndyoka Du Plessis ngele okwa dhenge ndje, uuna ashike ngiika a li uuvite a hala okushininga osigo esiku ndyoka ngame ndi iyaka miikaha yomutondi gwandje pamukalo omukumithi kohi yoondjembo dhomutondi mesiku eti 30 Kotoba 1986.

LEAVE A REPLY

Please enter your comment!
Please enter your name here