Minista Namoloh ina puka

0
345

Oshiwike shino oFacebook oshowo oTwitter oyali ya mbombolokelwa nomauyuvo geli ompinge naashona shali sha popiwa koMinista yEgameno pepito lyaapolisi Oshiwike shayi.

Minista Charles Namoloh okwali iindile oshigwana mwa kwatelwa aavali opo ya hulithe po okutumina oyana mboka yanyengelelwa kelongo kopolisi. Ta ti opolisi kayi shi ehala lyokundumbila mboka kayeshi aanamagano noya nyengwa kelongo.

Namoloh okwali a yelitha kutya opolisi ohayiiyadha yena aapolisi taya nyengwa okushanga, nolundyi egameno ohali iyadha lina omwaalu omunene gwiipotha tayi kana molwa okwaana ewuveko.

Ngiika ina dhenga ngaa ta fudhile nelaka olya honga tuu yamwe koomwenyo, ashike ngee oto tala nawa, muna uushili metumwalaka moka.

Iipotha ingapi yinyanyaleka ya kana molwaashi aapolisi ya dopa okugandya omauyelele, nokuninga omakonaakono ga yela noguuka?

Aantu yangapi ya shunithwa kaapolisi nenge inaaya pewa ekwatho yali yeli pumbwa noonkondo?

Ngele omuntu ho landula nawa iikundaneki ngiika oshili osho shono kutya iipotha oyindji hayi etwa owala kaapolisi mboka aahasha nenge kwaamboka kaye uvi te naanaa kutya iilonga yawo oyuuka peni.

Oshitalalatalala Omukulupe goomvula 83 anuwa a lombwela a ka konge omukonaakoni goshipotha she konima sho a li eya a lopotele opolisi kutya ota ningilwa omatilitho gedhipago komwana nokwatilako nukili kegumbo.

Ashike opolisi yaNdangwa anuwa inaayi mu pupa, sigo tii tutu po positaasi nokushuna kegumbo inaa kwathelwa. Omukulupe nguka ngele okwa ka dhipagwa opolisi oina mo olunyala shaashino oyali tayi vulu okumu gamena.

Mo2014, oshipotha oshinyanyalitha mono omukadhona omugundjuka lela Emilia Mvula Erastus (21) a kanithile omwenyo gwe, a dhipawa pamukalo guumbalimbali nokukwatwa koonkondo manga a li omuniilonga pokandingosho kOnakaheke koshitopolwa shaMusati, oshali sha kana. Aafekelwa moshinima shika oyali yeethwa kompangu yopombabda noshipotha oshali sheekelwahi oshoka aapolisi anuwa oya dhenge aafekelwa pethimbo yali taye ya manga po nokuya pula pula.

Nokehulilo lyomumvo gwayi, omutoolinkundana gwo shifo shoNew Era okwali woo a mangwa po nokudhengwa kopolisi mOshakati sho a li ta thaaneke ookalyaapombo pehala lyaayehe, nonando okwali owala ta gwanitha po iilonga yokuyandjakeneka omauyelele moshigwana.

Iiholelwa oyindji omoyili mokati ketu. Nongele andola omuntu wa ningi omapekaapeko gaantu mboka ya shunithwa ko kopolisi aapeya wu gwanithe egongalo.

Pakutala iiholelwa, omuntu apeya wudhilaadhile kutya pamwe omalayi noohamitsemikukutu mba taya popiwa ku Munista oyo yamwe yaamboka yaashi iilonga yawo?

Nongele mopolisi kamuna nee shili omalayi oto hala okudhilaadhila kutya ano oshike muna ngaa omapuko ogendji? Nenge pamwe edhewulo lyaapolisi nalyo olina ngaa epuko lyontumba?

Omapeko gangapi giimbuluma ga kana mombelewa dhopolisi? Nokuli opena naapolisi yamwe yiiyadha konima yekumba sho ya yaka po omapeko nelalakano oku kanitha iipotha.

Eeno shili ngiika elaka lya minista inali zamo nawa ngaashi oshigwana sha hala nenge ngaashi shali sha tegelela ashike ngiika sha pumbiwa okuuviwako osho shono kutya opolisi inayi ningwa etoto lyaamboka itayaa vulu sha.

Opolisi ngaashi tuu omayithano agehe oya pumbwa aantu yeshi okushanga nokulesha, noyuuviteko pamadhilaadhilo opo ya wape okukwathela oshigwana nondjungu.

Omupolisi kuuviteko kena esiku iihumithe komeho nenge a ninge onkambadhala yokuninga omapekaapeko nkene ta vulu okuhumitha iilonga ye komeho.

Ombedhi ihayi yi moshiti, ngiika opolisi nayo wo oyina natango ompito yokukondopaleka aapolisi opo yi longe iilonga yawo ngaashi osho shuuthwa.

Kakele nee komadhewo gokolutu, oshasimana woo natango opolisi yitse omithindo kiinima yopambelewa mbyono ya pamba opolisi.

Sha simana unene, aapolisi nayo oya pumbwa woo okunkondopalekwa na nkene ye na okulonga noshigwana opo yaa iyadhe nomanyenyeto gaakwashigwana mpoka tashi vulu okuyandwa.

Minista okwa popya nawa sho ati aapolisi ngele ya zi mokamba yomadhewo ina ya tya oya adha, nayiigwedhele ko. Ngele okwali waya mopolisi noGrade10, inda koNamcol e to ningi oGrade 12. Ngele owali una oGrade 12 kambadhala wiishangithe kiiputudhilo yopombanda opo wiiwedhele ko, nangele kushi kulesha natango elongo lyaakuluntu omo lili moshilongo.

Oshili wo sha simana, oku kotokitha aapolisi kutya nawo yoo oya pumbwa okwiiyutha koompango dhoshilongo.

Ewuvitho lyawo lyomuyonena, nenge okulongitha oonkondo hago ekandulepo lyomukundu kalishi owala oshinima shaakwashigwana kakele oshinima sha pumbwa okwiiyuthwa kusho kaaNamibia ayehe aapolisi ya kwatelwa mo.

 

LEAVE A REPLY

Please enter your comment!
Please enter your name here