Aavali ya thigwa pomutenya naanona yawo

0
880

 

ONDANGWA – Aavali oyendji mboka yali yena uunona wawo hawu hiti enongelo poskola yaRhodes, oyali ya thigwa pomutenya pamwe nuunona wawo no yaana kutya otaye wu fala peni konima sho osikola ndjika yali ya lombwelwa yi pate omakumba gawo mbala molwaashoka osikola inayi shangithwa kuuministeli.

Oskola ndjika yopaumwene ya Rhodes yi na okutameka po Pre-Primary sigo ondondo ontitatu, oyili momudhingoloko gwOkangwena mOndangwa, no yali ya konekiwa tayi longo yaana omikanda dhi ihwapo , nonande yali anuwa ya lombwelwa ya konge omikanda oshowo ya kale ya mona epitikilo.

Nonande osikola oyo tuu ndjika yali ya tseyithilwa koshikondo shelongo omathimbo ogendji omumvo gwaziko yo ya konge omikanda, okwa hokololwa ya dhini oveta no inaya longamo shoka yali ya pulwa.

Okuya pehulilo lyo 2015 oyali ya lombwelwa lwahugunina opo ya pate oskola oyo tuu ndjika yo yaa tameke iilonga mo2016 omanga inaaya mona epitikilo lyokulonga.

Metitatu lyoshiwike sha ziko osheendo shaza koshikondo shomathaneko muuministeli welongo mOshikondo oshali sha kutha onkatu, nokutalelapo oskola ndjika ya Rhodes Private yo ya tale ngele elombwelo ndyoka ya gandjele omvula ya ziko olya tulwa ngaa miilonga.

Omunambelewa omukuluntu melongo mOshikoto aza koshikondo shomathaaneko ngono ali a kwatela osheendo komeho Justina Amupolo okwa hokolola kutya oskola ndjoka oya kala noku tuminwa oombaapila opo ya konge omikanda oshoka otayi longo shaali paveta.

“MuJuni otwali twa shanga ombaapila mono tweya lombwela opo ya konge ehala limwe oshoka mpono haya longele pethimbo ndika eshona unene, noongulu ka dhili pamuthika, otweya tseyithile ya pate thilu mo2015 ashike inayi iyutha kelombwelo, oya tseyithilwa opo ya lombwele aavali ya kongele aanona yawo oosikola ndhoka dhili popepi ashike inaya tseyithila nande aavali oya tsikile owala niilonga omvula ndjika,” Amupolo ta ti ngaaka.

Osikola ndjino yili mewiliko lya Eward Khudumo na Andrea Kavindja oyina aalongwa yeli 310 oshowo aalongi yeli 9. Ondondo yotango (a) oyina aalongwa yeli 60 omanga grade1(b) yina aalongwa yeli 80, shono taku tiwa aanona oyendji unene mongulu yimwe.

Christof Simvula gumwe gomaavali okwa ti oyu uvite nayi noonkondo noya thigwa noomwenyo dha  lindimana oshoka ka yena mpoka taya fala uunona wawo, noosikola odhindji odhu udha. Wumwe womuunona wetu sigo onena inawu mona ooskola no tatu kambadhala opo tu kale twewu monena wo wuye komeho nelongo lyawo, shoka shu umbwa sha piti.

Aavali oyendji ka yali ya nongela kutya oskola ndjika ka yili paveta no kayena omikanda oye ya owala yi itse musho esiku ndyoka ya tseyithilwa ndhoka.

Omukuluntu gwelongo mOshikoto, Lameck Kafidi okwa ti osikola ndjika oya dhini oveta oshoka pakatendo oka 42 okeshi yeleka kutya kehe ngoka a hala a totepo osikola yopaumwene na kale ena uuthemba wa gwana ye a shangitha oskola oyo tuu ndjoka manga inaa tameka iilonga, ashike okwa holola oku uva nayi kwe molwaashoka Rhodes okwa tameke okulonga opo nawa a ka tameka ta kongo omikanda, ye ta dhini elombwelo lyuuministeli.

Osikola oya lombwelwa yi pate omakumba gawo, yo yi ishangithe nokukonga omikanda ndhoka dha pumbiwa nongele hasho otayi ka katukilwa onkatu mbala. Kafidi okwa ti ngele opuna oosikola dhilipo tadhi gandja elongo ihe inadhi shangithwa noku kala dhina omikanda otadhi ka longiwa nadho.

LEAVE A REPLY

Please enter your comment!
Please enter your name here