Kamwali omudhimba mohauto yandje  

0
1614

 

Ongwediva- Omunangeshefa gomOmbaye okwa ekelehi omapopyo ngoka ta ga ti kutya okwa kwatelwe kopolisi sho anuwa aadhikile nomudhimba moshihauto she.

Omitoto odha li dha taandela pethimbo lyefudho kutya omunangeshefa Andreas Armas okwa kwatelwe kopolisi yopOshivelo sho aadhika nomudhimba gwomulumentu ngoka ta ku fekelwa adhipagwa anuwa omolwokwiikoleka nenge moluupule.

Armas anuwa okwa li mondjila okuza kuumbangalantu uuka kOmbaye sho omunambelewa gwekondololo lyOmavu gIimuna pOshivelo a mono kutya omufaalelwa ngoka ta ku tiwa okwa kotha okwa li omudhimba gwa zalekwa omutsuhu [oshuta] negala. Sho anuwa a pulwa a lombwele omufaalelwa gwe a ze mo moshihauto a ka lyate andola pokakumbatha komuti gomukithi gwekondo nelaka, Armas anuwa okwa yamukula kutya omuntu ngoka okwa kotha. Sho inaavula okumu pendula, oshaka monika mo nee kutya omuntu ngoka okwa sa.

Armas ngoka ena oongeshefa muumbangalantu nomOmbaye ndhoka dha kwatelamo oombesa, omambakumbaku oshowo oondunda dhomanwino hadhi ithanwa Sands of Armas, okwiikuanyuna omutoto ngoka. Opolisi nayo woo oya koleke kutya ina yo lopotelwa oshikoya shafa mpoka.

Armas okwa ti okwuuva ehokololo nomutoto nguka ta ti omalundilo ga ningwa kaanandumbo mboka ye na ondumbo molwiilonga ye yuupenda noyoonkondo.

“Aantu yamwe aananyalo, nuuna ta ya mono kutya ngoye oto longo nuupenda no wu uka komeho monkalamwenyo yo ota ye ku totele omahokololo,” osho a ulike.

Armas okwa ti ye okwa yile kuumbangalantu momasiku 17 Desemba omvo gwazi ko, koohango dhaakwanezimo oshowo oku ka dhana Okrismesa nOmumvo Omupe. Ye kuumbangalantu okwa zileko momasiku 2 gaJanuali nuumvo okushuna kOmbaye.

Omanga a li kuumbangalantu omuntu gumwe komunkulofuta okwa taandeleke omitoto kutya anuwa sho Armas inaa monika mOmbaye pethimbo ndyoka anuwa okwa edhililwa mondholongo yopolisi mOshomeya.

“Ngame onda Ii pomatyapulo gofamili oshowo gopomukunda gwetu. Kehe gumwe okwa mona ndje. Otashi vulika ngiini ndi kale poohango, puudhano wetanga oshowo nda ningile oshituthi pomukunda omanga anuwa ndili mondholongo? Onda kala nokudhengeIwa oongodhi tandi pulwa ehokololo ndika, naashika otashi uvitha na yi. Aantu na ya ethe okunyateka edhina lyandje.”

“Oya ningile oshinima shoka nomunangeshefa omukwetu pOmaalala, ngoka ya totelele omahokololo kutya okwa adhikile nomitse dhaantu mongeshefa ye. Aananyolo mboka inaa ya hala okulonga na ya ethe okutota nokutaandeleka omitoto kombinga yaantu mboka ta ya longo nuupenda opo ya hupe oshowo yeetepo oompito dhiilonga oku dhi pa aakwashigwana ooyakwawo,” osho Armas a popi a thita po.

Kakele ku Armas, omunangeshefa omukwao gwopOmaalala tuu mpoka Sigo Amunyela ota ti naye woo okwa ningi omasiku ta yakula oongodhi tadhi zi kookuume ke naakwanezimo ta ya ti oyuuva oye ta popilwa oshikoya oshoka.

“Aantu oya tumakanitha edhina lyongeshefa yande no Sands of Armas. Edhina lyongeshefa yandje oSande Bar. Ashike nee nande ongaaka, ota ya lundile Armas, aantu oye mu totele ehokololo lyiifundja yowala,” Amunyela tati ngaaka.

Omugandjimalombwelo mopolisi moshitopolwa Oshikoto, Kommissiona Anna-Marie Nainda okwa koleke kutya moshitopolwa she inamu nyolwa oshipotha sholudhi ndoka. Sho ishewe ine shi tseyithilwa.

“Onda dhengela oosasiona adhihe dhopoIisi moshitopolwa shandje ihe kamuna nando oshiningwanima nenge oshipotha sholudhi ndoka sha shangithwa,” Nainda a ti.

LEAVE A REPLY

Please enter your comment!
Please enter your name here