Sunny Boy noalubuma “P.A.S.S THE H.I.K.W.A”

0
447

Onkulungu mokwiimba oongalo ndhoka dhoHip-hop noKwaito (Hikwa), Andreas Sunday Shipushu, a tseyika nawa nedhina Sunny Boy, ote shi enditha nawa moalubuma ye ompe yedhina “P.A.S.S THE H.I.K.W.A”. Pinehas Nakaziko ta kundaneke ngeyi:

WINDHOEK Oalubuma ndjoka yali ya tseyithwa mefudho lyaDeseemba noyi na omusholondondo gwoongalo dhi thike po 17, oya talika ko ongo oyo iilonga yaSunny Boy mbyoka alonga nuudhiginini okuza sho ali eya mowela yokwiimba.

Nonando Sunny Boy haye naana omuhikingalo ngoka omupe mo ku imba, oalubuma ye ndjika ompe ota yi ulike eyooloko enene pokati koongalo dhe ndhoka a kala no ku imba, naandhoka oompe, ngele tashiya pomikwelengendjo, niitya mbyoka yili muungalo we.

Sunny Boy okwa ti okuyapo nedhina ndyoka lyoalubuma ompe, okwati “P.A.S.S” oshililepo ashike  edhina lye pakuudha, Panduleni Andreas Sunday Shipushu, omanga ‘H.I.K.W.A’ omulyo gwoongalo ndhoka ha imbi.

Sunny Boy okwati ohokwe yoongalo dhe oshi li ongo shitopolwa shonkalamwenyo ye. Okwa gwedhapo ta ti oyendji oya kala noku ipula kutya ye ita imbiwe konima sho ali amwena po okuza mo 2013, moka ali apititha oalubuma yedhina Business and Pleasure. “Konyala konima yoomvula adhihe ndhoka onda kala nokulesha ehangano lyoongalo moNamibia noku ilonga nkene ndina okuya po nomukalo omupe gwokutaandelitha oongalo dhandje ndhoka ha ndi imbi (Hikwa),” Sunny Boy ta ti ngaaka.

Moalubuma ota mu adhika ngaashi ongalo ndjoka yedhina Shikulako, ndjoka yali yemu tula pamuthika gwopombanda okuza sho ali eyi imbi koBig Brother Africa mo 2014. Ongalo otayi popi kombinga yokugwila mohole.

Otamu adhika ishewe ongalo ndjoka, Enough, ta kwathelwa ku Sally no ta yi popi kombinga yomahepeko ngoka ta ga ningilwa aakiintu methimbo lyongashingeyi. “Onda itaala kutya omahepeko geli ngeyi ina ga taambiwako nando omoshilongo, no kapuna ngoka ena uuthemba wokushininga,” Sunny Boy ta ti ngaaka nomuthindo.

Omulyo gwoongalo dhe ngoka omutoye toye ogwali gwa landula sho Sunny Boy  a uvathana pamwe naaningi yomikwelengendjo ngaashi Arrafat, Elvo, K Boz, Glo naTaz. Aahikingalo mboka a imba pamwe nayo ongaashi Tate Buti, The Dogg, Tequila naChipolopolo.

Okwa ti okui uvite uugumbo nokwanyanyukilwa oalubuma ndjika molwaashoka ota yi ulike oshitopolwa shayooloka kombinga ye, ishewe ota yi inyenge nawa mooradio dhomoshilongo, nokwa hala ishewe yi ye pondje yoshilongo.

LEAVE A REPLY

Please enter your comment!
Please enter your name here