Kwateni Nawa oimaliwa yeni –Ndeitunga

0
477

OSHAKATI – Kakututu komatanga opolifi Ndjai Sebastian Haitota Ndeitunga okwa kumaida ovapolifi opo va longife nawa oimaliwa yavo, voo va kwafe eefamili davo nokutunga omalutu avo nawa.

Omanga a li ta popi pefimbo lokupitififa mo ovo vali tave li deulile oupolifi kokamba yedina Ruben Danger Ashipala Training Centre oyo ili kOndangwa, Ndeitunga okwa ti ovapolifi vamwe ohava longifa oiyemo yavo nai.

Oshivilo shepitifomo eshi osha li sha ningilwa kokapale komaudano kOshakati.

“Umwe oto lande ashike omuTV wakula wakula, neRadio, ove keumbo ino tunga ko nande onduda yokunangala. Vamwe ngeenge mwa pewa oufudo komaumbo iha mu i ko, oha mu kala tamu fufya kutya otamu longo eevili 24, omafiku a heyali moshivike, mboli omunhu ouli ashike omo wa hondama. Ngeenge mwa fuda po, indeni komaumbo, ka talelei po ovakulunhu,” Ndeitunga ta kumaida.

Inspector General ta kumaida yoo ovapolifi opo va kale tava file oshisho oukolele womalutu avo, opo va dule oku amena oshilongo kookalyamupombo.

“Omafiku enya onda ile koKatima Mulilo, ha ndi mono oukadona veli vavali. Eshi nda tala oukadona ovo okwa li tava monika va utama neenghono. Onda ti, ‘oshike mwa utama ngaho?’ Ova nyamukula nge vati ova hala kukala tava monika nawa [sexy]. Konima yokafimbo onda ka hanga po vali omupolifi mukwao, ta lombwele nge kutya ita tu longo nawa vati shaashi ihatu longo omidjalo odo ta wana. Eshi nde mu tala a ondoka neenghono, nokudilaadila oukadona venya votete vavali onda dilaadila kutya shixwepo ndi hafele oukadona venya va nini momalutu shaashi voo otava dulu oku lotoka noku taataa ookalyamupombo. Hano ita nditi kaleni tamu li fifa ondjala ashike ndalapateleni omalutu eni opo mu dule oku linyenga nokukatuka nawa ngeenge tamu amene oshilongo.

Pomhito opo tuu opo, Ndeitunga okwa lombwela oshiwana kutya, omutumba wali ko wookakukutu mopolifi, owa tokola opo omadeulo opolifi a kale haakala oule weemwedi omulongo nambali.

Ta ti, ongudu yovapolifi ovo vaanifwa Etitano la djako, oyo tai li xulu okudeulwa eemwedi hamano adike.

LEAVE A REPLY

Please enter your comment!
Please enter your name here