Standard Bank a gandja omukuli kolusheno lwetango

0
272

 

WINDHOEK-Ombaanga yo Standard ya Namibia oya ningi ehangano lyotango moshimpungu shiimaliwa mokugandja omukuli kehangano hali dhike po oosasiona dhoku kwata olusheno lwoonte dhetango.

Omukuli gwongushu yooN$170 oomilliona tagu shunithwa uule womimvo dhontumba ogwa gandjwa konima sho Ombaanga ndjika ya shaina euvathano nehangano lyolusheno lwetango lyedhina Hopsol Power Generation. Eshaino lyeuvathano ndika olya ningilwe omwedhi gwayi.

“Ndika euvathano lela kombaanga yoStandard no tu uvite uuntsa okukala melongelokumwe nehangano ndika lina ondhilo yaanokapethili. Oshikwawo otwa nyanyukwa oshoka otse ombaanga yotango nenge ehangano lyotango hali longo niimaliwa ta tu gandja oshimaliwa okutungitha ehala lyokugongela olusheno okuza ketango moNamibia”.

“Ongombaanga tse otwi itulamo moshinima shoku longitha oonzo ndhoka ihaadhi pupo nelalakano okukala moshilongo shina oonzo dholusheno dha gwana dho itaadhi pupo oshowo shina egameno ngele tashiya mokukala nolusheno esiku kehe nethimbo kehe. Oshikwawo tse otwi itulamo mokuhumitha komeho ekoko oshowo eyambukepo lyoonzo dha Namibia dhopaushitwe, sho tatu kwathele oshilonga shika tashi longitha oonzo dhopaushitwe ndhoka ihaadhi pupo” osho Manus Grobler omuwiliki gwomaliko mOmbaanga ndjoka a popi.

Hopsol ehangano enene moshitopolwa shokutunga omahala gokugongela olusheno lwoonte dhetango moNamibia, olya koleke euvathano  nOmbaanga  ndjika okufutila osasiona yolusheno nduka ndjoka ya tungwa mOtjiwarongo no yi na omwago goku gandja olusheno lwooMegawatt dhili ntano oshikwanu hamano.Ehala ndika olya egululilwe okulongithwa  muNovomba omvogu.

“Elongelokumwe ndika nekwatathano olya li lyeende nawa, lya ningwa paithano oshowo mombepo ombwaanawa.Ombaanga ya Standard oye tu pe eyambidhidho nekwatho kehe twa pumbwa ndyoka tse twa li ta tu kongo moshinima shika. Otwa li wo twa adha etsokumwe mbala” omuwilikipitithi gwaHopsol Power Generation, Omundohotola Robert Hopperdietzel  ati.

Okwa ti shika osho owala etameko lyoopoloyeka hetatu ndhoka  tatu ka longa moshilongo. “Tse otatu kongo omulongi pamwe natse uule wethimbo okuyamukula ompumbwe yetu yomukuli goomilliona dhoo dolla 800. Iimaliwa mbika otayi ka longithwa moopoloyeka dhiikwamalusheno methimbo lyomimvo ndatu sigo ne molwiilonga yetu okudhikapo oosasiona dhomalusheno getango oshilongo ashihe.Etulo miilonga lyosasiona yolusheno lwetango pOtjiiwarongo olya ningilwe okutameka moshiwike sha hugunina sha Novemba 2015 nonando osasiona ndjika oya adhika nale tayi gandja olusheno okuza mesiku eti 24 lya Novemba 2015.Onkene opena iilonga yongeshefa tatu vulu okulonga pamwe nOmbaanga ya Standard.”

LEAVE A REPLY

Please enter your comment!
Please enter your name here