Peter ondume yomomufitu  [ta tsikile]

0
498
Peter Jungle Fighter

 

Oshafa kutya omasiku gaheyali guudhigu oga hulupo molwashoka omutondi okwa ndopa okumona uuyelele wu na oshilonga okuza konkwatwa yawo yondilo yomumvo ngoka [1986].

Okuza tuu esiku nda kwatwa sigo esiku etiheyali okukala muunkwatwe inandi holola nando uuyelele wa sha kombinga yiilonga yandje yomonanguwi mbyoka nda longele moVenduka, Ombaye, Olindili, Oshaanda, Ondangwa nOshakati oshowo palwe meni nopondje yoshilongo. Oshikwawo inandi gandja nando edhina limwe lyaantu mboka ya kala noku kwatha ndje okuza tuu kesiku nda thikile moNamibia. Sha hala okutya ngame onda gwanitha po euvaneko lyandje kutya kandina esiku nando olimwe tandi ka holola ongundu yaamboka ya kala nokukwatha ndje, iikondjitho oshowo iinyangadhalwa yilwe mbyoka yi na sha niilonga yandje yomeholamo. Oshowo inandi popya sha kombinga yaakwiita yoPLAN meni lyoshilongo. Okuza esiku ndyoka etiheyali nkene nda kwatelwe onda kala nda edhililwa mokandholongo okashona no inandi kala noku ehamekwa nenge oku ningwa nayi konyala uule woomwedhi mbali omanga inaandi tembudhilwa kondholongo yokOndangwa.

Ethimbo okuza momasiku 11 Mai sigo 9 Juli 1986 olya li ngiika ethimbo oku pa ndje ompito oku zula ndje oshowo okudhimbitha ndje oshindji. Otandi ti ngiika osha li ngaaka molwashoka iilongithwa yetanga lyomutondi oya kala noku pula pula ndje omapulo pwaana okudhengwa kwasha, ngaashi sha li petameko. Ihe nando inandi dhengwa onda kala ngaaka handi ningilwa omatilitho geso, gokudhengwa nenge omambandameko gomaludhi ga yooloka.

Okandholongo hoka okashona moka nda kala nda edhililwa okali ka kaka noonkondo. Mo ishewe omwa li muna eyemele lyoku iwatelela ndyoka lya kala hali ilwamo opo li ka tilwehi omathimbo gamwe konima yomasiku gane lwaampo. Onda li handi lala polupanda inaapu yalwa sha no handi isikile okakumbatha okashona ko okaluudha noonkondo ethimbo alihe ndyoka nda kala nda edhililwa.

Ihe shoka sha li sha simana kungame manga ndali mokandholongo hoka osho uumbulukweya wuukotse wopakwiita oshowo okambindja  hoka nda li ndapewa komutondi opo ndi zalemo. Oshikwawo onda li wo nda pewa ompito yokwiiyoga  nawa konima yomasiku gane kehe. Ihe nando onda pitikwa ndi iyoge ngaaka kandali nda pewa othewa nenge ootu omagadhi govaselina, oshowo inandi pewa ootu nando oko okavasa komoshipala ndi ithekule omeya konima yoku iyoga. Ihe shika oshishi okupandulwa oshoka okuza tuu nkene nda kwatelwe onda li nda zala okotse nokambindja okuyeleka naasho nda li ashike handi kala nda zala okandholombuluku oko akeke kutya nee okwa li kuna uutalala wu thike peni.

Okamba yoonkwatwa oya li ya topolwa momahala gatatu, limwe oondyoka hali kalekwa oonkwatwa dhoPLAN ndhoka opo dha kwatwa.  Muka omo wo mwa li hamu kala oonkwatwa ndhoka dha talika ko dha nika oshiponga. Ombinga ontiyali oomoka mwa li mwa edhililwa onkwatwa ndhoka dha talikako dhaana we oshiponga shasha. Omanga ontitatu omwa li mboka ya lunduluka mombepo noku ninga aakwiita yomutondi haya longo yafa ooguerrilla ndele oondhoka dhiifekela. Ondholongokamba ndjika oya li onene shili, no ya kundukidhwa komituni dhomavi hoka kwa li kwa dhikwa iipeleki ya dhengelwa koongudhi dhiiti. Ekuma lyiipeleki ndika olya li lya kolekwa nomikweyo dhondhalate yomakwega dhi lyaathane popepi. Ndhika odha li meni osho wo kombanda yiipeleki.

Oshikwawo okamba ndjika oya li ya kondekwa nomalamba omanene goku minikila. Ngaka oga li ga tulwa lwopevi lyekuma lyomavi. Mokamba omwa li muna ootenda konyala dhili ntano oonene mbali odha li kombinga yokuuzilo moka mwali hamu lala akwiita aakulu yoPLANA mboka ya ningi esiku yeli oonkwatwe. Mbaka oya li haya kala mo pamwe naakwashigwana mboka opo ya kwatwa.Kuuninginino okwa li ootenda ndatu mundhoka mwali mweedhililwa aakwiita mboka ha ya langele oonkwatwa.

Omwa li wo uukololo uyali wa tungwa noondhopi wa siikilwa nooshako dhomavi, omakololo nenge oludhi lwomalambo moka aantu haya pulapulilwa omapulo. Opwa li wo omandoloma giiyela ga tungilwa mokaungulita konyala  gena uule woometa omilongo mbali go ogena uunene woometa mbali lwaampoka. Omandoloma ngaka ogali haga longithwa oku edhililamo oonkwatwa dhoPLAN ndhoka dhi wetike dhina ontseyo oyindji ngaashi ngame. Gamwe gomomandoloma ngoka oga li ga siikilwa nokathaila kombanda oku keelela mwaalokwe.

Pethimbo lyoshiwike shotango sha Juni 1986 omukwiita gumwe gwondondo yuuLeitenanda hiithanwa Van Zyl gomiilonga yomonanguwi metanga lyomutondi okwa li a pula ndje .Okwi itseyitha yemwene kutya ye omutseyiveta paithano a za koVenduka. Okwa hokolola kutya okwa li miilonga mbyoka ta gwanithapo ashike omimvo dhe mbali hadhi dhengele dhiilonga yopashigwana. Van Zyl osha fa a li uuviteko kombinga yomiyonena ndhoka dha li hadhi ningilwa aakwashigwana komatanga gegameno.

Pethimbo lyoonkundathana dhetu naye okwa li a gandja uusama kepangalo lya South Africa sho lya li moNamibia kehalo lyalyo lyene, eli pe ombedhi molwashoka lyeetamo okatongotongo nomulandu gwokakombo noludhi. Konima okwa hokolele ndje wo kutya ye iniitula moshilonga shoka, okwa li ashike nokuli te shi longo molwashoka a thiminikwa oku shi longa kepangelo. Okwa li ashike tapopi opolitika pehala lyokupula omapulo ngoka ga li ge mu enditha.

“Ngame inandi ya mpaka oku ku dhenga ngaashi yalwe ya kala noku shininga, ngame omutseyiveta ngoka uuviteko oompango dhopaigwana oshowo dhiita. Onda hala tse tu kundathane ongo ookuume ndele ha ngaatondathani” osho Van Zyl a lombwele ndje.

Van Zyl okwe shi fatula nawa kutya ye ke hole Uukommunisme, oshowo aaRussia naaKuba mboka ya li ya hala okuya muka oku ya kolonyeka oshowo oku ya yuga kehe shimwe. Okwa kala tapopi kombinga yiinima ya yooloka konyala uule wootundi mbali omanga inaa thiga ndje motenda anuwa ta ti ota yi a ka kothepo.

Van Zyl okwa li ta nu okoothiwa yoonkondo, ndjoka a pendje ndi nwemo konima sho a tsikile nomahokololo ge kombinga yiinima yi na sha niita. Konima yokathimbo okafupi Smith okwi ile ndje opo a ka patele ndje mokandholongo.

Inandi tseya kutya Van Zyl omolwashike a li ta popi kombinga yiinima ya yooloka, yaa nasha niinyangadhalwa yandje, nonando onda dhiladhila kutya ngiika otashi vulika a li a hala okutala nkene tandi ihumbata kombinga yaashoka a li ta hokolele ndje. Omupya oongoka kutya ngame inandi popyako nando osha kwaashoka a li ta popi, onda kala ashike nde mu pulakena nda tya tuu thilu.

Ishewe konima yomasiku gaali Van Zyl okwa galuka eya nomapulo ogendji. Pethimbo ndika okwa li ta monika iitulamo, nonando ongaaka ina ninga nando onkambadhala okumbandameka ndje kutya ono mu kalo gwontumba nenge gwongandi. Gamwe gomomapulo ngoka a pula ongaashi kutya olye ta ka sindana miita, Swapo nenge South Africa. Kombinga yepulo ndika onde mu lombwele kutya otatu ka tseya ashike kutya omusindani olye pehulilo lyiita. Omapulo omakwawo oga li ngele ondi ilongekidha okujoina etanga lyaSouth Africa, kepulo ndika onde mu yamukula kutya eeno ondi ilongekidha. Okwa li wo a pula ndje kutya iilongo ingapi nda talelapo, onda dheulwa peni. Okwa li wo a hala oku uva kutya aantu yangapi nda dhipaga okuza kesiku nda joina o PLAN. Okwa li wo a hala okutseya kutya aantu mboka nda dhipaga oyo oolye. Okwa li a hala oku uva kutya ookomanda dhandje oolye noshowo kutya onda lwa omalugodhi gangapi omanga inaandi kwatwa. Van Zyl okwa li a hala oku uva kutya openi nda holeka iikondjitho yandje noshowo ngele ondi shi mpoka pwa holekwa iikondjitho moAngola nomoNamibia.

Nonando onde mu pe omayamukulo gafaaathana naangoka nda li nda pe yakwawo, kapena nande opo mpito yimwe Van Zyl a li a mbandameke ndje. Pethimbo lyoonkundathana onda li ndu uvite ndaana uutile washa, kakele onda li ndiikotekele opo ndaa gandje nando omayamukulo omape kwaangoka nda kala noku gandja ethimbo alihe. Shika onde shi ningi oshoka onda li ndishishi kutya Van Zyl nenge omuntu gulwe ota ka galuka ee a pule ndje omapulo komayamukulo ngoka.

Van Zyl okwa longitha embo lye lyokunyola oshowo eshina lye lyokukwata omawi oku nyola noku kwata omayamukulo ngoka nda gandja. Ngaashi ashike nda ningile petameko onda kala nda kotoka opo ndaa popye iiholekwa ya pamba iilonga yandje.

Moonkambadhala ndhika adhihe onda ndhindhilike kutya aatondi yandje, kaya li yi ilongekidha okudhipaga ndje molwashoka oya li ya tegelela pamwe otandi keya lombwela sha shina oshilonga oshinene. Molwashoka kandali ndi shishi kutya mbaka oya hala naanaa shike.

Mu Juni Du Plessis okwa ka holoka eende pamwe naatiligane ooyakwawo. Okwa lombwele mbaka a ti nguka oye oshikulo sha nika oshiponga oshoka nonando okwa dhengelwe sigo otagu hala okupwamo nguka ine mu hokololela shoka a hala okuuva. Okwa uvaneke kutya ota ka longa nangame sigo esiku ndyoka tandi mu hokololele oshili.

LEAVE A REPLY

Please enter your comment!
Please enter your name here